Ja zaśpieła žonku eks-kandydata na pasadu prezidenta Dźmitryja Usa Jaŭhieniju ŭ byłym rabočym kabiniecie muža. Ciapier hetaja 24-hadovaja žančyna vykonvaje abaviazki dyrektara firmy «Tryvium». Dźmitryj Us byŭ asudžany na 5,5 hoda kałonii ŭzmocnienaha režymu za «arhanizacyju masavych biesparadkaŭ».

 Fota Siarhieja Hudzilina.

Fota Siarhieja Hudzilina.

— Heta i jość biźnies Dźmitryja Usa?

— Tak. Jon byŭ pieršym biźniesmienam u Biełarusi, jaki pačaŭ vydavać karty aŭtamabilnych daroh. Firma vyrablała hłobusy, atłasy, karty zornaha nieba. Sprava ŭ tym, što Dzima zachaplaŭsia hieahrafijaj. U jaho ž była mahčymaść zaniacca niečym inšym, a jon «upiorsia» ŭ heta i ŭsio. Tady, kali jon byŭ deputatam harsavieta, była mahčymaść vybirać. Niechta skuplaŭ za kapiejki zavody, fabryki, a jon… Tady, darečy, i staŭ cikavicca palitykaj. Dzima byŭ pamočnikam deputata Tarazieviča. Voś adkul jon viedaje Mikołu Statkieviča.

— Jamu padabałasia pracavać deputatam?

— Kaniešnie. Jon uvieś čas sustrakaŭsia ź ludźmi. Jaho akruha ŭ Kurasoŭščynie. Dzima z zadavalnieńniem dapamahaŭ ludziam. Na Novy hod zaŭsiody dasyłaŭ svaim vybarščykam paštoŭki, pryčym nie prosta, a sam prydumlaŭ, jakija jany pavinny być. Voś, naprykład, tut visiać. Bačycie? Ja sama, kali Dzima bałatavaŭsia, chadziła pa kvaterach i źbirała podpisy. Adna žančyna mnie kaža: «Nu voś, jašče adna paštoŭka ad majho lubimaha Usa». Paprostu Dzima nie chacieŭ łatać dzirki ŭ biudžecie. Kali byli tyja vybary, nikoha nie padpuścili nazirać za padlikam hałasoŭ. Stajali filejnymi častkami da nas, ale ja ŭbačyła ŭ dzirku pačak biuleteniaŭ. Mnie potym skazali, što heta byli hałasy za Usa. Ich uziali i pakłali ŭ siaredzinu inšych. Dzima tady vielmi aburaŭsia. Jon tady jašče kazaŭ, što chacieŭ by być tolki deputatam. Prezidenctva jamu było nie patrebna. Jon tolki chacieŭ źmianić vybarčaje zakanadaŭstva, kab nie machlavali. Jon ža kožny hod bałatavaŭsia, a jamu nie davali stać deputatam.

— U Dźmitryja Usa składany los. Pamierła žonka ŭ 2008 hodzie. Da hetaha jon sam pieražyŭ kliničnuju śmierć. Što heta było takoje?

— U druhim kliničnym špitali Dzimu rabili płanavuju apieracyju. Jamu treba było vypravić pieraharodku ŭ nosie. Dali taki narkoz, što jon upaŭ u komu. U takim stanie ŭ jaho šeść razoŭ spyniałasia serca.

Chacieli ŭžo aparat adklučać, ale svajaki nie dali. Jaho žonka Śvieta tady šmat zrabiła, kab jon nie pamior.
Paśla ŭsiaho hetaha Dzima vučyŭsia chadzić, havaryć… U jaho była druhaja hrupa invalidnaści. Jon by i zaraz moh jaje paćvierdzić, ale nie staŭ hetym zajmacca.

