Rasiejcy krali mašyny ź biełaruskich sałonaŭ prakatu 8

U Partyzanskim RUUS Minska raspačata kryminalnaja sprava za machlarstva ŭ asabliva bujnym pamiery (č. 4 art. 209 KK) u dačynieńni da hrupy hramadzian Rasii. Jany padazrajucca ŭ kradziažy darahich aŭtamašyn ź minskich sałonaŭ prakatu.

Jak paviedamili ŭ adździele infarmacyi i hramadskich suviaziaŭ HUUS Minharvykankama, čaćviora maładych rasijan, pryjechaŭšy ŭ Minsk, źniali numar u haścinicy, dzie i zarehistravalisia (najaŭnaść rehistracyi źjaŭlajecca adnoj z umoŭ arendy). Skončyŭšy z farmalnaściami, jany nakiravalisia ŭ adzin z sałonaŭ prakatu aŭtamabilaŭ.

Rasijan cikaviła «BMV Ch-5», ale ŭ toj čas takoj madeli ŭ sałonie nie było, tamu im prapanavali «Miersiedes-Bienc S500». Maładyja ludzi pahadzilisia. Pryčym dla afarmleńnia dahavora padali, jak paźniej vyśvietliłasia, padroblenyja dakumienty (falšyŭki byli dobraj jakaści i nie vyklikali padazreńnia u rabotnikaŭ sałona). Zapłaciŭšy naležnyja za adnadzionnuju arendu 130 dołaraŭ, machlary terminova vyjechali ŭ Rasiju.

U Maskvie aŭtamašynu, chutčej za ŭsio, užo čakali. «Miersiedes» praktyčna adrazu ž byŭ pradadzieny za 6 tysiač dołaraŭ, što ŭ piać razoŭ nižej za jaho realny košt.

Nastupnym razam maładyja ludzi, pryjechaŭšy ŭ Minsk užo ŭtroch, vyrašyli ŭziać naprakat adrazu dźvie mašyny. Dziejničali pavodle aprabavanaj schiemy, ale na vychadzie z aŭtasałona ich zatrymała milicyja. Čaćviorty ŭdzielnik złačynnaj hrupy abjaŭleny ŭ vyšuk.

Za ŭčynienaje złačynstva rasijanam pahražaje da 10 hadoŭ pazbaŭleńnia voli z kanfiskacyjaj majomaści.

Viačasłaŭ Budkievič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH