Redaktaru niezaležnaj hazety «Volny horad» Siarhieju Niaroŭnamu prakuror Kryčaŭskaha rajonu vynies aficyjnaje papiaredžańnie ab niedapuščalnaści parušeńnia zakanadaŭstva, jakoje rehuluje adnosiny ŭ sfery paradku kiravańnia. Nahodaj dla papiaredžańnia staŭ artykuł žurnalista «Čornyja dni». Jon pryśviečany teraktu ŭ Miensku 11 krasavika.
U vinu Siarhieju Niaroŭnamu prakuror Uładzimier Dziubajła vystaviŭ raspaŭsiud u hazecie niepraŭdzivych źviestak pra chod raśśledavańnia teraktu, a taksama infarmacyi, jakaja ŭtrymlivaje paklop i źniavažlivyja vykazvańni na adras kiraŭnikoŭ dziaržaŭnaj ułady. Publikacyja, jak śćviardžajecca ŭ papiaredžańni, skiravanaja na «dyskredytacyju pravaachoŭnych orhanaŭ, biełaruskaj dziaržavy j hramadztva».
Siarhiej Niaroŭny zajaŭlaje, što z papiaredžańniem nie zhadžajecca i budzie jaho abskardžvać u prakurora vobłaści.
«Vidavočna, što prakuror vykonvaje ahulny zahad suprać žurnalistaŭ, jakija sprabujuć aśviatlać chod raśśledavańnia teraktu z usich bakoŭ. My nie rabili numar hazety „kryvavym“, z fatazdymkami achviaraŭ, my prosta vykazali mierkavańnie adnosna zatrymanych, jakich abvinavačvajuć va ŭčynieńni teraktu, kab jany byli sapraŭdy tymi, chto ździejśniŭ złačynstva, a nie čarhovymi „strełačnikami“. My taksama vykazalisia adnosna zajaŭ kiraŭnika dziaržavy pra „piatuju kalonu“. Ličym, što takija zajavy niedapuščalnyja. Ja prakuroru j skazaŭ, što ŭłada vykarystoŭvaje terakt, kab prycisnuć žurnalistaŭ. Pavynosić im ciapier papiaredžańniaŭ, a potym užo vykarystoŭvać heta, kab karać za krytyku miascovaha čynavienstva, nijak nie źviazanuju z teraktam. To bok vykarystoŭvajuć terakt u svaich palityčnych metach», zaznačaje Siarhiej Niaroŭny.
U liście z papiaredžańniem havorycca, što ŭ vypadku paŭtornaha parušeńnia zakanadaŭstva Siarhiej Niaroŭny budzie pryciahnuty da adkaznaści.
