Skrynšot videa jutub-kanała «Maksimalna»

Skrynšot videa jutub-kanała «Maksimalna»

Svaim dośviedam pracaŭładkavańnia žančyny padzialilisia ŭ vypusku na jutub-kanale «Maksimalna».

Schavała, što zamužam

Historyja Kaciaryny adbyłasia pry pracaŭładkavańni adrazu paśla zaviaršeńnia vučoby va ŭniviersitecie na płatnym adździaleńni pa śpiecyjalnaści «łahistyka».

«Ja vypuskałasia ŭ 2020 hodzie i sama sabie šukała pracu. U pryncypie, čałaviek biez dośviedu pracy i tak u nie najlepšaj situacyi, a ja jašče była 21-hadovaj dziaŭčynaj z štampam u pašparcie».

Pa słovach Kaciaryny, na ŭsich sumoŭjach joj zadavali pytańnie pra siamiejnaje stanovišča. Jana adkazvała ščyra, što zamužam. Pa słovach dziaŭčyny, pobač sa spakojnaj reakcyjaj na taki adkaz byli i vypadki, kali pačynali zadavać pytańni kštałtu: «Ci płanujecie vy dziaciej, pajści ŭ dekret?» Na takija pytańni Kacia taksama adkazvała ščyra, što dziaciej nie płanuje.

Na niejkim z sumoŭjaŭ na dziaržaŭnym pradpryjemstvie joj skazali prykładna nastupnaje: «Dziaŭčyna, vy dakładna chutka sydziecie ŭ dekret. Vam 21 hod».

Kacia raspaviała, što ŭ toj momant jana mocna pieražyvała z nahody takoha kštałtu pytańniaŭ. «Mnie byŭ 21 hod. Ja nie mahła rasstavić niejkija svaje miežy i skazać, što nie budzie adkazvać na hetyja pytańni».

U vyniku, kali jaje ŭziali na pracu, jana jašče niekalki miesiacaŭ nikomu nie kazała, što zamužam.

Vyjšła z sumoŭja ŭ ślazach

Darji było 20 hadoŭ i jana tolki skončyła ŭniviersitet, kali pryjšła na sumoŭje ŭ sałon pryhažości ŭ wellness-centry. Jaho pravodziła žančyna. Jana pačała raspytvać pra dośvied, a paźniej stała zadavać pytańni pra asabistaje, spytała, ci zamužam. Dziaŭčyna raspaviała, što nie zamužam, ale maje maładoha čałavieka. Na pytańnie, dzie jana žyvie, adkazała, što sa svaim maładym čałaviekam.

«Jana pačała maralna mianie dušyć, spytała, ci maje baćki viedajuć pra heta. Ja adkazała, što tak. I tut pačaŭsia samy cyrk. Jana skazała: «Nu heta nienarmalna. Ty razumieješ, što vy žyviacie ź im nieraśpisanyja».

Pa słovach dziaŭčyna, u jaje było takoje adčuvańnie, što jana patrapiła ŭ samy strašny kašmar, u jakim hetaja žančyna stała ŭvasableńniem «pačvarnaj mamy», jakaja havoryć: «Ciabie prosta vykarystoŭvajuć. Ty potym budzieš nikomu nie patrebnaja. Jon na tabie nikoli nie ženicca».

Jak zhadvaje Darja, jana vyjšła z hetaha sumoŭja ŭ ślazach, choć, pa jaje słovach, jana dastatkova maralna ŭstojlivy čałaviek.

Abvinavacili ŭ tym, što zachoča dziaciej i sydzie z ustanovy

Iryna zhadvaje, što jaje historyja adbyłasia pad čas pracy pa raźmierkavańni na Minskim zavodzie kołavych ciahačoŭ. Joj tam nie vielmi padabałasia, tamu jana šukała novaje miesca pracy.

Jak zhadvaje Ira, va ŭstanovie, kudy jana pryjšła na sumoŭje, u jaje mała što pytali. «Adrazu skazali: «Vy maładaja, vam 24 hady. Spytali, ci jość u mianie chłopiec (jon na toj momant u mianie byŭ). I skazali: «Voś vy napeŭna zachočacie vyjści zamuž, a zatym zachočacie mieć dziaciej i ad nas sydziecie». I heta dla ich nie kruta».

