Žonka Sidorskaha abrała «Čyrvonuju sukienku» 6

Dniami ŭ restaranie Piaffer sabralisia ŭ čyrvonych uborach adny z samych pryhožych žančyn krainy. Na impravizavanym podyumie, dzie ŭ roli madelaŭ vystupili miedyjnyja piersony, pa kolkaści avacyj Sašu Paŭłavu abahnała Eleanora Jazierskaja. Pad achi-ŭzdychi mužčyn, jakija dapaŭniajuć hety kvietnik, u Biełarusi prajšła pieršaja dabračynnaja akcyja «Čyrvonaja sukienka».

Ludmiła Sidorskaja (źleva) i šef-redaktarka «ŽŽ» Julija Darafiejeva.

Eleanora Jazierskaja.

Ina Afanaśjeva.

Alena Hryšanava i salist hurtu «Koler ałoe» Siarhiej Łapkoŭski.

Bolšaść hetych žančyn — čalcy Mižnarodnaha kłuba žonak dypłamataŭ

Nina Bahdanava.

Iskui Abalan.

Iryna Vidava.

Šoumen Jaŭhien Bułka.

Maryja Lemiešava, Saša Paŭłava i Halina Šyškova.

Iryna Chanunik-Rambalskaja.

Śpiavak Saša Nema.

Naohuł, heta dabračynnaje mierapryjemstva startavała ŭ Vialikim Jabłyku ŭ 2002 hodzie, i z tych časoŭ štohod prachodzić pierad pačatkam Mercedes-Benz Fashion Week. U miežach The Heart Truth Red Dress Collection zorki šou-biznesu demanstrujuć čyrvonyja sukienki, pašytyja roznymi dyzajnierami, z metaj pryciahnuć uvahu žančyn da zachvorvańniaŭ sardečna-sasudzistaj sistemy. Adsiul i vybar kalarovaj hamy strojaŭ na podyumie. Da prykładu, u hetym hodzie, u lutym, u Ńju-Jorku defilavali Chajdzi Kłum, Kim Kardašjan, Džoan Kolinz, Fielisici Chafman i inšyja sielebryci.

Z časam akcyja zrabiłasia hłabalnaj, i siońnia jana prachodzić u mnohich suśvietnych stalicach. Dałučyłasia da jaje i Biełaruś. Pakul nie zusim pa farmacie, bo tradycyjna defile prachodzić u ramkach «modnych tydniaŭ» i, adpaviedna, ź nievialikim spaźnieńniem.

Takim čynam, dabračynnaja akcyja Red Dress Collection była sumieščanaja sa śviatkavańniem 11-hodździa žanočaha časopisa «ŽŽ». Niahledziačy na pieršyja śniežnyja zavały, u restaranie «Piaffer», jaki znachodzicca daloka nie ŭ centry Minska, jabłyku nie było dzie ŭpaści.

Šmatlikija damy, choć u dres-kodzie i nie było prapisana być u čyrvonym, padtrymali ideju i źjavilisia chto va uborach hetaha koleru, chto choć by z punsovymi aksesuarami.

Niačasta ŭ adnym miescy sustrenieš stolki žonak biełaruskich dypłamataŭ, a taksama žonku prem'jer-ministra Ludmiłu Sidorskuju (mnohija nie viedali, što jana tam prysutničaje, a tym bolš — jak vyhladaje), razam ź viadomymi asobami, jakija časta źjaŭlajucca ŭ efiry nacyjanalnych telekanałaŭ.

Ubaku krasunia madelnaha vyhladu pradavała znački z vyjavaj serca pa canie 50 tysiač za štuku. U mnohich prysutnych nieŭzabavie takija ž krasavalisia na bačnym miescy — kuplali. Taksama prapanoŭvałasia zapisać numar rachunku dabračynnaha fondu «Šaniec». Było ahučana, što srodki ź pieršaj akcyi, a taksama pieraličanyja na hety kont, pojduć na apieracyju chvoramu chłopčyku Vaniu.

