Lider kampanii «Havary praŭdu» Uładzimira Niaklajeva čarhovy raz naviedaŭ Barysaŭ. Na ŭjeździe ŭ horad mašynu U.Niaklajeva zasiakli adrazu dva pasty DAI, jakija krychu spaźnilisia z zatrymańniem aŭtamabila. U.Niaklajeŭ pierasieŭ u mašynu arhanizataraŭ, a jahonuju mašynu litaralna praź piać chvilinaŭ spyniła DAI.
«Padobnaja mašyna siońnia z ranicy znachodzicca ŭ vyšuku, tamu prajedźcie za nami», — zapatrabavaŭ daišnik.
Zatrymali mašynu Uładzimira Niaklajeva ŭ 11.30, a z Barysaŭskaha RUUS vypuścili tolki ŭ 15.30.
Mašyna znachodzicca ŭ vyšuku — takoj viersii milicyjanty prytrymlivalisia da apošniaha. Vyklikali navat kryminalista, jakija źviarali numary mašyny. Dapytali ŭsich troch čałaviek, jakija znachodzilisia ŭ aŭtamabili. Kali vyjechali ź Minska, ci daŭno znajomyja z vadzicielem, pry jakich abstavinach paznajomilisia, chto jechaŭ u mašynie — voś takija pytańni hučali na dopytach.
U vyniku ŭ vadziciela aŭtamabila ŭziali adbitki palcaŭ, źniali ŭ profil i ŭ anfas, a paśla adpuścili.
Adnak sustreču Uładzimira Niaklajeva z barysaŭčanami sarvać nie ŭdałosia. — usio prajšło pa płanu. Pabyvaŭ paet u sumna viadomych Dymkach, dzie pastajanna zataplivaje chaty; sustreŭsia z žycharami, jakija pratestujuć suprać budaŭnictva aŭtazapravačnaj stancyi; pabyvaŭ na rynku, dzie, pa tradycyi, pradprymalniki skardzilisia na niepamiernuju arendnuju płatu; pieradali podpisy barysaŭčan za vyrašeńnie mnohich miascovych prablem.
