Maci paliviaźnia Eduarda Łobava Maryna atrymała ad Źmitra Daškieviča list. Heta pieršaja viestka ad jaho za bolš jak miesiac.

Raniej Daškieviča pakarali karceram, a potym nie puskali da jaho advakataŭ, listy ad viaźnia nie dachodzili. Maryna Łobava paviedamiła pra Daškieviča: «Piša, što ciapier jon znachodzicca, jak Mikita Lichavid, u PKT — heta pamiaškańnie kamernaha typu. Źmiaścili jaho tudy na miesiac, a potym buduć vyrašać pavodle abstavinaŭ. A nakont taho, za što jaho pakarali karceram, nie napisaŭ. Raniej ja pytałasia ŭ jaho, ci, moža, idzie jaki cisk na jaho ŭ suviazi z prašeńniami ab pamiłavańni, dyk jon napisaŭ tolki, što nikoli nia budzie pisać takoha prašeńnia. Što jon uziaŭ na siabie hety kryž i admaŭlacca ad jaho, zdradžvać svaim pryncypam nia budzie».

Źmitra Bandarenku nieŭzabavie mohuć pieravieści z «Vaładarki» ŭ mahiloŭskuju kaloniju № 15, paviedamiła žonka viaźnia Volha Bandarenka sa spasyłkaj na turemnaha lekara. Lekar zapeŭniŭ Volhu Bandarenku, što pry kanvajavańni milicyjanty ŭličać jahony stan: «Adzinaje dobraje, što skazaŭ, što buduć pieravozić jaho ŭ lažačym stanie. Heta mianie krychu supakoiła, bo za etapavańnie ja vielmi pieražyvaju». Pavodle rekamendacyi medykaŭ z 5-ha haradzkoha špitala, Źmitru Bandarenku paśla aperacyi patrebnaja reabilitacyja ciaham nia mienš jak 6 miesiacaŭ. Miž tym viaźnia źbirajucca nakiravać u kaloniju, dzie paŭnavartasnaja reabilitacyja niemahčymaja.

U škłoŭskuju kaloniju, dzie trymajuć eks-kandydata na prezydenta Mikałaja Statkieviča, narešcie dasłali jahony pašpart. Žonka viaźnia Maryna Adamovič kaža, što źviestak pra toje, dzie znachodzicca pašpart Statkieviča, nie było z času sudu nad palitykam. Maryna Adamovič nakiravała niekalki skarhaŭ adnosna pašparta Statkieviča: «Heta Leninski rajonny sud adpraviŭ prysud u kaloniju, a pašpart čamuści na „Vaładarku“. Ale lohiku hetaha kroku zrazumieć niemahčyma. Ja tłumaču heta tym, što chacieli jašče bolej zrabić niepryjemnaściaŭ dla viaźnia».

Aktyvist «Maładoha frontu» Eduard Łobaŭ, asudžany na 4 hady źniavoleńnia pavodle artykuła ab chulihanstvie — za bojku, jakuju nibyta ŭčyniŭ za dzień da vybaraŭ, — napisaŭ maci, što nie źbirajecca padavać prašeńnie ab pamiłavańni.

Tym časam z aficyjnych krynicaŭ stała viadoma, što 9-y pamiłavany Łukašenkam, Uładzimier Chamičenka, staŭ na ŭlik u milicyi Słucku, dzie jamu prapanavali pracaŭładkavacca i paabiacali akazać sadziejańnie ŭ atrymańni pracoŭnaj specyjalnaści.

Adrazu paśla padziej 19 śniežnia ŭ internecie Chamičenka atrymaŭ mianušku «navušnik» z-za taho, što nibyta na hanku Doma ŭradu pierahavorvaŭsia z kimści praz admysłovaje prystasavańnie. U sudzie padazreńni ŭ tym, što Chamičenka byŭ pravakataram, nie paćvierdzilisia. Źviazacca z Uładzimieram Chamičenkam paśla jahonaha vychadu na volu nie ŭdajecca.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?