Sudździa suda Leninskaha rajona Mahilova Andrej Jurčanka 5 krasavika pryznaŭ pravamiernymi papiaredžańnie KDB, vyniesienaje aktyvistcy apazicyi Taćcianie Šambałavaj, i pastanoŭku jaje na prafiłaktyčny ŭlik.

Jak raniej paviedamlałasia, Šambałava była pastaŭlenaja na prafiłaktyčny ŭlik 9 lutaha. Joj było ŭručana aficyjnaje papiaredžańnie za dziejnaść u składzie nie zarehistravanaj va ŭstanoŭlenym paradku partyi «Biełaruskaja chryścijanskaja demakratyja» i ŭdzieł u niesakcyjanavanaj akcyi ŭ Minsku 19 śniežnia 2010 hoda, što, na dumku supracoŭnikaŭ KDB, moža pryvieści da ŭčynieńnia złačynstvaŭ, praduhledžanych adpaviednymi artykułami KK -193-1 i 293. Paźniej Šambałava padała ŭ sud skarhu na dziejańni supracoŭnikaŭ UKDB pa Mahiloŭskaj vobłaści.

U sudzie Šambałava i jaje pradstaŭnik Barys Buchiel zajavili, što supracoŭnik KDB Andrej Machunoŭ biespadstaŭna nazvaŭ jaje «kiraŭnikom haradskoha adździaleńnia partyi BCHD». «Hetyja śćviardžeńni nie adpaviadajuć rečaisnaści i źjaŭlajucca nieabhruntavanymi i padmannymi vydumkami, tamu što takoj partyi ŭ Respublicy Biełaruś nie isnuje. Na samaj spravie ja źjaŭlajusia mahiloŭskim kaardynataram arhanizacyjnaha kamiteta pa stvareńni partyi BCHD i jaje zasnavalnikam», — zaznačyła Šambałava.

Aktyvistka apazicyi ličyć, što joj nielha stavić u vinu fakt adnarazovaj prysutnaści 19 śniežnia ŭ Minsku na niesankcyjanavanym mierapryjemstvie, za jakoje jana paniesła administracyjnaje pakarańnie, chacia nijakaha ŭdziełu ŭ masavych biesparadkach nie prymała.

Barys Buchiel taksama zajaŭlaŭ, što UKDB vyjšła za miežy svaich paŭnamoctvaŭ, vynosiačy papiaredžańnie pa artykułach, pa jakich sprava raspačynałasia inšymi pravaachoŭnymi orhanami.

Pradstaŭnik UKDB Dźmitryj Arcykaŭ, jaki prysutničaŭ na sudzie, śćviardžaŭ, što vyniesienaje papiaredžańnie i pastanoŭka na prafiłaktyčny ŭlik absalutna pravamiernyja.

Pry razhladzie spravy sudździa Jurčanka braŭ pad uvahu taksama pradastaŭlenyja UKDB razdrukoŭki ananimnych kamientaryjaŭ i navinovych zamietak ź internetu, dzie Šambałava nazyvałasia «pradstaŭnikom BCHD». U vyniku byŭ vyniesieny vierdykt — u zadavalnieńni skarhi na UKDB pa Mahiloŭskaj vobłaści admović.

Jak paviedamiła Taćciana Šambałava, jana maje namier abskardzić hetaje rašeńnie suda.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?