Były prezident Brazilii Žair Bałsanaru, jaki prajhraŭ vybary ŭ 2022 hodzie. Fota: Eraldo Peres / AP
U Brazilii apublikavali sudovyja dakumienty, jakija tyčacca spravy byłoha prezidenta krainy Žaira Bałsanaru ab sprobie niezakonnaha ŭtrymańnia ŭłady paśla projhryšu na prezidenckich vybarach u kastryčniku 2022 hoda.
Jak pieradaje Associated Press, u apošnija dni svajho prezidenckaha termina Bałsanaru raptoŭna sklikaŭ naradu z vyšejšym vajskovym kamandavańniem krainy i prapanavaŭ im płan pa admienie vynikaŭ vybaraŭ šlacham jurydyčnych manipulacyj albo ŭviadzieńnia nadzvyčajnaha stanovišča.
Hienieralitet u adkaz zajaviŭ, što «vyniki vybaraŭ niemahčyma admianić vajskovym šlacham» i što za heta prezident paniasie adkaznaść. U pryvatnaści, Hałoŭnakamandujučy brazilskim vojskam hienierał Marka Antonia Frejre Homies (ciapier u adstaŭcy) papiaredziŭ Bałsanaru, «što aryštuje jaho, kali toj pasprabuje zładzić dziaržpieravarot».
Adnak, pavodle sudovych dakumientaŭ, adzin z hienierałaŭ (były kamandujučy vajenna-marskimi siłami Brazilii Almir Harńje) usio ž vykazaŭ łajalnaść Bałsanaru, skazaŭšy, «što pieradaść tamu ŭ rasparadžeńnie svaje vojski».
Sam Bałsanaru ŭsialak admaŭlaŭ svajo dačynieńnie da sprob zachapić uładu ŭ Brazilii, adznačyŭšy, što «dziaržaŭny pieravarot — heta kali na vulicach tanki, zbroja i zmoŭščyki. A ŭ Brazilii ničoha z hetaha nie adbyłosia».
***
Nahadajem, pravy papulist Žair Bałsanaru pryjšoŭ da ŭłady ŭ 2018 hodzie i abviaściŭ vajnu «kulturnamu marksizmu», pad jakim mieŭsia na ŭvazie «libieralizm».
Bałsanaru sfarmiravaŭ urad na tracinu ź siłavikoŭ, abmiežavaŭ dazvolenyja padstavy dla abortaŭ, płanavaŭ vyjści z Paryžskaha pahadnieńnia pa baraćbie z paciapleńniem klimatu, admaŭlaŭ kavid, a taksama chacieŭ «ačyścić» Braziliju ad hiejaŭ i kursaŭ połavaha vychavańnia ŭ škołach.
Palityka časta paraŭnoŭvali z Donaldam Trampam, bo pavodziny byłoha brazilskaha prezidenta i jahonych prychilnikaŭ paśla projhryšu na vybarach 2022-ha nahadvali toje, što adbyvałasia ŭ ZŠA paśla projhryšu Trampa ŭ 2020-m.
Žair Bałsanaru i Donald Tramp u 2019 hodzie, kali jany byli prezidentami svaich krain. Fota: instahram Bałsanaru
Bałsanaru naŭprost admoviŭsia pryznavać parazu na vybarach (adstaŭ ad supiernika na 1,6% hałasoŭ), choć i rasparadziŭsia pačać padrychtoŭku da pieradačy ŭłady novamu prezidentu Łuisu Inasiu Łule da Siłvie. Praz dva miesiacy, pierad samaj inaŭhuracyjaj Łuły, jon palacieŭ u ZŠA.
U toj ža momant prychilniki Bałsanaru pačali błakavać darohi, a paśla zachapili i razhramili prezidencki pałac razam z budynkami parłamienta i Viarchoŭnaha suda.
Palicyja tady aryštavała paŭtary tysiačy ŭdzielnikaŭ hetych biesparadkaŭ. Pa hetaj spravie idzie śledstva, i pravaachoŭnyja orhany dahetul padazrajuć Bałsanaru ŭ padbuchtorvańni da biesparadkaŭ.
Vyšejšy vybarčy sud Brazilii ŭžo pazbaviŭ Bałsanaru prava abiracca prezidentam krainy da 2030 hoda.
Čytajcie taksama:
AAN i Brazilija praz Partuhaliju łabirujuć vyvad Huceryjeva i Hałavataha z-pad sankcyj
MZS uhavorvaje Braziliju naładzić pastaŭki biełaruskaha kaliju, niahledziačy na sankcyi
Traktar, harełka, kozački. Chto jašče ź lidaraŭ dziaržaŭ admaŭlaŭ kavid i jaho niebiaśpieku