Hości čakali prahramu, dzie samym čakanym byŭ vychad na impravizavany podyum «zorak» biełaruskaha šoubizu i telebačańnia. Źjaviŭšysia, tyja sarvali-taki avacyi zały, ale ŭsich pieraplunuła (navat seks-bombu ANT Sašu Paŭłavu) tieledziva Eleanora Jazierskaja.

— Voś heta efiektny vychad, — kamientavaŭ znajomamu jaje źjaŭleńnie ŭ zale Dzianis Kurjan.

Udzielnicy ŭ čyrvonych sukienkach, mnohija ź jakich byli z kalekcyi biełaruskaha dyzajniera Łarysy Bałunovaj (ale niekatoryja i ŭ svaich, tamu što ŭsio-tki madelnuju fihuru maje nie kožnaja), vychodzili pad ułasnyja chity. Charakterna, što pakaz adkryvała Iryna Darafiejeva.

Što pryvabiła ŭ hetaj akcyi Ludmiłu Sidorskuju

Z hetym pytańniem karespandent «Salidarnaści» źviarnułasia da žonki prem'jer-ministra.

— Hetaje dabračynnaje mierapryjemstva ŭpieršyniu startavała ŭ ZŠA, dzie vielmi šmat poŭnych dziaciej, i jano pavinna dapamahać dzieciam z roznymi sardečna-sasudzistymi zachvorvańniami. Hetaja ideja pačynaje ažyvać i ŭ nas. I heta vielmi dobra. Dumaju, što ŭ nastupnym hodzie, kali dziaŭčaty buduć arhanizoŭvać heta mierapryjemstva, źbiarecca vielmi šmat ludziej, jakija zachočuć i paŭdzielničać u im, i dapamahčy dzieciam. Ja liču, što hetaja akcyja abaviazkova budzie žyć.

— Nakolki Vy siońnia hatovyja paŭdzielničać?

— Voś ciapier pajdu kuplu značak. Taksama pierapišu numar rachunku, stvoranaha dla pieravodu hrošaj na apieracyju hetamu chłopčyku. U mianie šmat siabroŭ i znajomych, jakija zajmajucca dabračynnaściu. Ja budu abmiarkoŭvać z kiraŭnikom fondu «Šaniec» hetuju temu, bo, mahčyma, lepš kupić kłapan i zrabić apieracyju ŭ Biełarusi — budzie tańniej.

— Naohuł, niačasta adnu ź pieršych łedzi krainy sustrenieš na takich mierapryjemstvach. Nakolki aktyŭna vy žyviacie śvieckim žyćciom?

— Ja naviedvaju mierapryjemstvy, źviazanyja z dabračynnaściu — dapamohaj dzieciam, i modaj. Za miažu na modnyja pakazy pakul nie vyjazdžała. Liču, što siońnia i ŭ nas samich žyćcio viruje. Mienavita modnaje žyćcio. Naviedvać usie modnyja tusoŭki — času nie chopić! Tak što na takija mierapryjemstvy chadžu vybiralna. Naviedvała našu BFW, kuryruju «Młyn mody», siabruju ź Biełaruskim centram mody.

— Adzieńniu jakich dyzajnieraŭ addajacie pieravahu?

— U mianie jość svoj styl. Ale ja nie haniajusia za brendami i imionami. Vybiraju rečy, jakija mnie padabajucca. Mahu ich dapoŭnić. I tady našu z zadavalnieńniem.

— Ale kaho-niebudź ź biełaruskich dyzajnieraŭ možacie vyłučyć?

— Ja šyła niekatoryja rečy ŭ Ludmiły Łabkovaj. Jana mnie padabajecca svaim padychodam, jakaściu vyrabaŭ, plus jana ź pieršaha našaha znajomstva złaviła moj styl.

— Nie mahu nie zakranuć temy vybaraŭ, palityčnaje žyćcio viruje…

— Vy ž viedajecie, ja pa-za palitykaj.

0

0

0

0

0

0

Salidarnaść

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH