Kanstytucyjny sud Biełarusi 7 krasavik vykłaŭ svaju pazicyju ab adpaviednaści zakona Polščy «Ab karcie palaka» ahulnapryznanym pryncypam i normam mižnarodnaha prava.

Na dumku Kanstytucyjnaha suda, asobnyja normy zakona «Ab karcie palaka» nie adpaviadajuć: ahulnapryznanym pryncypam suvierennaj roŭnaści dziaržaŭ i nieŭmiašańnia ŭ spravy, jakija ŭvachodziać va ŭnutranuju kampietencyju inšaj dziaržavy, što praduhledžanyja ŭ statucie AAN; pałažeńniam Vienskaj kanviencyi ab konsulskich znosinach i Konsulskaj kanviencyi pamiž Respublikaj Biełaruś i Respublikaj Polšča; pałažeńniam Pahadnieńnia pamiž uradami Biełarusi i Polščy ab uzajemnych pajezdkach hramadzian, zaklučanaha šlacham abmienu notami 20 śniežnia 2007 hoda.

Prapanova Kanstytucyjnamu sudu vykłaści pazicyju pa zakonie «Ab karcie palaka» pastupiła ź nižniaj pałaty parłamienta 23 lutaha. Jak zajaviŭ staršynia Pałaty pradstaŭnikoŭ Uładzimir Andrejčanka, rašeńnie Polščy ab vydačy karty palaka «nie adpaviadaje pryncypam dobrasusiedstva, a taksama prachodzić na fonie antybiełaruskaj kampanii ŭ hetaj krainie». Jon taksama padkreśliŭ, što zaraz zajavy polskaha kiraŭnictva «vyznačajucca žorstkaj rytorykaj i nie sadziejničajuć raźvićciu kanstruktyŭnych adnosin pamiž krainami».

Juryst Siarhiej Bałykin upeŭnieny, što vykładańnie sudom svajoj pazicyi «nie budzie mieć nijakich pravavych nastupstvaŭ».
U adpaviednaści z Kanstytucyjaj pravavyja nastupstvy mohuć mieć zaklučeńni Kanstytucyjnaha suda ab adpaviednaści narmatyŭnych pravavych aktaŭ, mižnarodnych dahavoraŭ, u jakija ŭstupiła Biełaruś, Kanstytucyi. «Admianiać ža narmatyŭny akt inšaj dziaržavy biełaruski sud nie maje prava», — skazaŭ Bałykin BiełaPAN.

Nahadajem, karta palaka źjaŭlajecca dakumientam, jaki paćviardžaje prynaležnaść hramadzianina krain SND i Bałtyi da polskaha naroda. Atrymać jaje moža asoba, jakaja vałodaje polskaj movaj na bazavym uzroŭni, maje siaprł svajakoŭ palaka abo taho, chto mieŭ polskaje hramadzianstva (baćka, maci, babula, dziadula, prababula, pradzied). Karta sapraŭdnaja na praciahu 10 hadoŭ z dnia vydačy i pry najaŭnaści adpaviednaj zajavy pradaŭžajecca na nastupnyja 10 hadoŭ.

Uładalnik karty maje prava: atrymać doŭhaterminovuju šmatrazovuju vizu na znachodžańnie ŭ Polščy; lehalna pracavać na terytoryi Polščy biez atrymańnia dazvołu na pracu; zajmacca pradprymalnickaj dziejnaściu naroŭni z polskimi hramadzianami; u pieršačarhovym paradku pretendavać na finansavyja srodki, jakija vydzialajucca dla padtrymki palakaŭ za miažoj ź dziaržaŭnaha ci miascovaha biudžetu (na ŭzroŭni hminy); prajazdžać pa čyhuncy z 37-pracentnaj skidkaj.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?