Ryhor Kastusioŭ u studzieni 2020 hoda

Ryhor Kastusioŭ u studzieni 2020 hoda

U liście svajakam staršynia partyi BNF Ryhor Kastusioŭ pavinšavaŭ žonku z 44-j hadavinaj šlubu, a taksama parazvažaŭ pra šancy dažyć da załatoha viasiella, piša Radyjo Svaboda.

«Praz šeść hadoŭ budzie 50 hadoŭ našaha supolnaha žyćcia. Ja raniej usio dumaŭ šmat ab hetaj dacie. Chacieŭ by sabrać kuču haściej i adznačyć z razmacham. Ale zaraz, na žal, pohlady stali bolš piesimistyčnymi. Aptymizmu pamienšała, bo pražyć jašče šeść hadoŭ vyhladaje składanaj zadačaj», — piša Kastusioŭ u liście svajakam.

Z 44 hadoŭ siamiejnaha stažu ŭžo bolš za dva hady Ryhor Kastusioŭ razłučany z žonkaj: u 2022-m jaho asudzili na 10 hadoŭ źniavoleńnia. Jašče padčas znachodžańnia ŭ SIZA ŭ Ryhora Kastusiova dyjahnastavali rak. Z kastryčnika minułaha hodu palityka ŭtrymlivajuć u haradzienskaj turmie № 1, sioleta ŭ studzieni sud pryznačyŭ jamu turemny režym na try hady.

Ryhor i Łarysa Kastusiovy vyhadavali traich dziaciej. Dačka Halina, jakaja ciapier žyvie ŭ Polščy, uspaminaje, što śviatkavańnie hadavinaŭ šlubu było ŭ baćkoŭskaj siamji tryvałaj tradycyjaj i adznačałasia ščyra dy pryhoža.

«Adznačali doma, svajoj siamjoj. Tak było i kali my byli małymi, i kali ŭ‌žo vyraśli, ale jašče žyli z baćkami. Tata daryŭ mamie kvietki, mama hatavała smačnyja stravy. My ź siastroj dapamahali. Za viačeraj uspaminali minułaje, razhladali albomy.

Pamiataju, na 20-hodździe my dasłali list ź vinšavańniami na radyjo i paprasili, kab dla baćkoŭ prahučała pieśnia Džo Dasena. U toj dzień za viačeraj vyśvietliłasia, što pad hetuju pieśniu adbyŭsia ich pieršy taniec. A paznajomilisia baćki na viasielli ŭ svaich svajakoŭ, i hetuju padzieju taksama zaŭsiody z radaściu zhadvali. Heta było ŭ 1979 hodzie», — raspaviała Halina.

Jana kaža, što vielmi pieražyvaje za zdaroŭje baćki, a taksama za samaadčuvańnie maci, jakaja zastałasia biez padtrymki muža. Halina praciahvaje vieryć, što załatoje viasielle svaich baćkoŭ sustrenie razam ź imi za śviatočnym stałom.

«Mamie sioleta spoŭnicca 65 hadoŭ. Jana na piensii. Tak było b dobra — spakojna padrychtavacca, adznačyć 50-hodździe jak maje być: siarod dziaciej, unukaŭ‌, rodnych i blizkich. Usio ž majem nadzieju, što tak i budzie. Tak pavinna być», — padzialiłasia dumkami ab baćkach dačka Ryhora Kastusiova.

U krasaviku Kastusiovu spoŭnicca 67. Z haradzienskaj turmy ad palityka dachodziać listy, časam jon moža telefanavać. Umovy ŭ turmie Ryhor Kastusioŭ nazyvaje ciažkimi. Viadoma, što, akramia ankałohii, Ryhora Kastusiova turbuje varykoz noh.

Staršynia zakrytaj uładami Partyi BNF Ryhor Kastusioŭ byŭ asudžany na 10 hadoŭ pavodle 357-ha artykuła Kryminalnaha kodeksa za nibyta «zmovu z metaj zachopu ŭłady niekanstytucyjnym šlacham». Biełaruskija pravaabaroncy pryznali Ryhora Kastusiova palitviaźniem.

Čytajcie taksama:

Adsutnaść nyrki, puchlina ŭ hałavie, rak. Chto ź biełaruskich palitviaźniaŭ maje za kratami vialikija prablemy sa zdaroŭjem

«Jany vajujuć za svajo zdaroŭje i svajo žyćcio ŭ žachlivych umovach». Cichanoŭskaja — pra śmierć Ihara Lednika

Ryhor Kastusioŭ skardzicca na zdaroŭje ŭ turmie: «Apošnija dva miesiacy byli ciažkija»

Клас
1
Панылы сорам
0
Ха-ха
1
Ого
0
Сумна
8
Абуральна
1