Siarhiej Bašarymaŭ.

Siarhiej Bašarymaŭ.

Jeŭraradyjo raskryvaje novyja akaličnaści hučnaj spravy. «My ź Siarhiejem bolš za hod užo znajomyja. Siabry paznajomili nas. Jon niekalki hadoŭ užo zajmajecca zdačaj kvater na sutki. U jaho čatyry kvatery, nakolki ja viedaju. I voś praz ahulnych znajomych my pačali sustrakacca ź im», ― raspaviadaje Iryna pra svajo znajomstva ź Siarhiejem Bašarymavym.

Zaraz heta adzin z samych viadomych u internecie minskich ryełtaraŭ. A ŭsio praz historyju z «cacačnym desantam». Mienavita Bašarymaŭ u traŭni zdaŭ kvateru dyrektaru šviedskaj Studio Total Piteru Kromvełu. Źbiraŭsia zdavać i 3 lipienia.
Adnak toj da jaho nie dajechaŭ i vysłaŭ niekalki smsak z admovaj ad kvatery na Karła Marksa. Dla biełaruskich čekistaŭ hetaha było dastatkova, kab abvinavacić Siarhieja Bašarymava ŭ spryjańni nielehalnamu pierasiačeńniu miažy hrupaj asobaŭ i źmiaścić jaho pad vartu. A razam ź im i dziaŭčynu Siarhieja ― Irynu.
«Za mnoj pryjšli 6-ha lipienia ŭviečary. Kala 7-j hadziny. Pradstavilisia supracoŭnikami KDB. Siarhieja prykładna adnačasova sa mnoj zabrali, jon pa pracy na kvateru jechaŭ… Jany mnie skazali, što treba prajechać ź imi, kab dać tłumačeńni. Biez anijakich varyjantaŭ. Pryvieźli i pasadzili ŭ kamieru.
Dopyt byŭ tolki na nastupny dzień, 7-hia lipienia», ― Iryna raskazvaje pra svajo zatrymańnie spakojna, amal jak pra cikavuju pryhodu. Ale pryznajecca, što u vuzkaj kamiery «amierykanki» było zusim nie viesieła.
Na nastupny dzień jaje adpuścili sa słovami «pašancavała tabie, što dziaŭčyna». Viarnuŭšysia dadomu Iryna nie znajšła svajho noŭtbuka. Źnikli taksama fłeški i źniešni vinčeścier. Usio zabrali čekisty, pakul jana była na dopycie.

Raskazać pra svaje hutarki z supracoŭnikami KDB Iryna nie moža — abaviazvaje tajamnica spravy. Dziaŭčyna havoryć, što spadziavałasia pabačyć Siarhieja spačatku paśla 3 sutak zatrymańnia, potym praz 10. Ale marna. Kali pabačyła u internecie, što zatrymany jašče i fatohraf Surapin — vyrašyła raskazać pra svajho chłopca žurnalistam.

«Jaho praca ― zdavać kvatery. Ja navat nie viedaju, kamu jon ich zdavaŭ. Ci byli tam niejkija zamiežniki…

U KDB mnie havaryli: “Ty jaho dziaŭčyna, ty musiš viedać”.
Ale ja absalutna ničoha nie viedała, zusim. Ja navat pra šviedski samalot i hetych miadźviedzikaŭ daviedałasia tolki paśla taho, jak była zatrymanaja. Heta niejki absurd», ― raspaviadaje Iryna.

Praz 10 sutak zatrymańnia Siarhiej Bašarymaŭ z padazravanych pieratvaryŭsia ŭ abvinavačanyja. Jamu zakidajuć saŭdzieł u parušeńni miažy hrupaj asobaŭ. Za heta ryełtaru pahražaje ad 3 da 7 hadoŭ. Zaraz Iryna razam z maci Siarhieja prykładaje ŭsie namahańni, kab vyzvalić jaho. Najmajuć svajho advakata, bo ad dziaržaŭnaha mohuć dabicca tolki dziažurnaj frazy «supakojciesia, usio budzie dobra». Za 14 dzion Siarhieju dvojčy pieradali vopratku i pradukty. Čaściej nie dazvalajuć.

Iryna poŭnaja rašučaści damahčysia vyzvaleńnia svajho chłopca. «Heta absurd, heta niejki absurd», ― usio paŭtaraje i paŭtaraje jana.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?