Viciebski aktyvist Kansiervatyŭna-chryścijanskaj partyi — BNF Siarhiej Kavalenka prypyniŭ haładoŭku pratestu, abjaŭlenuju 25 sakavika.

Jak paviedamlajuć pravaabaroncy, Kavalenka ciapier znachodzicca na lačeńni ŭ kardyjałahičnym adździaleńni viciebskaj haradskoj balnicy № 1, kudy trapiŭ paśla 10-dzionnaj haładoŭki ŭ izalatary časovaha ŭtrymańnia. Paśla vypiski z balnicy jon pavinien viarnucca i adbyć aryšt da kanca. Tady, pavodle słoŭ Kavalenki, haładoŭka budzie adnoŭlena.

Pavodle infarmacyi pravaabaroncaŭ, viciebski demakratyčny aktyvist Barys Chamajda nakiravaŭ zvarot da prakurora Viciebskaj vobłaści, patrabujučy spynić praśledavańnie aktyvista, jaki «maje na mecie padarvać zdaroŭje čałavieka, złamać jaho jak asobu, nanieści ŭron ciažarnaj žoncy i šaścihadovamu synu».

Jak paviedamlaŭ BiełaPAN, Kavalenka byŭ zatrymany 24 sakavika, kali pryjšoŭ da budynka miascovaj administracyi z tryma vialikimi bieł-čyrvona-biełymi ściahami, kožny ź jakich byŭ prykładna paŭtara na try mietry. Jon pačaŭ razmachvać imi i vykrykvać patryjatyčnyja łozunhi. Akcyja doŭžyłasia kala 20 chvilin, paśla čaho apazicyjaniera zatrymali.

25 sakavika jon byŭ pryhavorany da siami sutak administracyjnaha aryštu. U znak pratestu apazicyjanier abjaviŭ haładoŭku i haładaŭ usie siem dzion znachodžańnia ŭ izalatary časovaha ŭtrymańnia.

Kavalenka vyjšaŭ na volu 1 krasavika i, pavodle infarmacyi pravaabaroncaŭ, praź piać chvilin znoŭ byŭ zatrymany. Na jaho skłali novy pratakoł — za parušeńnie režymu adbyvańnia ŭmoŭnaha pakarańnia, jakoje jamu prysudzili ŭ mai minułaha hoda za vyviešvańnie bieł-čyrvona-biełaha ściaha na navahodniaj jołcy 7 studzienia 2010 hoda.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?