31 maja ŭ Biełarusi pravodzicca Suśvietny dzień biez tytuniu. U 2010 hodzie ŭ jaho miežach płanujecca pryciahnuć uvahu da prablemy ŭździejańnia tytuniu na žančyn i dziaŭčat.

Jak paviedamiła zahadčyca adździeła hramadskaha zdaroŭja Respublikanskaha centra hihijeny, epidemijałohii i hramadskaha zdaroŭja (RCHEiHZ) Volha Bartman, u hety dzień u RCHEiHZ prachodzić akcyja »My nie kurym». Usim supracoŭnikam centra i naviednikam prapanujecca vypić šklanku soku ŭ padtrymku zdarovaha ładu žyćcia. Zatym kožny pavinien napisać svaje pažadańni, jak pazbavicca ad kureńnia. Nadviednikam razdajuć infarmacyjnyja materyjały pa prablemie kureńnia. Va ŭsioj krainie taksama prachodziać mierapryjemstvy akcyi Biełaruskaha tavarystva Čyrvonaha Kryža »Dychaj svabodna» pa infarmavańni nasielnictva ab škodzie kureńnia.

Prapahandu zdarovaha sposabu žyćcia realizujuć taksama maładziožnyja arhanizacyi krainy. Tak, u miežach akcyi »Biełaruś suprać tytuniu», jakaja pravodzicca z 15 maja, hramadskaja arhanizacyja »Žyćcio biez kureńnia» arhanizavała konkurs biłbordaŭ. Dzieciam było prapanavana namalavać płakat z zaklikam admovicca ad kureńnia. Lepšyja raboty vybirali śpiecyjalisty‑miedyki i pradstaŭniki Minadukacyi.

Jak adznačyła Volha Bartman, u akcyi aktyŭna ŭdzielničajuć studenty. Tak, śpiecyjalny studencki patrul dla prapahandy kaštoŭnaści zdarovaha sposabu žyćcia stvorany ŭ Biełaruskim dziaržaŭnym miedycynskim univiersitecie.

Nahadajem, u Biełarusi dola kurcoŭ siarod mužčyn składaje bolš za 50%, siarod žančyn — bolš za 20%. Z 2001 hoda kolkaść kurcoŭ u cełym u krainie skaraciłasia, adnak adbyvajecca heta ŭ asnoŭnym za košt mužčyn. Dola žančyn, jakija kurać, pavialičyłasia z 19,7% u 2001 hodzie da 21,4% u 2009 hodzie.

U toj ža čas, zajaŭlajuć u RCHEiHZ, mienavita na žančyn i dziaŭčat tytuń akazvaje najbolš mocnaje razburalnaje dziejańnie. Kureńnie šmatrazova pavyšaje stupień ryzyki ŭźniknieńnia złajakasnych novaŭtvareńniaŭ roznaj łakalizacyi, ciažkich form zachvorvańnia orhanaŭ dychańnia, uklučajučy chraničnuju abstruktyŭnuju chvarobu lohkich, chraničny branchit i emfizemu. Kureńnie padčas ciažarnaści pavyšaje vierahodnaść dačasnych rodaŭ, miortvanaradžeńnia i śmierci novanarodžanaha, a taksama moža być pryčynaj źnižeńnia łaktacyi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?