Jeŭrazijski bank raźvićcia (JEABR) 30 śniežnia pieraličyŭ Biełarusi druhi tranš kredytu sa srodkaŭ Antykryzisnaha fondu JeŭrAzES u abjomie 440 miljonaŭ dołaraŭ.

Heta adbyłosia paśla vykanańnia biełaruskim bokam «adładžanych umoŭ» i ŭ adpaviednaści z rašeńniem savieta Antykryzisnaha fondu JeŭrAzES, zaznačajecca ŭ paviedamleńni banka.

U kancy listapada saviet fondu ŭchvaliŭ vydaču druhoha tranšu finansavaha kredytu pry vykanańni nastupnych dźviuch umoŭ: padpisańnie ŭkaza prezidenta Biełarusi ab pieradačy niaprofilnych aktyvaŭ Nacbanka krainy i pavieličeńni ŭ śniežni 2011 hoda Nacbankam stavak pa instrumientach davańnia likvidnaści na mižbankaŭskim rynku na 5%.

Vystupajučy 30 listapada ŭ parłamiencie, vice-premjer Siarhiej Rumas paviedamiŭ: prablema dziejnych u krainie pracentnych stavak była adnoj z asnoŭnych pry razhladzie pytańnia ab vydzialeńni Biełarusi druhoha tranšu kredytu z Antykryzisnaha fondu JeŭrAzES (440 młn. dołaraŭ čakajecca da kanca śniežnia. — BiełaPAN.) «Našy partniory zadajuć nam całkam łahičnaje pytańnie: jak pry inflacyi 100% staŭki znachodziacca na ŭzroŭni 60–65%? Heta admoŭnaja pracentnaja staŭka», — rastłumačyŭ jon.

Ukaz «Ab aptymizacyi struktury aktyvaŭ Nacyjanalnaha Banka Respubliki Biełaruś» byŭ padpisany 23 śniežnia. Z 12 śniežnia staŭka refinansavańnia była pavyšana z 40% da 45% hadavych, a pracentnaja staŭka pa apieracyjach padtrymki likvidnaści bankaŭ — z 65% da 70% hadavych, zaznačaje JEABR.

Raniej Biełaruś uzhadniła z Antykryzisnym fondam JeŭrAzES prahramu ekanamičnych reform u abmien na kredyt u 3 młrd. dołaraŭ, jaki budzie vydzieleny niekalkimi tranšami na praciahu 2011–2013 hadoŭ. Pieršy tranš u pamiery 800 miljonaŭ dołaraŭ Biełaruś atrymała 21 červienia.

Nastupnyja čatyry tranšy, u pamiery 440 miljonaŭ dołaraŭ kožny, buduć pieraličvacca Biełarusi na praciahu 2012–2013 hadoŭ
pa miery vykanańnia raspracavanaj uradam prahramy makraekanamičnaj i fiskalnaj stabilizacyi. Prahrama ŭklučaje miery pa źnižeńni deficytu najaŭnych apieracyj za košt bolš žorstkaj hrašova-kredytnaj i biudžetnaj palityki, skaračeńni emisijnaha kredytavańnia ekanomiki i papaŭnieńni mižnarodnych reziervaŭ da ekanamična biaśpiečnaha ŭzroŭniu.

Kredyt vydzieleny terminam na dziesiać hadoŭ i ŭklučaje trochhadovy lhotny pieryjad, na praciahu jakoha ažyćciaŭlajecca tolki apłata pracentaŭ pa kredycie. Pahašeńnie asnoŭnaj sumy kredytu pačniecca ŭ druhoj pałovie 2014 hoda.

Jak paviedamlaje RIA Novosti, 30 śniežnia Minfin Biełarusi taksama pieraličyŭ JEABR druhi płaciež pracentnych sum, što naležać pa hetym kredycie. Pracentnaja staŭka pa kredycie vyličvajecca jak košt fandziravańnia RF na mižnarodnych rynkach u siarednim za apošnija try miesiacy, jakija papiaredničajuć dacie vypłaty pracentaŭ (ale nie bolš za 4,9% hadavych). Pracenty vypłačvajucca štokvartalna.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?