Jak paviedamlaje aficyjny sajt Respublikanskaha centra hihijeny, epidemijałohii i hramadskaha zdaroŭja, pa stanie na 30 červienia vyniesieny pastanovy ab zabaronie kupańnia ŭ čatyroch vadajomach i plažach Bresckaj vobłaści — zona adpačynku voziera Kaciera Kamianieckaha rajona, plaž raki Lasnaja ŭ Kamiancy, vadajom azdaraŭlenčaha łahiera «Čajka» Lachavickaha rajona, miesca adpačynku kala vady vioski Alšany Stolinskaha rajona.

U Viciebskaj vobłaści zabarona na kupańnie raspaŭsiudžvajecca na čatyry zony adpačynku Połackaha rajona: azioraŭ Janava, Ščaty, Homiel, Suja.

U Homielskaj vobłaści zakrytyja 12 zon adpačynku: kala vadajomaŭ Buda‑Kašaloŭskaha rajona nasielenych punktaŭ Kamunar, Duravičy, Kryŭsk, Kašalova, Čyrvonaje Znamia, Patapaŭka, a taksama zony adpačynku ŭ haradskim parku «Pieramoha» horada Kalinkavičy, na voziery «Kamaryna» horada Rahačova, na race Dniapro ŭ druhim mikrarajonie Rahačova, a taksama ŭ rajonie ratavalnaj stancyi Rahačoŭskaha rajona, plažy «Kamiaha» i «Haradski» Dobruša na race Ipuć.

U Mahilovie zakrytaja zona adpačynku haradskoha plaža na race Dniapro.

Zabarona na kupańnie vyniesiena z‑za nieadpaviednaści adabranych prob vady pa mikrabijałahičnych pakazčykach. Vyklučeńnie składajuć zony adpačynku ŭ Buda‑Kašaloŭskim rajonie, dzie adsutničaje adpaviednaje ŭładkavańnie plaža, a taksama plažy «Kamiaha» i «Haradski» ŭ Dobrušy na race Ipuć, zakrytyja z‑za pačatku rabot pa ačystcy i pahłybleńni raki.

Sanitarnyja praviły vyznačajuć dapuščalny narmatyŭ utrymańnia ŭ vadzie vadajomaŭ bakteryj hrupy kišečnaj pałački. Aprača taho, vada nie pavinna ŭtrymlivać uzbudžalnikaŭ zachvorvańniaŭ, žyćciazdolnych jajek hielmintaŭ. Na pavierchni vadajoma nie pavinna być płavalnych plonak, plamaŭ minieralnych masieł i vialikaj kolkaści inšych prymiesiaŭ. Vada nie pavinna mieć nieŭłaścivych joj pachaŭ, utrymańnie chimičnych rečyvaŭ nie pavinna pieravyšać miežava dapuščalnych kancentracyj.

U kupalny siezon u miescach masavaha adpačynku vada rehularna daśledujecca na ŭtrymańnie bakteryj. Pry atrymańni dvuch paśladoŭnych niezdavalniajučych vynikaŭ analizaŭ vady vadajom zabaraniajecca vykarystoŭvać dla kupańnia. Kali ŭ dalejšym atrymlivajucca dva paśladoŭnyja zdavalniajučyja vyniki analizu vady, vadajom znoŭ dazvalajuć vykarystoŭvać dla kupańnia i zaniatkaŭ vodnymi vidami sportu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?