Pasłuchać "Krainu mroj":

Ukrainski hurt «Vopli Vidaplasava» zapisaŭ dla prajektu «Budźma! Tuzin. Pierazahruzka-2» biełaruskuju versiju adnaho z svaich hałoŭnych chitoŭ. «Krainu mroj» na biełaruskuju movu pieraasensavaŭ Andrej Chadanovič. Aleh Skrypka nazvaŭ pierakład biezdakornym i ź vialikim zadavalnieńniem zaśpiavaŭ pa-biełarusku. I nie tolki tamu što ź vialikaj pavahaj stavicca da našaj krainy. Lider VV zusim niadaŭna vyśvietliŭ, što jon na čverć biełarus.

Aleh Skrypka vyrašyŭ pieraśpiavać dla prajektu pieśniu «Krajina mrij» z adnajmiennaha alboma hurta «Vopli Vidaplasava», jaki byŭ zapisany ŭ 1994 hodzie, kali Skrypka stała žyŭ u Francyi. Aleh paličyŭ, što hetaja pieśnia najbolš pasuje dla hetaha prajektu i dla Biełarusi naohuł. «I ja asabista, i ŭvieś naš kalektyŭ ščyra lubim Biełaruś i vielmi cenim toje, što

biełarusy zastajucca takimi tonkimi i dušeŭnymi, nie zvažajučy na časovyja ciažkaści. Padobnaja publika jość chiba što jašče ŭ Japonii — jana słuchaje i razmaŭlaje sercam.
Hety stan i byŭ apisany ŭ abranym tvory».

Lider VV zusim niadaŭna vyśvietliŭ, što jon na čverć biełarus. Daznaŭsia pra toje ad svajho baćki, jaki raspavioŭ historyju jaho babuli.

«Maja babula, u dziavoctvie Kaciaryna Mužanava, naradziłasia na Pałtaŭščynie, na chutary Siniakiŭščyna. Pry kancy XIX stahodździa da tamtejšaha pana pryjechaŭ pan ź Biełarusi, siabra jaho. Hrali jany ŭ karty i biełarus prajhraŭ stolki, kolki nie mieŭ pry sabie. U jakaści harantyi viartańnia pazyki jon pakinuŭ tam svajho pamočnika pa haspadarčaj častcy. Viarnuŭsia biełaruski pan praz hod, viarnuŭ hrošy, ale pamočnika nie zabraŭ. Toj užo atabaryŭsia na chutary, zavioŭ siamju.
I pan daŭ dazvoł na toje, kab jon zastaŭsia. Proźvišča jaho było Mužanaŭ. U jaho było čatyry syny. Unučkaj hetaha pamočnika jakraz i była maja babula».

Aleh zaŭždy cikaviŭsia tym, što adbyvajecca ŭ susiedniaj Biełarusi. Ź biełaruskimi kulturnymi dasiahnieńniami jon znajomicca bližej na festyvali «Krajina mrij», jaki ładzić štohod na Kupalle ŭ centralnym parku Kijeva. Na jaho zaprašeńnie tam vystupali takija hurty, jak etna-tryjo «Troica», «Pałac», «Stary Olsa», Uria, Testamentum Terrae, «Altanka». «Biełaruskija hurty ŭdała spałučajuć rok z etnikaj, časta jany kudy cikaviejšyja za ŭkrainskich kaleh u płanie hałasavoj padačy», — razvažaje Aleh i zaznačaje, što biełarusy zaŭždy dobra hučać dziakujučy mocnym muzykam i vysokaj pracazdolnaści. Jość u biełaruskich kamandaŭ jašče adna rysa, jakaja mocna padabajecca Skrypku:

«U vašych artystaŭ mnie zaŭždy impanavała šlachietnaść, jakuju tak doŭha vybivali z ukrainskaj kultury, u vyniku čaho sučasnyja ŭkrainskija muzyki nie adčuvajuć arystakratyčnaści, hodnaści i hłybini narodnaj muzyki. A ŭ biełarusaŭ z hetym usio ŭ paradku».

Za pierakład na biełaruskuju movu «Krainy mrij» uziaŭsia Andrej Chadanovič, jaki nazyvaje siabie «addanym fenam VV»: «Hetu pieśniu ja viedaju daŭno i daŭno jaje lublu, dla mianie jana źjaŭlajecca kultavaj, — kaža paet. — Tamu pry pierakładzie staviŭsia da jaje amal jak da kłasiki, namahaŭsia być jak maha bližej da aryhinalnaha tekstu, pravieranaha časam. Spadziajusia, što nie naškodziŭ tekstu i jon naležnym čynam zahučaŭ u biełaruskim kantekście».

Skrypka adrazu ŭpadabaŭ pierakład Chadanoviča. «U takich vypadkach isnuje try praviły — zachavańnie sensu, rytmičnaha malunku i kab fanietyčna było zručna śpiavać.

Pierakład Andreja vyjšaŭ biezdakornym.
Bačna, što čałaviek talenavity i dobra raźbirajecca ŭ muzycy».
Lidar VV maje pierakananaść, što samyja cikavyja kulturnyja prajekty va Ukrainie i Biełarusi siońnia źviazany mienavita z rodnaj movaj. Na dumku muzyki, ciapierašniaja tatalnaja hłabalizacyja ŭjaŭlaje ź siabie biezdań, u jakoj vielmi prosta raspuścicca dy stracić siabie, staŭšy prosta pienaj.
«Tolki rodnaja mova, rodnaja kultura dazvolać zachavać siabie, uzbahacić svaju tvorčaść, napoŭnić jaje sensam. Niedastatkova prosta sačyniać dobruju muzyku ci niešta jašče — važny źmiest taho, čym ty zajmaješsia. Nieści svaju movu ŭ ceły śviet — heta vysokaja misija, vartaja samych lepšych ludziej krainy», — śćviardžaje Aleh.
Vopli Vidaplasava — Kraina mroj

(muzyka i słovy — Aleh Skrypka, biełaruski tekst — Andrej Chadanovič)

Čuŭ ja — ci mnie śnicca paroj,
Što isnuje kraina mroj,
U toj krainie raście dzivosny haj.
Haj toj kožny moža znajści —
Tajamnicu čaroŭnaści,
Dasiahnuŭšy hłybiniaŭ, razhadaj!

Chaj niasie mianie raka
Ŭ začarovanym čaŭnie,
Ŭ nieba niasie,
Byccam uva śnie.

Tam šmat patajemnych chadoŭ,
Što siahajuć byłych hadoŭ,
Tam žyvioły niabiesnaj dabryni.
Nie šukaj ty na mapach jaje,
Jana tam, dzie šlachi tvaje
Da biaskoncaj imknuć dalečyni.

Nas niasie, niasie raka
Ŭ začarovanym čaŭnie,
Ŭ nieba niasie,
Byccam uva śnie.

Pieśniu možna spampavać tut abo tut .
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?