U kancy lipienia ŭ Nacyjanalnaha banka Biełarusi źjaviŭsia novy staršynia praŭleńnia — Nadzieja Jermakova. Ab situacyi ŭ ekanomicy i funkcyjanavańni bankaŭskaj sistemy Biełarusi z novym kiraŭnikom hałoŭnaha banka krainy pahutaryŭ karespandent «Źviazdy».

— Nadzieja Andrejeŭna, Vas pryznačyli staršynioj praŭleńnia Nacbanka zusim niadaŭna. Jak siabie adčuvajecie na novym miescy pracy?

— Ciažkavata pakul. Patrebna z kankretnaj štodzionnaj pracy ŭvachodzić u bolš analityčnuju. Uvohule, votčyna Piatra Prakapoviča — heta surjoznaja struktura, adukavanyja ludzi, prafiesijanały.

Pryjści na padrychtavanaje — heta zaŭsiody dobra, niezaležna ad taho, što jość siońnia ŭ ekanomicy, u finansavaj sistemie.
Hetyja ciažkaści nie ŭ pieršy raz. Jany pastajanna byli i buduć. Pahladzicie: u vysokaraźvitych krainach śvietu adbyvajucca roznyja ekanamičnyja kryzisy i kataklizmy. Tamu nie byvaje tak, kab usio hładka było. Kali b tak było, śviet daŭno skončyŭsia b.

— Jak Vy ličycie, naša bankaŭskaja sistema zaraz efiektyŭna pracuje dla palapšeńnia situacyi?

— Naša bankaŭskaja sistema skłałasia ŭžo daŭno: centralny bank, jaki vyznačaje hrašova-kredytnuju palityku i zadaje praviły hulni ŭ bankaŭskaj sistemie, i tryccać adzin bank. Chaču skazać, što (nakolki ja ŭžo za dva tydni ŭbačyła) usie banki krainy pracujuć surjozna niezaležna ad svajho kapitału i mahčymaściaŭ. Kožny znachodzić niejkuju svaju nišu i pracuje. Niejkich prablem z tym, kab jakiści bank tam słabieńki byŭ ci razvalvaŭsia, niama. Kožny pracuje ŭ svaim biznesie. Ale ž nie tolki ad bankaŭskaj sistemy zaležyć situacyja ŭ ekanomicy. U pieršuju čarhu — naturalnyja zakony: materyjalnaje — pieršasnaje, a bankaŭskaja sistema źjaŭlajecca tymi kryvianosnymi sasudami, jakija absłuhoŭvajuć heta materyjalnaje.

— Nacbank niadaŭna paviedamiŭ pra toje, što ŭkłady nasielnictva ŭ biełaruskich bankach vyraśli.

— Układy, dziakuj Bohu, rastuć.
Va ŭsich bankach jość pryrosty. Rastuć i ŭ biełaruskich rublach, i ŭ valucie. Ja dumaju, što ludzi pravilna zaryjentavalisia, kali stali nieści ŭkłady ŭ banki, tamu što ŭ luboj situacyi, kali hrošy znachodziacca ŭ banku, jany pracujuć. Na ich naličvajucca pracenty. A kali ty ich zachoŭvaješ dzieści doma, to jany abiasceńvajucca, tamu što
idzie abiasceńvańnie nie tolki biełaruskaha rubla, ale i dołara, i jeŭra, luboj valuty.
Umacavańnie nacyjanalnaj valuty zaležyć ad stanu ekanomiki toj ci inšaj krainy, tamu ŭ lubym vypadku, kali tvoj depazit lažyć u banku, to jon pracuje na toje, kab pryrastali dachody. Tamu tyja, chto zrabiŭ układ, niesumnienna, vyjhrajuć. Tym bolš što pracentnyja staŭki vysokija. Naprykład, staŭki pa rublovych depazitach dasiahajuć užo 30 i bolš pracentaŭ. A kali dadać da hetaha jašče i štomiesiačnuju kapitalizacyju pracentaŭ, to vyhada budzie jašče bolš važkaj, atrymlivajecca dzieści kala 35 pracentaŭ hadavych. Da taho ž, u adpaviednaści ź biełaruskim zakanadaŭstvam,
u našaj krainie harantujecca poŭnaja zachavanaść źbieražeńniaŭ nasielnictva va ŭsich bankach,
a dachody hramadzian ad raźmiaščeńnia hrašovych srodkaŭ u bankaŭskich układach nie abkładajucca padatkam.

— Da jakoha momantu budzie praciahvacca palityka pastupovaha pavieličeńnia staŭki refinansavańnia?

— Staŭka refinansavańnia ŭ luboj krainie śvietu vyznačajecca, zychodziačy z uzroŭniu inflacyi. Zaraz jana raście, tamu raście i staŭka refinansavańnia. Robicca heta pastupova, bo pamier čarhovaha pavyšeńnia staŭki refinansavańnia vyznačajecca nie tolki z metaj abarony ŭkładaŭ ad abiasceńvańnia, ale i z ulikam intaresaŭ kredytaatrymalnikaŭ. Da taho ž paśladoŭnaje pavieličeńnie staŭki refinansavańnia, jakoje robicca sioleta na praciahu ŭsiaho hoda, nakiravana na rost koštu pazykovych hrošaj u ekanomicy jak važnaj umovy pierachodu na bolš žorstkuju hrašova-kredytnuju palityku Nacyjanalnaha banka. Heta, u svaju čarhu, u kompleksie z ekanamičnymi mietadami ŭrada budzie sadziejničać stabilizacyi situacyi ŭ źniešnieekanamičnaj śfiery i abmiežavańni inflacyjnych pracesaŭ. Prynamsi,

pavyšeńnie naminalnaha ŭzroŭniu pracentnych stavak u jakaści elemienta stabilizacyjnaj palityki źjaŭlajecca suśvietnaj praktykaj.
Pry hetym pa miery raźvićcia pazityŭnych tendencyj u ekanomicy i na finansavym rynku Nacyjanalny bank vierniecca da praktyki źnižeńnia staŭki refinansavańnia.

— Jak Vy ličycie, kali zmoža ŭžo situacyja ŭ ekanomicy paviarnucca da stabilizacyi?

— Ja ŭžo kazała, što na pieršym miescy — realnaja ekanomika. Jaje materyjalnaja baza. Kali ekanomika budzie pracavać efiektyŭna, budzie davać źnižeńnie sabiekoštu, źnižeńnie vydatkaŭ, pavieličeńnie jakaści, pavieličeńnie ekspartu, jaki daść nam valutu, — heta ŭsio ŭrešcie, budzie spryjać i stabilizacyi na finansavym rynku.

Heta jak u luboj siamji: kali ty pracuješ dobra, to ty budzieš zarablać, a kali ty budzieš siadzieć na kanapie, to atrymlivać budzieš adpaviedna. Tak i ŭ ekanomicy.
Heta naturalnyja zakony.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?