Śpiecyjalisty Respublikanskaha navukova‑praktyčnaha centra epidemijałohii i mikrabijałohii Ministerstva achovy zdaroŭja vyjavili virusy ŭ 15% prob vady z płavalnych basiejnaŭ Minska.

Pra heta paviedamiła zahadčyca adździeła ekałohii virusnych infiekcyj RNPC epidemijałohii i mikrabijałohii Ministerstva achovy zdaroŭja Tamara Amvrośjeva 27 krasavika na Mižnarodnym maładziožnym forumie «Śviet vodnych technałohij» u Minsku.

Pavodle jaje słoŭ, meta daśledavańnia — vyvučyć «virusałahičnuju jakaść vady płavalnych basiejnaŭ». Dahetul prablema suviazi infiekcyjnych zachvorvańniaŭ sa znachodžańniem ludziej u basiejnach u Biełarusi nie vyvučałasia. Daśledavańnie pravodziłasia ŭ 2009 hodzie — pačatku 2010 hoda ŭ dziciačych, darosłych, spartyŭnych i sanatornych basiejnach Minska. Na ŭvachodzie ŭ basiejn i ŭ jaho čašy adbirali proby vady, jakija potym vyvučalisia z metaj vyjaŭleńnia antyhienaŭ entera‑, rota‑, nora‑, adenavirusaŭ i virusu hiepatytu A. U chodzie piłotnaha daśledavańnia było praviedziena 86 analizaŭ.

Jak paviedamiła Amvrośjeva, 15% prob vady z basiejnaŭ akazalisia zabrudžanymi virusami.

Daminujučymi byli enteravirusy, jakija źjaŭlajucca ŭzbudžalnikami vostrych kišačnych i reśpiratornych infiekcyj, a taksama encefalitu, mieninhitu, mijakardytu. Akramia taho, u probach byli vyjaŭlena rotavirusy, adzinkava taksama vyjaŭleny adenavirusy i virus hiepatytu A (apošni — u dziciačym basiejnie). Uzrovień zabrudžvańnia vady basiejna byŭ u 1,5—2 razu vyšejšy ŭ jaho čašy, čym na ŭvachodzie.

Pavodle słoŭ Amvrośjevaj, najbolšaja kolkaść stanoŭčych prob była vyjaŭlena zimoj, u studzieni—lutym.

«Heta łahična i źviazana z bolš častym naviedvańniem basiejnaŭ u hety čas, kali kupacca niama dzie. Na basiejny prypadaje vialikaja nahruzka», — adznačyła śpiecyjalist.

U cełym, pavodle jaje słoŭ, vyniki daśledavańnia śviedčać, što ŭ Biełarusi, jak i ŭ inšych krainach, isnuje realnaja prablema zabieśpiačeńnia epidemičnaj biaśpieki vady ŭ płavalnych basiejnach. «Vada ŭ basiejnach źjaŭlajecca ŭraźlivaj u płanie mahčymaha zabrudžvańnia virusnymi ahientami. Na žal, sposaby ačystki i abiezzaražvańnia nie zaŭsiody efiektyŭnyja», — adznačyła śpiecyjalist.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?