19-hadovy hrodzieniec pajšoŭ u armiju i zahinuŭ u DTZ. Adnak jaho maci, Natalla Krupienka, nie atrymała hrašovaj kampiensacyi ŭ suviazi z hibiellu vajskoŭca. Śledstva vajennaj prakuratury nastojvaje na tym, što chłopiec usio rabiŭ pravilna i źjaŭlajecca paciarpiełym bokam — minskaja dziaržaŭtainśpiekcyja śćviardžaje, što sałdat zahinuŭ pa svajoj vinie.

Sprečki vajennaj prakuratury i minskaj DAI doŭžacca bolš za paŭhoda. A maci zahinułaha vajskoŭca piša listy ŭ roznyja instancyi.

Da momantu trahiedyi Saša adsłužyŭ pałovu terminu. Chłopiec prachodziŭ terminovuju słužbu ŭ minskaj v/č 35703, jakaja zajmajecca transpartnym absłuhoŭvańniem Ministerstva abarony. U žnivieński dzień minułaha hoda Saša, jak zvyčajna, ranicaj zavioŭ UAZik i pajechaŭ za namieśnikam načalnika hałoŭnaj vajennaj inśpiekcyi. Na minskaj kalcavoj darozie aŭtamabil zahłuch. Chłopiec vyjšaŭ z mašyny, i ŭ hety momant jaho źbiŭ aŭtamabil. Tut pakazańni śviedak DTZ i vyniki śledstva razychodziacca.

Dziaržaŭtainśpiekcyja ŭstanaviła, što Saša nie ŭklučyŭ avaryjnuju sihnalizacyju i nie vystaviŭ znak.

— Kiroŭca, jaki ruchaŭsia za UAZikam, nie moh ubačyć pieraškodu: vajennaja mašyna apynułasia na pahorku, akramia hetaha, bačnaść zasłaniŭ furhon. Śviedki raspaviali, što sałdat ramantavaŭ aŭtamabil na darozie, adnak pa praviłach jon pavinien byŭ adahnać mašynu na ŭzbočynu. U suviazi z hetym my nie znajšli ŭ dziejańniach vadziciela składu złačynstva, — patłumačyŭ były śledčy adździeła rasśledavańnia DTZ pa Zavadzkamu RAUS h. Minska Mikałaj Vałujeŭ, jaki pravodziŭ rasśledavańnie.

Vyniki pravierki Minskaj mižharnizonnaj vajennaj prakuratury zusim inšyja:

— Mašyna z našymi vajennasłužačymi prajazdžała mima, kali zdaryłasia avaryja. Ludzi śćviardžajuć, što avaryjnaja sihnalizacyja była ŭklučana. Śledčy ekśpierymient pakazaŭ, što za hety čas sałdat nie moh pačać čynić aŭtamabil, a moh tolki vyjści z UAZika, kab dastać avaryjny znak. My ličym, što kiroŭca, jaki źbiŭ chłopca, mieŭ mahčymaść jaho zaŭvažyć, ale straciŭ pilnaść, — vykazaŭ mierkavańnie namieśnik kamandzira pa ideałahičnaj pracy v/č 35703 Siarhiej Karpijevič.

Na dniach maci zahinułaha sałdata dačakałasia lista z Hienieralnaj prakuratury. Svaimi skarhami žančyna damahłasia taho, kab spravu adpravili na daśledavańnie.

— Saša kala paŭhoda pralažaŭ u komie ŭ vajennym špitali. A kiroŭca, jaki źbiŭ jaho, navat nie paprasiŭ prabačeńnia pierad nami, nie kažučy ŭžo ab dapamozie. Viadoma, na syna biez bolu nielha było hladzieć, levaja pałova tvaru była źniaviečanaja, — sa ślazami na vačach uspaminaje Natalla Krupienka.

Pa słovach Siarhieja Karpijeviča, kali vyśvietlicca, što sałdat zahinuŭ nie pa svajoj vinie, to jaho maci moža raźličvać na dapamohu. A pakul žančyna chodzić na mahiłu syna. «Saša maryŭ kupić mašynu i źbiraŭ hrošy, ciapier jany pojduć jamu na pomnik ...» — kaža Natalla Leanidaŭna.

Hladzi jašče: Pajšoŭ u vojska zdarovym, a viarnuŭsia invalidam.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?