Dvuchuzroŭnievy hramadski transpart u Biełarusi nie navinka.

U 1990-ch hadach na rynak u Ždanovičach, a taksama z žyłoha rajona Malinaŭka da DS «Družnaja» dabracca možna było na vysokich mašynach «MAN».
Usiaho ich było čatyry. Adnak ramont i absłuhoŭvańnie takich hihantaŭ byli nievyhadnymi ich uładalniku, pryvatnamu pradprymalniku. U vyniku ŭ 2000-ha mašyny pierastali vazić haradžan. U Homieli šeść dvuchpaviarchovych aŭtobusaŭ «MAN» z 1997 pa 2004 hod taksama byli hramadskim transpartam. Adnak i tut uźnikli ciažkaści z ramontam, i praź niekatory čas na chadu zastaŭsia tolki adzin žalezny dziadok 1980 hoda vypusku.

Jon pierajechaŭ u Mazyr, dzie jaho niekatory čas vykarystoŭvali ŭ jakaści pierasoŭnaj stałovaj dla kiroŭcaŭ inšych aŭtobusaŭ. Vielikan čatyrochmietrovaha rostu razvoziŭ ježu i vadu. Prapracavaŭšy tak niekatory čas u Mazyrskim aŭtobusnym parku № 2, jon vyjšaŭ na piensiju.

Amal hod mašyna prastajała na prykole, i jaje źbiralisia zdać na mietałałom.
Ale, na ščaście, u centry Biełarusi dla jaho znajšłasia vakansija hida. «Infarmacyjna-turystyčny centr «Minsk» i turfirma «Drom Tur» zadumali ź dziadka zrabić ekskursavoda dla haradžan i haściej stalicy. Dla pačatku mašynu vyrašyli amaładzić.
Restaŭracyja pačałasia ŭ 2009 hodzie i zakančvajecca tolki ciapier. Kaštavała jana kala 50 tysiač jeŭra. «Menu» zamianili mator, abnavili sałon i korpus, navat chacieli ŭstalavać panaramnyja vokny, a taksama płaźmiennyja ekran. Ale ŭ vyniku vyrašyli nie źmianiać pieršarodny vyhlad.
Adzinaj techničnaj dapracoŭkaj stała śpiecyjalnaja linhvasistema, jakaja raspaviadaje na siami movach pra słavutyja miaściny stalicy. Pasažyr nasoŭvaje navušniki i sam vybiraje movu.
Pradstaŭlenyja biełaruskaja, ruskaja, anhlijskaja, ispanskaja, francuzskaja, italjanskaja i niamieckaja.

Maršrut aŭtahida pačynajecca ad čyhunačnaha vakzała, dalej jedzie pa praśpiekcie Niezaležnaści da Nacyjanalnaj biblijateki, potym pa vulicach Kalinoŭskaha, Kiadyški, Filimonava, praśpiekcie Niezaležnaści, Viery Charužaj, Bahdanoviča, praśpiekcie Pieramožcaŭ da «Minsk-Areny», tam razvaročvajecca, jedzie da HUMa, adtul — pa praśpiekcie Niezaležnaści na vakzał.

Ekskursija zojmie prykładna 1 hadzinu 30 chvilin.

Darosłym vajaž aryjencirovačna abydziecca ŭ 80 tysiač rubloŭ, školnikam — u 40 tysiač rubloŭ.
Mahčyma, budzie i sistema źnižak, naprykład: tata z mamaj płaciać za siabie, a dzicia katajecca biaspłatna.

Aŭtobus budzie pafarbavany ŭ čyrvony koler. Raz u miesiac jon budzie biaspłatna vazić dziaciej ź dziciačych damoŭ z usioj Biełarusi.

Charaktarystyki

— Vytvorca: kancern MAN, Hiermanija.

— Hod vypusku: 1980.

— Sieryja: SD 200.

— Maksimalnaja chutkaść: 75 kiłamietraŭ u hadzinu.

— Habaryty: daŭžynia — 11,5 mietra, šyrynia — 2,5 mietra, vyšynia — 4 mietry.

— Kolkaść pasadačnych miescaŭ: ŭnizie 34, naviersie 47.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?