Staršynia naziralnaha savieta futbolnaha kłuba «Dynama» Juryj Čyž spakojna stavicca da zajavaŭ, što jamu nieabchodna pradać kłub dziela jaho vyratavańnia.

«Dyk dziela Boha, niachaj chtości pryjdzie i kupić. Dziesiać hadoŭ ja heta čuju, ale žadajučych siońnia zaprehčysia ŭ hety jarmo dobraachvotna niama. Chtości moža lepš — niachaj, dziela Boha, u mianie kompleksaŭ pa hetym pytańni niama», — zajaviŭ Čyž.

Jon paviedamiŭ, što rašeńnie pryznačyć hałoŭnym trenieram ciapierašniaha nastaŭnika «Biełšyny» Alaksandra Siadniova źjaŭlajecca kančatkovym. «My vybirali jaho nie z adnoj kandydatury, — skazaŭ Čyž. — Impanuje jaho metanakiravanaść, žadańnie pracavać i rabić vynik z taho, što jość. Jon pracuje nad saboj, vučycca. Siońnia redkija śpiecyjalisty, jakija šukajuć, sprabujuć, korpajucca ŭ sabie, pracujuć nad svajoj kapitalizacyjaj jak treniera. Pytańnie, ci zmoža jon spravicca z našymi mahčymaściami, jakija buduć pradastaŭleny, kab heta nie raschałodžvała, nie rassłablała».

Pavodle słoŭ Čyža, płanujecca pakinuć u kamandzie hulcoŭ, jakija pakazali siabie z dobraha boku, i ŭmacavacca pačatkoŭcami. «Čałaviek siem-vosiem, my dumajem, realna pryciahnuć z boku, plus svaich maładych», — skazaŭ jon.

Jak zajaviŭ Čyž, ciapierašni hałoŭny trenier Siarhiej Aŭčyńnikaŭ nie pastaviŭ kamandzie hulniu. «Ja nie kampleksuju — druhoje, treciaje abo čaćviortaje miesca. Jon jak śpiecyjalist nie spraviŭsia z tym uzroŭniem, abjomam zadač, jakija na jaho ŭskładalisia. Jon nie budzie trenieram», — ličyć staršynia naziralnaha savieta.

Jon adznačyŭ, što pamiataŭ pra vykazvańni znakamitaha napadnika, nastaŭnika zbornaj SSSR Kanstancina Biaskova: «Z bramnikaŭ nie ŭdajucca dobryja treniery». «Ale impanavała jaho (Aŭčyńnikava. — BiełaPAN.) krasamoŭstva, usio astatniaje… Čas, jaki my prapracavali, prajšoŭ. Akramia jak samomu sabie, jon bolš nikomu nie padabajecca», — zajaviŭ Čyž.

«My dajem mahčymaść ludziam siabie raskryć. Inšaja sprava, jak jany z hetym spraŭlajucca. Atrymlivajecca, na žal, daloka nie zaŭsiody», — reziumavaŭ jon.

Były varatar zbornaj Rasii Siarhiej Aŭčyńnikaŭ uznačaliŭ «Dynama» ŭ siaredzinie maja hetaha hoda, kali kamanda znachodziłasia na 11-m miescy. U 10 turach, z 21-ha pa 30-y (z 15 žniŭnia pa 30 kastryčnika), kamanda nie paciarpieła nivodnaj parazy atrymaŭšy šeść pieramoh i čatyry razy zhulaŭšy ŭničyju. Zatym byli dva paražeńni, i za tur da zakančeńnia čempijanatu «Dynama» straciła šancy ŭvajści ŭ trojku pryzioraŭ. 27 listapada kamanda hulaje na svaim poli z «Minskam», jakomu pahražajuć pierachodnyja matčy sa staličnym «Partyzanam», što zaniaŭ druhoje miesca ŭ pieršaj lizie.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?