Biełarusku Sofju Hrojsman (u dziavoctvie — Chodaš) ličać najlepšym nosam ZŠA. Stvaralnica kultavych vodaraŭ, takich jak Tresor ad Lancome i Eternity ad Calvin Klein, naradziłasia pad Navahrudkam u siamji partyzana. Znajomimsia z adnoj z samych upłyvovych asobaŭ u parfumiernym śviecie bližej.

Sofja Hrojsman — adzin z najlepšych nasoŭ śvietu.

Sofja Hrojsman — adzin z najlepšych nasoŭ śvietu.

So'fja Hrojsman z baćkami.

So'fja Hrojsman z baćkami.

Parfumier Hrojsman — ścipłaja ŭ pobycie žančyna.

Parfumier Hrojsman — ścipłaja ŭ pobycie žančyna.

Zosia Hrojsman naradziłasia 8 sakavika 1945 u Lubčy pad Navahrudkam. Baćka dziaŭčynki, Piatro Chodaš, byŭ u partyzanach. Kali dziaŭčyncy spoŭniłasia 15 hadoŭ, siamja pierajechała ŭ Polšču. Tady mnohija biełaruskija kataliki tak uciakali z savieckaha raju. U Polščy ŭsio ž žyłosia svabadniej. Tam dziaŭčyna pačała vyvučać niearhaničnuju i analityčnuju chimiju. Tam ža atrymała stupień bakałaŭra.

Krychu paźniej Chodašy pierabralisia ŭ ZŠA. Zaprašeńnie było atrymana ad habrejskaj siamji, jakuju vyratavaŭ padčas fašysckaj akupacyi baćka Sofji.

Jak paviedamlajuć šmatlikija krynicy, Sofja Hrojsman vielmi ścipłaja. Jana nie lubić publičnych ŭschvaleńniaŭ i kamplimientaŭ. I, u cełym, nie vyhladaje jak vielmi zabiaśpiečanaja žančyna, jakaja žyvie ŭ prestyžnym rajonie Manchetena. Adznačajecca, što hety zapatrabavany parfumier zaŭsiody nosić modnuju, ale prostuju i zručnuju vopratku i abutak.

Razam z tym, Hrojsman atrymała šmatlikija prestyžnyja ŭznaharody za pieramohi ŭ mižnarodnych konkursach parfumiernaj industryi. Jaje vinšavali hałoŭnyja parfumiernyja dyzajniery ZŠA, Kanady, Jeŭropy. Ź joj kansultavalisia, u jaje sprabavali vyznać sakrety, a Lancome da hetaha času nie hublaje nadziei pieravabić Sofju ŭ Paryž nazaŭždy.

«Ja vielmi lublu i pavažaju svajho baćku. Jon byŭ sumlennym i biasstrašnym čałaviekam. Jon vielmi mocna nas lubiŭ. Ja pamiataju jaho vočy, kali mnie ŭručali premiju Living Legend Award ad Amierykanskaha tavarystva parfumieraŭ. Jon byŭ absalutna ščaślivy», — uspaminaje Safija.

Hrojsman ŭ parfumiernym śviecie nazyvajuć adnym z tytanaŭ. Kožny z nas viedaje jaje parfumy. Niekatoryja ź ich źjaŭlajucca simvałami epochi i vyklikajuć u našaj pamiaci darahija sercu ŭspaminy: Lancome Tresor, Bvlgari Pour Femme, Calvin Klein Eternity, Estee Lauder White Linen, Yves Saint Laurent Paris i mnohija inšyja.

U Safii Hrojsman — unikalny niuch. Jaje duchi Tresor pa kolkaści prodažaŭ pierasiahnuli CHANEL № 5.
Jana stvarała parfumu i adekałony dla mnohich znakamitych ludziej. U šmatlikich artykułach zhadvajecca, što siarod zamoŭcaŭ byli Elizabet Tejłar, Łora Buš, Kielvin Klajn i… Alaksandr Łukašenka.

Da niadaŭniaha času Safija Hrojsman pracavała vice-prezidentam parfumiernaj firmy International Flavors and Fragrances (IFF). Hetaja kampanija isnuje ŭžo 32 hady i karystajecca reputacyjaj lidara rynku. Ciapier Safija ličycca piensijanieram i pracuje starejšym kansultantam pa śpiecyjalnych prajektach IFF. Niekalki hadoŭ tamu na pytańnie pra toje, što daje joj tvorčyja siły, jana adkazała žurnalistu, pakazvajučy na vielizarny kałaž z fotazdymkami dziaciej — ułasnych i siabroŭ: «Ja pierš za ŭsio maci, u hetym majo natchnieńnie».

Jaje vodary takija ž mocnyja, jak i ich stvaralnica: «Ja nie lublu vykarystoŭvać mužčynskija inhredyjenty ŭ žanočych vodarach. Ja stamiłasia ad limonaŭ i azonu. Jany simvalizujuć chutčej čyściniu, čym pačućciovaść. Takija inhredyjenty dobryja dla bializny ci aśviažalnika pavietra. U maich vodarach im nie miesca. Ja chaču, kab vy całkam adčuvali siabie žančynaj!».

Lubimaja kvietka Hrojsman — ruža. Moža, tamu Sofju ŭ parfumiernym biznesie nazyvajuć «karalevaj ružy».

— Kali nie sakret, kolki fłakonaŭ zvyčajna staić na vašym tualetnym stoliku?

— Na maim stoliku naohuł ničoha nie staić. A kali surjozna, to štodnia ja zvyčajna karystajusia roznymi «ekśpierymientami». U zaležnaści ad pary hoda i nastroju ja taksama vykarystoŭvaju «staryja» vodary. Žurnalisty časta pytajuć mianie, jakaja stvoranaja mnoj parfuma samaja lubimaja. Ja adkazvaju, što ŭ mianie niama lubimych: parfumy jak dzieci, siarod ich niama nielubimych. Choć časta sustrakajucca tak zvanyja ciažkija padletki: heta parfumy, z zamoŭcami jakich u mianie składvalisia davoli składanyja adnosiny.

— Ci praŭda, što ŭ svaich miemuarach vy źbirajeciesia nazvać viadomyja parfumy, što byli stvoranyja vami, ale prypisanyja sabie inšymi ludźmi?

— Upeŭnienaja, što hetaja kniha stanie bestseleram.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?