Rasijski prajekt, pavodle jakoha budzie budavacca biełaruskaja AES, nadzvyčaj nadziejny, adznačyŭ siońnia na sumiesnym pasiadžeńni pałat Nacyjanalnaha schodu pieršy namieśnik premjer‑ministra Biełarusi Uładzimir Siamaška.
«U paraŭnańni z ČAES, rasijski prajekt u tysiaču razoŭ źnižaje vierahodnaść ŭźniknieńnia samaj maleńkaj avaryi»,
— skazaŭ Siamaška. Jon adznačyŭ, što pa rasijskim prajekcie ŭzvodziać AES Bałharyja, Słavakija, Kitaj. Pry hetym pieršy vice‑premjer zaznačyŭ, što, navat vybirajučy siarod kampanij, jakija ŭzvodziać AES u śviecie, a takich niašmat — kala piaci, pradstaŭniki hetych kampanij kazali, što Biełaruś całkam moža vybrać rasijski prajekt.
Uładzimir Siamaška nie ličyć, što Biełaruś trapić u zaležnaść ad Rasii z‑za pastavak ŭranavaha paliva dla AES.
«Pa‑pieršaje, zahruzka uranavymi stryžniami idzie na 3 hady, i pa ŭsich praviłach u zapasie pavinna jašče być takoje ž paliva. AES zdolnaja pracavać u aŭtamatyčnym režymie 5‑10 hadoŭ. My pamiatajem hazavyja i naftavyja kanflikty, kali adnym uzmacham ruki pierakryvalisia zasaŭki i pompy stancyj.
Nie daj boh pieražyć jašče raz 2006 hod, kali pad pahrozaj apynułasia hazatranspartnaja sistema.
Z AES takoha nie budzie», — skazaŭ jon.
Uładzimir Siamaška dadaŭ, što zaraz vytvorčaść paliva dla AES mohuć stvaryć Kitaj, Kazachstan, jakija vałodajuć uranavymi zapasami. Takim čynam, da momantu pusku biełaruskaj AES uranavaje paliva možna budzie kuplać nie tolki ŭ Rasii.
