Fota Ministerstva pa nadzvyčajnych situacyjach.
Bujny pažar adbyŭsia prykładna ŭ 2.00 30 červienia na terytoryi sielhaspradpryjemstva «Uradžajny» ŭ Łojeŭskim rajonie Homielskaj vobłaści. U haspadarcy zhareła bolš za 450 ton siena.
Jak paviedamiŭ pres‑sakratar Homielskaha abłasnoha ŭpraŭleńnia MNS Rusłan Habryloŭ, zapasy karmoŭ znachodzilisia pad tryma naviesami. Terytoryja sienaschovišča nie aharodžana. Pavodle papiaredniaj viersii, pryčynaj pažaru staŭ padpał. Milicyja i apieratyŭnaja hrupa ŭpraŭleńnia MNS ustanaŭlivajuć vinavatych.
Miascovyja žychary skazali, što naviesy byli abaranyja —
heta značyć ahoń nie moh samastojna pierajści z adnoj tarpy na druhuju. Viaskoŭcy śćviardžajuć, što ŭsie try naviesy ŭspychnuli praktyčna adnačasova.
Viasnoj hetaha hoda miascovyja ŭłady chacieli dałučyć kalektyŭnaje sielskahaspadarčaje unitarnaje pradpryjemstva »Uradžajny» da susiedniaha pradpryjemstva, ale žychary vykazali pratest i pačali zbor podpisaŭ. U vyniku rašeńnie ab rearhanizacyi rajvykankam admianiŭ.
Jość mierkavańnie, što padpalić siena haspadarki mahli praciŭniki samastojnaj dziejnaści sielhaspradpryjemstva.
U tušeńni pažaru ŭdzielničała bolš za 20 ratavalnikaŭ z Łojeŭskaha i susiednich rajonaŭ, a taksama 25 rabotnikaŭ «Uradžajnaha». Pryciahvałasia vosiem adzinak pažarnaj techniki, u tym liku piać aŭtacystern. Ahoń byŭ patušany praz paŭtary hadziny. Naviesy ź sienam vyratavać nie ŭdałosia, ale supracoŭniki MNS nie puścili połymia na dźvie tarpy adkrytaha zachoŭvańnia — vyratavana materyjalnych kaštoŭnaściej na 45 młn. rubloŭ.
Pavodle papiaredniaj infarmacyi, uron ad pažaru skłaŭ amal 70 młn. rubloŭ.