U 2008 hodzie Śviatłana była ŭ inicyjatyŭnaj hrupie i źbirała za jaho podpisy. Adnojčy jaje niečym pačastavali, nie pamiataju, moža, heta byli niejkija krevietki… Joj stała kiepska, pačałasia alerhičnaja reakcyja. Śvietu advieźli ŭ toj ža druhi kliničny špital, dzie raniej byŭ Dzima. Tam joj zrabili ŭkoł i adpravili ŭ kalidor. Dzima byŭ razam ź joj, kali jana raptam straciła prytomnaść.

U reanimacyi jaje ŭžo nie vyratavali. Dzima zastaŭsia adzin z synam Ivanam.
Ciapier jamu 14 hadoŭ, vučycca ŭ 8-m kłasie. Siońnia apošni dzień zaniatkaŭ, a potym pajedzie na lecišča da dzieda Ryhora. Heta baćka jaho mamy. U Ivana jość jašče starejšaja siastra Ksienija. Jana dačka Śviatłany ad pieršaha šlubu. U mianie taksama ad pieršaha šlubu dačka. Joj ciapier try z pałovaj hady. Jana i naš ź Dzimam syn Miša, jakomu chutka piać miesiacaŭ, u majoj mamy ŭ vioscy.

— A jak vy paznajomilisia z Usam?

— Ja prychodziła ŭładkoŭvacca na pracu pamočnikam dyrektara ŭ 2008-m. Jon tady mianie nie ŭziaŭ na pracu. Mianie zaprasili tolki praz hod. Była spačatku ŭ inicyjatyŭnaj hrupie, kali jon bałatavaŭsia ŭ deputaty, a potym, kali na pasadu prezidenta. Apošni raz užo była ciažarnaja.

My pabralisia šlubam u listapadzie 2010 hoda.

— Pamiž vybarami znajšłosia miesca dla ramantyki?

— Nie mahu skazać, što była niejkaja ramantyka. Dzima vadziŭ mianie ŭ restarany, ale centnieraŭ kvietak ci tam jašče niečaha, takoha nie było. Jon materyjalist. Kaža adnojčy: «Nu što hetyja kvietki? Voś tabie siertyfikat apłačany, idzi ŭ aŭtaškołu. Treba mieć pravy. A mašynu ja tabie kuplu». Kali Miša naradziŭsia, jon mnie padaryŭ aŭtamabil. Vuń staić maja «Tajota». 27 listapada my raśpisalisia, a na nastupny dzień jon padaryŭ mnie norkavuju futru. Ja nie amatarka hetaha, ale jon ličyć, što jaho žonka pavinna vyhladać prezientabielna. Na dziaciej i na mianie jamu hrošaj nie škada».

— Paśla ahałošvańnia prysudu maci Dźmitryja Usa hučna płakała. Jak vy ŭspryniali ŭsio?

— Skažu ščyra, kali my išli ŭ piatnicu 20-ha, to ja dumała, što jaho pasadziać. Kali ž ubačyła abjavu na dźviarach, što sudździa zachvareła, to abradavałasia, niejkaja nadzieja była, što ŭsio abydziecca. Ja supakoiłasia. Ale Dzima byŭ upeŭnieny, što siadzie za kraty.

Skazaŭ: «Kaniešnie, pasadziać. Ja ž zamachnuŭsia na śviatoje».

Była ja ŭ jaho pazaŭčora na spatkańni. Skazaŭ, što siadzić u kamiery z televizaram i razam ź im jašče troje čamuści z kalkulatarami. Cikava, navošta ŭ turmie kalkulatar? Ale ja nie pra heta. U susiedniaj takoj ža kamiery siadziać 40 čałaviek. Voś heta niejak dziŭna. Tam kiepskaja vada. U Dzimy ad chłorki straŭnik balić. Ja napisała zajavu, kab uziali filtr ad mianie, bo, kali prynosiła, to mnie admovili.

Što ž, pakul mnie zastajecca tolki spadziavacca, što moj muž vyjdzie na volu raniej».
Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?