Darafiejeŭ pierajechaŭ u Kijeŭ, budzie vieści tok-šou na Piatym kanale 38

Siarhiej Darafiejeŭ padpisaŭ trochhadovy kantrakt z ukrainskim «5 kanałam» i budzie rabić tam svajo analityčnaje šou. Jano pa svajoj formie budzie nahadvać prahramu «Vybar+», jakuju Siarhiej vioŭ na ANT. U Kijevie jon pravioŭ usio leta, a prahrama startuje ŭvosieni, piša «Komsomolskaja pravda v Biełarusi».

Darafiejeŭ budzie vieści jaje pa-rasiejsku, ale aktyŭny asvojvaje i ŭkrainskuju movu. Jahony tata — ukrainiec, baćki vučylisia ŭ Kijevie i razmaŭlali pa-ŭkrainsku.

Darafiejeva zvolnili z ANT paśla taho, jak jon zadavaŭ sumlennyja pytańni kiraŭnicy Centrvybarkama Jarmošynaj u viečar paśla vybaraŭ.

Siarhiej Darafiejeŭ byŭ adnym z samych papularnych televiadučych Biełarusi. Jon pačynaŭ jak viadučy navinaŭ i ranišniaha efiru ANT. Paśla jon staŭ rabić tok-šou — samaje rejtynhavaje ŭ krainie. U im jon paźbiahaŭ palityki i vostrych kutoŭ, choć i dazvalaŭ niekatoryja dyskusii na biaśpiečnyja temy hramadstva j kultury. Navat hetym pamiarkoŭnym pluralizmam prahrama vyłučałasia na ahulnym tle łukašenkaŭskaha telebačańnia.

19 śniežnia ŭ žyvy efiry jon spytaŭ u Jarmošynaj, ci bačyła jana rolik, u jakim u technikumie kuratarka adnoj z hrup patrabuje ad vučniaŭ źjavicca na daterminovaje hałasavańnie i ci źjaŭlajecca takaja situacyja parušeńniem zakanadaŭstva. «Tak, heta parušeńnie», — adkazała Jarmošyna. «Dyk značycca, vybary prajšli z parušeńniami?» — padłaviŭ jaje Darafiejeŭ. U vyniku Lidzija Jarmošyna demanstratyŭna pakinuła studyju.

Pieradača vyklikała asabistaje niezadavalnieńnie Alaksandra Łukašenki, jaki padčas pres-kanfierencyi nazvaŭ Darafiejeva «chłopčykam-žurnalistam, jakoha treba pastavić na miesca».

Nieŭzabavie paśla hetaha Darafiejeva adpravili ŭ adpačynak, a paśla i zusim zvolnili. Paśla hetaha Darafiejeŭ vybiraŭ miž Maskvoj i Kijevam. «Biełsat» pracy Darafiejevu nie prapanoŭvaŭ.

Siarhiej Hiezhała

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH