Na čym jeździać ludzi, što pretendujuć na najvyšejšuju pasadu ŭ krainie, pra jakija aŭto marać? Na hetyja dy inšyja pytańni «NN» adkazvajuć kandydaty ŭ prezidenty.
Być prykładam dla bolšaści — adno z nakanavańniaŭ palitykaŭ. I choć davodzicca čuć, što ŭ Biełarusi palityki niama, ludzi ŭsio adno cikaviacca žyćciom pretendentaŭ na ŭładu. Uzhadajma, jaki furor vyklikała publikacyja dekłaracyj prybytkaŭ kandydataŭ u miascovyja saviety ŭ časie apošniaj vybarčaj kampanii. Dziŭnaja reč — mnohija čytačy niezaležnych sajtaŭ niehatyŭna vykazvalisia tady na adras kandydataŭ ad apazicyi, jakija prademanstravali nizkija zarobki, a to i paviedamili pra svajo biespracoŭje. Maŭlaŭ, jak taki čałaviek budzie nami kiravać, kali na siabie zarabić nie moža. Mierkavańnie sprečnaje, kali ŭličyć umovy, u jakich davodzicca isnavać lubomu, chto navažvajecca na publičnaje apazicyjanavańnie.
Palityka — reč darahaja. Udzieł u vybarčych kampanijach patrabuje niemałych srodkaŭ. Naturalna, što na start kandydaty vychodziać, majučy niaroŭnyja ŭmovy. Ale ŭ našym vypadku spraviadliva budzie kazać pra zaviedama štučna stvoranyja niaroŭnyja ŭmovy. Manapalizacyja dziaržaŭnych ŚMI, padkantrolnyja vybarčyja kamisii, administracyjny resurs, vykarystańnie biudžetnych srodkaŭ dziela hrandyjoznych papulisckich mierapryjemstvaŭ (vajenizavanyja parady, dažynki dy słavianskija bazary) — usio heta, nie sakret, katoruju kampaniju pracuje na adnaho kandydata.
Z druhoha boku my bačym dysidentaŭ, jakija žyvuć na ścipłyja piensii, maładych lideraŭ, što tulacca ź siemjami ŭ adnapakajoŭkach i jeździać na patrymanych aŭto. Vybary prezidenta, akramia ŭsiaho, dobraja nahoda, kab paraŭnać pobytavyja i etyčnyja standarty, jakimi kirujecca Łukašenka i jahonyja apanienty.
«NN» pačynaje cykł artykułaŭ pra biełaruskich palitykaŭ, jakija zajavili pra ŭdzieł u čarhovaj prezidenckaj kampanii, a taksama pra najbolš vierahodnych jaje ŭdzielnikaŭ, jakija pakul nie abaznačyli svaje namiery. Čytačy daviedajucca, na čym jeździać kandydaty ŭ prezidenty, jakoj majomaściu vałodajuć, pra ich siamiejnaje stanovišča i zachapleńni. Pačniom z aŭto.
Jeździć na «Škodzie Fielicyja», maryć pra «Folksvahien Tuareh»
Pieršym pra ŭdzieł u kampanii‑2011 zajaviŭ Aleś Michalevič. Ź jaho i pačniom. Hałoŭnym kryteram dla vybaru aŭto palityk ličyć nadziejnaść, tamu jon i nabyŭ «Škodu Fielicyja». Lehkavik 2000 hoda vypusku asnaščany ruchavikom i padvieskaj ad «Folksvahiena», prabieh — bolš za 160 tysiač kiłamietraŭ. Naohuł, Michaleviču padabajucca niamieckija aŭto. Vysoki rost kandydata dyktuje svaje ŭmovy, tamu, kali b jahonyja mary pryjšli da kampramisu z mahčymaściami, jon nabyŭ by sabie «Folksvahien Tuareh». Ci inšy anałahičny pazadarožnik.
Aŭto, na jakim jeździć prezident, pavinna adpaviadać statusu pasažyra i harantavać jahonuju biaśpieku. «Heta musić być pradstaŭničy braniavany aŭtamabil, — miarkuje Aleś Michalevič. — U hetym pytańni ja nie schilny vinavacić Łukašenku ŭ praźmiernym vydatkoŭvańni hrošaj».
 Michalevič jeździć na demakratyčnaj «Fielicyi», fota Alesia Pileckaha |
Čatyry hady na «Micubisi»
Kandydat u prezidenty ad BCHD Vital Rymašeŭski čatyry hady jeździć na «Micubisi Spejs Vehan». Heta pieršy ŭłasny lehkavik palityka, prabieh jaho siahaje za 270 000 km. A dahetul Vital nabyvaŭ vopyt kiroŭcy na słužbovych aŭto.
Čamu «Micubisi»? Palityk addaje pieravahu praktyčnym i funkcyjanalnym aŭtamabilam. «Kab i dla pracy zručnaja była, i dla siamji». U lehkaviku Vitala moža źmiaścicca siem čałaviek. Akramia taho, Rymašeŭskamu impanujuć suadnosiny cany i jakaści ablubavanaha aŭto.
Kali paŭstanie pytańnie pra novaje aŭto, abirać palityk budzie pamiž jeŭrapiejskimi i japonskimi lehkavikami. I kali ŭžo być zusim dakładnym, to pamiž «Miersedesam» i «Tajotaj». Aŭto čynoŭnika najvyšejšaha ranhu pavinna być pradstaŭničym, ale asnaščeńnie jaho nie pavinna pieravyšać razumnyja miežy biaśpieki i zručnaści, miarkuje kandydat ad BCHD.
 Rymašeŭski jeździć na «Micubisi» z prabieham 270 000, fota Julii Daraškievič |
Pamiž «Volva» i «Miersedesam»
Lider Ruchu «Za Svabodu» i kandydat u prezidenty na vybarach 2006 hoda Alaksandr Milinkievič za styrnom 47 hadoŭ. Apošnija hady jon jeździć na «Volva‑S90», prabieh — 280 000 km. U časie pajezdak pa krainie hetaje aŭto nie raz ablivali kisłatoj, prabivali koły. Alaksandr Uładzimiravič kaža, što lubić taksama «Miersedesy». Mienavita «Miersedes» 1993 hoda vypusku jon dekłaravaŭ na minułych vybarach. Uvohule, pry vybary aŭtamabila kandydat u prezidenty kirujecca najpierš zručnaściu, praktyčnaściu i dyzajnam. Lider krainy, ličyć jon, pavinien karystacca pradstaŭničym aŭto.
Milinkievič, choć i lubić šviedskija lehkaviki, ale pry hetym miarkuje, što da ŭzroŭniu skandynaŭskich krainaŭ, dzie palitykaŭ najvyšejšaha ŭzroŭniu niaredka možna ŭbačyć u hramadskim transparcie, nam jašče daloka.
 Milinkievič lubić «Volvo» i «Mersedesy», ale dazvalaje sabie tolki nie novyja mašyny, fota Julii Daraškievič |
«Miersedes» i «Vołha Sajbier»
Alaksandr Łukašenka pakul nie skazaŭ ćviordaje «tak» abo «nie» vybarčaj kampanii‑2011, ale mała chto sumniavajecca, što jana projdzie bieź jaho. Pierad pačatkam minułaj kampanii Łukašenka siarod inšaj majomaści zadekłaravaŭ matacykł Minskaha zavoda. Adnak nichto nie bačyŭ, kab kiraŭnik dziaržavy dabiraŭsia im na pracu pa praśpiekcie Pieramožcaŭ. Zatoje tysiačy minčukoŭ i žycharoŭ stalicy ci ni štodnia sutykajucca z zatorami, jakija ŭtvarajucca ŭ vyniku prajezdu prezidenckaha aŭto. Kiraŭnik krainy jeździć na braniavanym «Mercedes‑Benz‑S600». Pra košt kankretna hetaha aŭto možna tolki zdahadvacca, bo ŭ nas hetaja infarmacyja adnosicca da zakrytaj. Adnak, možna śmieła kazać pra ličby ŭ sotni tysiač dalaraŭ. Braniavany «Miersedes» prezidenta Rasii, da prykładu, kaštuje kala 1,5 miljona dalaraŭ.
Ź intervju rasijskim žurnalistam dvuchhadovaj daŭniny vynikaje, što heta nie adziny lehkavik u prezidenckim aŭtaparku. Łukašenka pryznaŭsia tady, što Horkaŭski aŭtazavod padaryŭ jamu novuju «Vołhu Sajbier». «Ništo sabie tak mašyna, ništo, — adrekamiendavaŭ jon tady navinku Horkaŭskaha aŭtazavoda. — Nu, kaniečnie, heta nie «Miersedes», ale heta ŭžo i nie «Vołha»!»
 Prezidencki «Miersedes» Alaksandra Łukašenki, fota Julii Daraškievič |
«Mnie śnicca baćkava pałutarka»
Paet Uładzimir Niaklajeŭ, jaki ŭznačaliŭ hramadzianskuju kampaniju «Havary praŭdu», pra prezidenckija ambicyi pakul nie zajaŭlaŭ. Adnak źjaŭleńnie takoj kampanii niezadoŭha da vybaraŭ prezidenta, dy jašče z takim charyzmatyčnym lideram, havoryć samo za siabie. Dyj Uładzimir Prakopavič nie admoviŭsia raskazać pra siabie. Aŭto jon daŭno nie kiruje. Kaža, paśla adnaho zdareńnia, jakoje mahło skončycca vielmi trahična, vyrašyŭ za styrno bolš nie siadać. «Ja nie kantraluju siabie za styrnom — lublu chutkaść». Pa spravach paet jeździć na žončynym «Fijat Brava», na aŭto siabroŭ i paplečnikaŭ, a to i na najmanym aŭtamabili. Aŭtamabilnaja mara dziacinstva — hruzavaja pałutarka, na jakoj baćka Uładzimira Niaklajeva pravioz jaho chłapčukom pa ŭsioj Smarhonščynie. «Dahetul pamiataju pach kabiny, nahretaj na soncy. Kali mnie i śnicca aŭto, dyk baćkava pałutarka».
Kaardynatar «Chartyi‑97» Andrej Sańnikaŭ adnym ź pieršych zajaviŭ pra svaje prezidenckija ambicyi. Ale ad razmovy z karespandentam «NN» kateharyčna admoviŭsia, nazvaŭšy samu ideju raskazać pra siabie patencyjnym vybarščykam «kadebisckimi mietadami». «Mnie chavać niama čaho, u svoj čas ja paviedamlu ŭsiu nieabchodnuju infarmacyju. A vy praciahvajcie rabić svaju brudnuju spravu», — zajaviŭ palityk.
 Lideram apazicyi časta davodzicca karystacca słužbovym transpartam, jak, naprykład, padčas pieratrusu 18 maja |
