Alaksandr Rakicki raskazvaŭ pra siabie ŭ strymie Jeŭraradyjo

Vyjechaŭ ź Biełarusi z-za pieraśledu

Raniej publičnymi tvarami «Bajpoła» byli Alaksandr Azaraŭ i Stanisłaŭ Łupanosaŭ. Dałučeńnie da abjadnańnia novaha supracoŭnika nazyvajecca ŭmacavańniem kamandy.

Alaksandru Rakickamu 50 hadoŭ. Jon naradziŭsia ŭ Maładziečnie. Skončyŭ Akademiju kiravańnia pa śpiecyjalnaści «pravaznaŭstva» i «źniešniaja palityka i dypłamatyja». Maje kłasny čyn «savietnik justycyi, dziaržaŭny słužačy 3-ha kłasa».

«Našaj Nivie» ŭ «Bajpole» udakładnili, što Rakicki prasłužyŭ u strukturach prakuratury 24 hady.

Słužbovuju karjeru jon pačaŭ ź Minskaj transpartnaj prakuratury. Byŭ pamočnikam prakurora i śledčym. Zatym pierajšoŭ u Hienieralnuju prakuraturu. Pracavaŭ u mižnarodna-pravavym adździele, a taksama zajmaŭsia pytańniami, źviazanymi z nahladam za vykanańniem pakarańniaŭ.

Apošniaje jaho miesca pracy — Navukova-praktyčny centr Hienprakuratury. Adtul jon zvolniŭsia ŭ 2021 hodzie.

«Bajpoł» paviedamlaje, što ŭ mai 2021 hoda Rakicki byŭ vyklikany na dopyt. U jaho praviali vobšuk. Nahodaj stali dopisy, jakija dyskredytujuć režym. Jon nie staŭ čakać aryštu i vyjechaŭ ź Biełarusi praz Maskvu ŭ Kijeŭ.

Chacieŭ dałučycca da «Bajpoł» u 2022 hodzie

Va Ukrainie Rakicki byŭ vałancioram hramadskaha abjadnańnia «Vilna Biełaruś», a kali pačałasia poŭnamaštabnaja vajna, pierabraŭsia ŭ Polšču.

U 2022 hodzie Rakicki vykazaŭ žadańnie dałučycca da «Bajpoła», ale adkazu nie atrymaŭ. Tolki ŭ 2023 hodzie Alaksandr Azaraŭ prapanavaŭ jamu ŭstupić u arhanizacyju.

Nie dapuščany da płana «Pieramoha»

Pavodle Azarava, Rakicki prajšoŭ usie pravierki, akramia palihrafa. Tamu novy supracoŭnik nie dapuščany da sakretnaj častki płana «Pieramoha» i inšych sakretnych mierapryjemstvaŭ arhanizacyi.

U arhanizacyi čakajuć admaški partnioraŭ, kab pravieryć Rakickaha palihrafam.

Kaža, što pratesty ŭ Biełarusi ciapier niemahčymyja

Alaksandr Rakicki nazyvaje toje, što adbyvajecca ŭ Biełarusi, «utrymańniem ułady niekanstytucyjnym šlacham».

Uzrovień represijaŭ dasiahnuŭ takoha maštabu, što robić nie mahčymym pratesnyja akcyi. Tamu ludzi, jakija nie padtrymlivajuć režym, pavinny znachodzicca ŭ biaśpiecy i rychtavać siabie da «času Ch», kali vyśpiejuć nieabchodnyja ŭmovy, kab «zrynuć złačynny režym Łukašenki», kazaŭ jon.

Presavańnie palitviaźniaŭ charaktaryzuje jak złačynstva suprać čałaviečnaści

Rakicki raskazaŭ, što ŭ Hienprakuratury cełaje ŭpraŭleńnie farmalna nahladaje za tym, jak vykonvajucca pakarańni, ale pa sutnaści supracoŭniki «vykonvajuć volu režymu».

Pavodle jaho słovaŭ, źniavolenych za palityku pieraśledujuć maštabna, a taksama sistemna ŭžyvajuć katavańni i znarok stvarajuć nialudskija ŭmovy ŭtrymańnia.

Presavańnie palitźniavolenych jon acharaktaryzavaŭ jak złačynstva suprać čałaviečnaści.

