«U Minsku 116 rubloŭ jałavičyna», — niečakana kaža pastaŭščyk miasa, abviestka jakoha znajšłasia ŭ internecie. Sami bačycie: jon adrazu nazyvaje košt u rasijskich rublach! 116 rasijskich rubloŭ — heta 20 tysiač biełaruskich, kali pavodle kursu Nacbanka. Prykładna pa takich koštach miasa na ekspart adpraŭlaje Barysaŭski miasakambinat. «Biełaruskija hrošy mianie nie cikaviać», — tłumačyć pradprymalnik.

Zhodna sa słovami druhoha «miasnoha» pradprymalnika, rasijanie mohuć skupić miasa navat u 1,5 razu daražej:

«Pakul miasa niama, i nie viedaju, kali budzie. Rasija, usio jedzie tudy. Pa-pieršaje, jany daražej skuplajuć. Pa-druhoje, płaciać valutaj».

Na Kamaroŭskim rynku častka miasnych šerahaŭ pustuje. «Usio ŭ Rasiju sychodzić, za dołary. Zakupka darahaja. Zaŭtra mianie tut naohuł nie budzie», — tłumačyć pradaŭščyca. A siońnia jana pradaje miasa pa košcie ad 45 da 60 tysiač rubloŭ.

Inšaja skardzicca: maŭlaŭ, taho, što na dzień dajuć, zusim nie chapaje. «Usio miasa na Maskvu adsyłajuć. Dajuć pa adnoj tušcy ŭ dzień. Zakupka miasa ŭžo pa 20 tysiač». Pradaŭščycy pryznajucca: za miasa rasijanie pierapłačvajuć. Hatovyja skupić navat uvieś pryłavak.

«Tut kuryca była pa 15 tysiač za kiłahram.

Ruskija padhaniajuć furu, kažuć, davaj zabiarem za 17.
Cełymi dniami stajać pilnujuć, pakul im adpuściać tavar. Kali zabaronnyja miery nie ŭviaduć, naohuł miasa nie budzie», — tłumačyć pradaŭščyca. Poruč ź joj pusty pryłavak, dzie musiła być kuryca. Vidać, užo źjechała fura…

Niepadalok miesca, dzie kuryca ŭsio ž jość, ale tam čarha ŭ 30 čałaviek. Kaštuje ad 20 da 24 tysiač za kiłahram za roznyja častki tuški. Apošniaja ŭ čarzie pa ptušku — žančyna piensijnaha ŭzrostu. «Tam nidzie niama. Peŭna, pryvieźli ŭ adnym miescy, tamu staić takaja čarha. Pa-mojmu, u kramie navat tańniej». U čarhu stanovicca inšaja žančyna, ustupaje ŭ hutarku. «Nie, nie tańniej. Voś poruč hrudka pa 24 tysiačy, a tut — 20».

A voś u miasakambinatach upeŭnivajuć, što pastaŭki na Rasiju nie pašyrali, jany navat źmienšylisia. «Pastaŭki kaŭbasnych vyrabaŭ pavialičylisia na Rasiju, a pastaŭki syraviny źmienšylisia. Za paŭhoda pastaŭki pavialičylisia na 30–35%. A pastaŭki syraviny mocna źmienšylisia», — havorać u Barysaŭskim miasakambinacie.

U adździele zbytu miasakambinata havorać, što syroje miasa jany amal nie pradajuć: pierajšli na vyrab hatovaj pradukcyi.
Jano i nie dziŭna, bo na syroje miasa jość ustalavanyja dziaržavaj košty, a na kaŭbasu — nie.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?