Vydańnie śćviardžaje, što jaho žurnalist razmaŭlaŭ z adnym ź biełaruskich «najomnikaŭ». Toj usio jašče znachodzicca ŭ Livii, ź im źviazvalisia praz telefon ź livijskim numaram. Biełaruskaje MZS: abo žoŭtaja presa zarablaje na lehkaviernaści, abo akcyja pa dyskredytacyi Biełarusi.

Aficer paćvierdziŭ, što zavierbavaŭsia pa kantrakcie, ale pryvatna, nie pa linii biełaruskaha Minabarony. Zarablaje jon kala 3000 dalaraŭ za miesiac.

Sa słovaŭ Michaiła, jak jon pradstaviŭsia, u Livii niekalki socień vajskovych śpiecyjalistaŭ ź Biełarusi. Jon raskazaŭ, što daradcy nie biaruć udziełu ŭ bajavych dziejańniach suprać paŭstancaŭ, ale ŭvieś čas znachodziacca na bajavych pazicyjach.

Da pačatku paŭstańnia ŭ Livii biełaruskija śpiecyjalisty zajmalisia ekspłuatacyjaj vajskovaj techniki, vykonvali abaviazki daradcaŭ kamandziraŭ livijskich vajskovych častak. U pryvatnaści, pavodle źviestak haziety, u Livii pracavała šmat aficeraŭ vajskovaha śpiecnaza, dysłakavanaha ŭ Marjinaj Horcy pad Minskam. Usie jany zaklučali indyvidualnyja kantrakty ź livijskimi ŭładami.

Častka ź ich, u asnoŭnym vysokapastaŭlenyja vajskoŭcy, byli evakujavanyja ź Livii na samalotach ŭ Miensk. Pra heta «Komsomolskoj pravdie» aficyjna paviedamiŭ daradca ambasady Biełarusi ŭ Trypali Hieorhij Hramyka. Jon ža skazaŭ, što nie viedaje dakładnaj kolkaści hramadzian Biełarusi, jakija zastalisia ŭ Livii. Vierahodna, što siarod ich jość i vajskovyja śpiecyjalisty, dadaje ŭ hetym miescy rasijskaje vydańnie.

U Livii pracavali taksama šmatlikija biełaruskija daktary, lotčyki, naftaviki. Zarobki ŭ bahataj na naftu Livii našmat vyšejšyja za biełaruskija.

Pakul nie było infarmacyi, što niechta z hramadzian Biełarusi zahinuŭ tam.
Jak viadoma, u siaredzinie lutaha ŭ Livii ŭspychnuła narodnaje paŭstańnie suprać dyktatara Kadafi, jakija kiruje krainaj užo 42 hady. U siaredzinie sakavika AAN dazvoliła vajennaje ŭmiašalnictva mižnarodnaj supolnaści Livii. Heta adbyłosia paśla taho, jak Kadafi abrynuŭ na paŭstancaŭ škvał ahniu.

Rasijskaja hazieta śćviardžaje, što ŭ Livii rasijskich i ŭkrainskich daradcaŭ ciapier niama, pracujuć tolki biełarusy. Adnak jana nie pryvodzić nijakich dakumientalnych paćvierdžańniaŭ svaim słovam.

Livija addaŭna rabiła staŭku na zamiežnych vajskovych daradcaŭ dla ŭzmacnieńnia svaich uzbrojenych siłaŭ. Pra supracu SSSR z Kadafi padrabiazna raskazaŭ były načalnik upraŭleńnia zamiežnaha supracoŭnictva hienštaba Uzbrojenych siłaŭ Rasii hienierał-lejtenant Leanid Ivašoŭ.

U Hiermanii niadaŭna razhareŭsia skandał, bo stała viadoma, što kala tryccaci aficeraŭ śpiecnaza treniravali livijskich kaleh u 2006—2007 hadach.
Jany pakvapilisia na zaniabiesnyja zarobki i jeździli ŭ livijskija kamandziroŭki, nie staviačy ŭ viadomaść svajo načalstva.

Na dumku Leanida Ivašova, Kadafi admysłova supracoŭničaŭ z roznymi krainami, kab nie składać jajek u adzin košyk. Ivašoŭ nievysoka aceńvaje bajazdolnaść livijskaj armii. Na jahonuju dumku, jak struktura vojska, tak i formy jaho padrychtoŭki vybiralisia takim čynam, kab nie isnavała mahčymaści ŭźniknieńnia mocnaj apazicyi Kadafi ŭ vojsku, kab vojska zastavałasia nieskaardynavanym i padzielenym.

Paźniej u sieradu pres-sakratar MZS Biełarusi Andrej Savinych u rezkich vyrazach abvierh publikacyju «Kamsamołki». «Vajskovych śpiecyjalistaŭ u Livii niama i być nie moža. Naiŭna mierkavać inšaje, — skazaŭ jon. — Hutarka z supracoŭnikam pasolstva Biełarusi ŭ Livii całkam sfalsifikavana. Hety, z dazvołu skazać, žurnalist, adsutnaść prafiesijnaj etyki jakoha vidavočnaja, telefanavaŭ u ambasadu z pytańniami ab biełaruskich miedykach, što adjazdžali, — patłumačyŭ Savinych. — Źjaŭleńnie takoha artykuła možna razhladać jak žadańnie žoŭtaj presy zarabić na lehkaviernaści čytačoŭ. Albo my sutyknulisia z čarhovaj akcyjaj pa dyskredytacyi Respubliki Biełaruś».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?