Havoryć pra represii suprać prakurorskich

Rakicki davodziŭ, što ŭ 2020 hodzie supracoŭniki prakuratury aceńvali hvałt siłavikoŭ suprać pratestoŭcaŭ jak złačynnuju dziejnaść. Jany admaŭlalisia pradstaŭlać dziaržaŭnaje abvinavačvańnie ŭ pracesach, nie davali sankcyj na aryšt i inšyja apieratyŭna-vyšukovyja mierapryjemstvy.

Rakicki zapeŭnivaje, što pazicyja šmat kaho z prakurorskich nie źmianiłasia.

Pa jaho słovach, supracoŭnik prakuratury, jaki musić pradstaŭlać dziaržaŭnaje abvinavačvańnie na palityčnym pracesie, pavinien spačatku ahučyć načalstvu svajo bačańnie jaho. Kali jano razychodzicca z pazicyjaj «partyi i ŭradu», to prakuror nie dapuskajecca da pracesu.

Niazhodnamu prapanujecca skasavać pracoŭnyja adnosiny.

Novy supracoŭnik «Bajpoł» kazaŭ, što represii suprać prakurorskich rabotnikaŭ pačalisia z 2020 hoda i praciahvalisia dastatkova praciahły čas.

Skład hienieralnaj prakuratury źmianiŭsia minimum na 70%. A ŭ navukova-praktyčnym centry z 35 supracoŭnikaŭ sa składu 2021 hoda zastałosia tolki 5 čałaviek.

Rakicki davodziŭ, što hienieralny prakuror Andrej Švied na adnoj ź letašnich naradaŭ zajaŭlaŭ ab najaŭnaści ŭ prakuratury vialikaj kolkaści zdradnikaŭ. Imi jon ličyŭ tych supracoŭnikaŭ, jakija abjektyŭna aceńvajuć situacyju ŭ krainie z pravavoha hledzišča.

Znajomy z «ambitnym» Šviedam

Rakicki skazaŭ, što znajomy z Andrejem Šviedam, jaki ciapier nosicca z vykryćciom złačynstvaŭ, źviazanych z «hienacydam biełaruskaha narodu». Na im zasiarodžanaja ŭvaha, kab apraŭdać represii i adciahnuć uvahu ad unutranych prablemaŭ.

«Našaj Nivie» Rakicki acharaktaryzavaŭ Švieda, jak ambitnaha, uładalubnaha, kvalifikavanaha słužboŭca.

«Jon choča viarnuć kantrol nad vajennaj prakuraturaj, Śledčym kamitetam dy ŭsimi ministerstvami. Kab Hienprakuratura stała klučavym hulcom na palityčnym poli ŭ Biełarusi pad jahonym kiraŭnictvam», — adznačyŭ Alaksandr Rakicki.

***

«Bajpoł» byŭ stvorany byłymi siłavikami ŭ 2020 hodzie. U 2023 hodzie ŭ arhanizacyi adbyŭsia raskoł. U vyniku častka bajpołaŭcaŭ stvaryła svaju arhanizacyju «Biełpoł».

Pavodle słovaŭ kiraŭnika «Bajpoła» Alaksandra Azarava, bolšaść supracoŭnikaŭ abjadnańnia nie publičnyja. Jon kaža, što za 2021-2022 hod da abjadnańnia dałučylisia blizu 600 čałaviek. Siarod ich jość i dziejnyja siłaviki. Jadro arhanizacyi znachodzicca ŭ Varšavie. Supracoŭniki raskidanyja pa roznych krainach.

Hladzicie taksama:

Vynieśli prysud pa spravie «Bajpoła». Azaravu dali 25 hadoŭ zavočna

«Abaviazacielstvy vykananyja, my spyniajem maŭčańnie». Stanisłaŭ Łupanosaŭ raskazaŭ pra aŭdyt «Bajpoła» i rezka raskrytykavaŭ byłych paplečnikaŭ

Chranałohija kanfliktu ŭ «Bajpole» — što za čym adbyłosia

Marzaluk zhienieravaŭ novuju ideju, jak udaskanalić zakanadaŭstva ab hienacydzie

Viarchoŭny sud pačynaje razhlad spravy pamierłaha dzieviać hadoŭ tamu Uładzimira Katruka, jakoha abvinavačvajuć u złačynstvach u Chatyni

Клас
17
Панылы сорам
6
Ха-ха
7
Ого
3
Сумна
0
Абуральна
6

Chočaš padzialicca važnaj infarmacyjaj ananimna i kanfidencyjna?