U numary ad 15 maja abłasnaja dziaržaŭnaja hazieta «Viciebski rabočy» nadrukavała artykuł «Fabrika «siensacij», ili Počiem nynčie patriotizm?». Aŭtarka Alena Biehunova śćviardžaje, što ŭ niedziaržaŭnych ŚMI drukujucca materyjały, aŭtary jakich «dziela sumnieŭnaj, a praściej kažučy, brudnaj papularnaści, dazvalajuć sabie parušać samoj pryrodaj vyznačanyja normy čałaviečaj marali».
Značnaja častka artykuła pryśviečanaja repartažu karespandenta «NN» Siarhieja Hudzilina «Kraj Biełarusi. Poŭnač: Aśvieja».Aŭtarka kipić praviednym hnievam: nazyvaje hazietu «fabrykaj siensacyj», a aŭtara — «staličnym papulistam», jaki «paličyŭ za honar naviedać damy ŭsich miascovych ałkašoŭ», vinavacić u vykarystańni «brudnych technałohij», nieabjektyŭnaści, niesumlennaści, parušeńniach zakonu. I pry kancy, u najlepšych savieckich tradycyjach, zaklikaje žurnalista sudzić.
Pryčym ni aŭtara, ni nazvy vydańnia Biehunova nie nazyvaje. Viedaje, što inačaj joj samoj pahražała b sudovaje raźbiralnictva.Naprykład, za voś taki paklop: maŭlaŭ, reparcior «Našaj Nivy»... častavaŭ dziaciej pivam.
Chočacca nahadać sp-ni Biehunovaj i jaje pracadaŭcam, što spravy ab honary, hodnaści i dziełavoj reputacyi nie majuć terminu daŭnaści.I, jak kaža biełaruskaja prykazka, da pary zban vadu nosić.
Adrazu niekalki pasłańniaŭ bačacca ŭ artykule abłasnoj dziaržaŭnaj haziety. Pieršaje — «my łajalnyja». My vystupajem suprać tych, chto aśmielvajecca krytykavać uładu. Druhoje pasłańnie — ad miascovych uładaŭ, «u nas usio dobra». Za im chavajecca strach: a raptam minskaje načalstva, pračytaŭšy artykuł, nakiruje pravierku ŭ Aśvieju? Pravierak načalniki, pryznačanyja źvierchu, bajacca namnoha bolš, čym ludskoha mierkavańnia.
Čamu žurnalist pisaŭ ab prablemach – aburajecca aŭtarka.Čamu nie napisaŭ pra pieršuju ŭ Biełarusi konnuju pahranzastavu i vydatnuju dziciačuju placoŭku la škoły? Kali čytaješ artykuł Biehunovaj, składajecca ŭražańnie, što aŭtarka i sama vieryć u stvorany joj vobraz «haścinnaj i davierlivaj hłybinki». Ale kolki možna rabić ź ludziej idyjotaŭ?
Miž inšym, repartaž składajecca z fotaŭ i videa. Jany havorać sami za siabie.
«Naša Niva» nikoli nie smakuje niehatyŭnyja prajavy žyćcia, ale i łakiravać rečaisnaść my nie źbirajemsia. Pra haleču, zapałochanaść, depresiŭnaść biełaruskaj pravincyi my čujem kožny dzień – z čytackich listoŭ i telefanavaniaŭ, padčas pajezdak pa krainie. Heta prablema nacyjanalnaha maštabu. Heta naša budučynia śpivajecca. I ličym svaim abaviazkam pisać ab hetym. A voś dziaržaŭnyja vydańni pałochajucca praŭdy žyćcia.
Voś videa z Aśviei:
Dazvoł na zdymki ŭ chatach hieroi davali aŭtaru ŭ vusnaj formie, a niekatoryja zdymki rabilisia ŭ hramadskich miescach.
