Niazvykła ciopłaje dla zimy nadvorje zachavajecca ŭ Biełarusi ŭ pieršaj dekadzie studzienia. Taki prahnoz zrabiła pa prośbie BiełaPAN hałoŭny sinoptyk Respublikanskaha hidramieteacentra Ludmiła Paraščuk.

Pavodle jaje słoŭ, u načnyja hadziny tempieratura pavietra čakajecca na ŭzroŭni minus 5°S — plus 2°S, časam pry prajaśnieńniach da 6–10°S marozu. Dzionnyja tempieratury buduć vahacca ŭ miežach minus 4°S — plus 3°S.

Na bolšaj častcy terytoryi krainy ŭ pieršaj dekadzie studzienia prahnazujucca apadki, u asnoŭnym mokry śnieh, u siaredzinie dekady — doždž sa śnieham.
Miescami čakajecca tuman, hałalod, na darohach hałalodzica.
Sinoptyk nie ŭziałasia prahnazavać nadvorje na bolš doŭhi pieryjad,
bo dastatkova vysokuju apraŭdvalnaść majuć tolki prahnozy da dziesiaci dzion. Doŭhačasovyja prahnozy, jakija sinoptyki robiać pry dapamozie statystyčnych mietadaŭ, apraŭdvajucca vielmi redka, dadała Paraščuk.

Što da 2011 hoda, to, jak adznačyła načalnik adździeła klimatu Respublikanskaha hidramieteacentra Alena Kamaroŭskaja, jon nie staŭ vyklučeńniem z čarady hadoŭ pieryjadu paciapleńnia, jaki pačaŭsia ŭ 1989 hodzie. Siaredniaja tempieratura pavietra, pa aryjencirovačnych padlikach, składała ŭ 2011 hodzie krychu vyšej za plus 7°S, što na 1,3–1,5°S vyšej klimatyčnaj normy, pryčym ciaplej klimatyčnaj normy byli amal usie miesiacy hoda. Vyklučeńniem staŭ luty, jaki byŭ chaładniejšy za klimatyčnuju normu na 2,1°S.

Najbolšaje adchileńnie tempieratury ad normy nazirałasia ŭ studzieni, jaki byŭ ciaplejšy za siaredniaje značeńniaje tempieratury dla hetaha miesiaca na 3°S.
Adnak jašče bolšaje adchileńnie ad normy moža być zafiksavana ŭ śniežni. Pavodle papiarednich padlikaŭ, jon byŭ ciaplejšy za normu pryblizna na 4°S.

Za 2011 hod u krainie vypała kala 580 mm apadkaŭ, što składaje pryblizna 90% hadavoj klimatyčnaj normy. Na praciahu hoda apadki vypadali nieraŭnamierna: suchimi byli sakavik, krasavik, žnivień, vierasień, kastryčnik i listapad; astatnija miesiacy byli abo vilhotnymi, abo kolkaść apadkaŭ nabližałasia da normy.

Samym vilhotnym byŭ lipień, kali ŭ siarednim pa krainie vypała 130 mm apadkaŭ — u paŭtara razu bolš za klimatyčnuju normu. Najbolš suchim — listapad, z apadkami ŭ siarednim pa Biełarusi 14 mm, što składaje 29% klimatyčnaj normy.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?