5 krasavika šerah polskich ŚMI paviedamiŭ, što vystup «Svabodnaha teatra» ŭ Varšavie, zapłanavany na maj, admianiajecca
. Pryčynaj było nazvana toje, što Mikałaj Chalezin razam z paplečnikami da kanca viasny maje vyrašyć pytańnie z pravavymi padstavami dla znachodžańnia ŭ adnoj z krain Zachadu.

Paśla źjaŭleńnia na nn.by pieradruku z polskich krynic, jakija nam padalisia nadziejnymi, sam dramaturh u svaim błohu abvierh infarmacyju ab tym, što kiraŭnictva «Svabodnaha teatra» paprasiła palityčnaha prytułku ŭ ZŠA. (Heta vynikała z paviedamleńnia ahienctva PAP.)

Paźniej M.Chalezin u razmovie z karespandentam «NN» zaznačyŭ, što hetaha nie moža być chacia b tamu, što jon ciapier znachodzicca ŭ Łondanie.

«Kali my paprasili palityčnaha prytułku ŭ ZŠA, to pavinny tam znachodzicca — heta azbuka.
U nas chutka sustrečy ŭ MZS, śpiektakl ŭ brytanskim parłamiencie. Kali ludzi prymajuć rašeńnie prasić palityčnaha prytułku ŭ niejkaj krainie, to jany pavinny tam znachodzicca», — paviedamiŭ dramaturh. Razam z tym, M.Chalezin zaznačyŭ, što nie vyklučaje vierahodnaści atrymańnia statusu ŭciekača na Zachadzie:
«U žyćci ŭsio moža zdarycca — zarakacca nie varta. Ciapier nam paviedamlajuć, što my źjaŭlajemsia fihurantami kryminalnaj spravy i nam pahražaje pakarańnie ad 5 da 15 hadoŭ».
U suviazi z hetym kiraŭnik «Svabodnaha teatru» kaža, što «pytańnie našaha viartańnia ŭ Biełaruś — heta chutčej pytańnie da ŭładaŭ».

Nahadajem, što Mikałaj Chalezin razam sa svajoj žonkaj Natallaj Kaladoj byli ciesna źviazanyja sa štabam kandydata Andreja Sańnikava. Paśla Płoščy jany źjechali ź Biełarusi i z taho času znachodziacca za miažoj.

U Varšavie vystup Svabodnaha teatra, jaki pavinien byŭ adbycca na scenie Teatra Polskaha, admienieny. Svabodny teatr płanavaŭ pakazać u varšaŭskim Teatry Polskim svoj śpiektakl «Pakaleńnie jeans». Premjera mieła adbycca 14 maja.

Kiraŭniki Svabodnaha teatra ŭ liście da dyrektara polskaj sceny Andžeja Severyna napisali, što, «niahledziačy na prablemy j pieraškody, śpiektakl abaviazkova pakažuć ŭ nastupnym siezonie». «Dla nas heta sprava honaru», napisali ŭ liście Mikałaj Chalezin j Natalla Kalada.

Chalezinu i Kaladzie, mahčyma, pahražaŭ aryšt u Biełarusi, bo jany brali aktyŭny ŭdzieł u Płoščy. 19 śniežnia Kalada vystupiła z trybuny mitynhu i publična hańbiła amonaŭcaŭ, zapisy čaho demanstravali na BT.

* * *

«NN» pieraprašaje Mikałaja Chalezina i Natallu Kaladu za źjaŭleńnie niedakładnaj infarmacyi pra ich. Zyčym im tvorčych udač, a taksama najchutčejšaha vyrašeńnia pravavych kalizij.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?