Dziaŭčyna sprabavała pieraŭpeŭnić, havaryć, što kali navat vyjdzie zamuž, to nie zachoča dziaciej i nikudy nie sydzie. Jana pryvodziła ŭ prykład svaju znajomuju, jakaja tam pracavała.

«Paśla sumoŭja my pajšli da vyšejstajačaha kiraŭnika. Jon adobryŭ maju kandydaturu. Ale skazaŭ, što apošniaje słova budzie za niepasrednym kiraŭnikom. Toj mnie skazaŭ, što nie: «My maładych dziaŭčat nie biarom. Tamu što heta nienadziejna».

Prapanoŭvali chadzić na spatkańni z raspracoŭščykami ź inšych kampanij

Kaciaryna zhadvaje sumoŭje ŭ nievialikaj IT-kampanii, kali joj było hadoŭ 20-21. Pa słovach dziaŭčyna, jaho pravodziŭ sam hienieralny dyrektar.

«Jon mnie skazaŭ, što jość dźvie pazicyi — ejčar (praca ź piersanałam. — NN) i piar. Kim ty chočaš być? Ja była na siomym niebie ad ščaścia. Padavałasia, što heta prosta vaŭ, mnie dajuć prava vybaru».

U vyniku, jak raspaviadaje Kacia, jana vybrała pazicyju ejčara. «Usio było kłasna tydni dva. Zatym mianie vyklikali. I naš hiendyrektar skazaŭ: «A čamu ty nie pracuješ?» Ja raspaviała, čym zajmajusia.

U vyniku vyśvietliłasia, što, kali jon mnie prapanoŭvaŭ rabotu ejčaram, to spadziavaŭsia, što ja budu znajomicca z raspracoŭščykami-tymlidami z EPAM, vyvodzić ich na asabisty kantakt, chadzić ź imi na spatkańni i pieramańvać tymlida i jaho kamandu ŭ našu «cudoŭnuju» kampaniju».

Kaciaryna nie viedała, jak reahavać na takuju prapanovu. Jašče miesiac jana sprabavała narmalna pracavać, zmahła znajści supracoŭnikaŭ na try vakansii. «Na heta mnie skazali, što ja maładziec i raspaviali, što heta byŭ vyprabavalny termin (pra jaki ja nie viedała). Ja syšła ŭ adpačynak na tydzień (treba było zjechać). A kali viarnułasia, to namieśnik hienieralnaha dyrektara skazaŭ, što mnie nie zapłaciać. I ŭvohule, jany padličyli, što ja budu im doraha abychodzicca».

U vyniku, jak raspaviała Kaciaryna, hetaja situacyja pryviała da kardynalnaj źmieny viektaru jaje raźvićcia.

«Mianie prosta adrezała ad pracy ŭ kampanijach. Ja bolš nie była ni na adnym sumoŭi hadoŭ piać. U mianie było mocnaje admaŭleńnie hetaj karparatyŭnaj kultury. Ja syšła ŭ fryłans. U mianie byŭ svoj biznes. Tolki značna paźniej ja pryjšła na pracu ŭ bujnoje ahienctva».

Raspytvali, na što źbirajecca tracić zaroblenaje

Historyja Taćciany adbyłasia, kali joj było 26 hadoŭ. Na toj čas jana mieła piacihadovy dośvied pracy, była na dziasiatkach sumoŭjaŭ.

Sumoŭje, pra jakoje zhadvaje dziaŭčyna, adbyłosia ŭ davoli bujnym biełaruskim rekłamnym ahienctvie. Jana pryjšła ŭładkoŭvacca na pasadu akaunt-mieniedžara. Na toj čas u Taćciany było niekalki hadoŭ adpaviednaha dośviedu ŭ mižnarodnych kampanijach ź vialikimi prajektami i miljonnymi biudžetami.

«Na starcie sumoŭja ja adčuła trochi borzy ton majho surazmoŭcy. Heta byŭ akaunt-dyrektar hetaha ahienctva. U niejki momant, paśla taho, jak pahavaryli pra moj dośvied i pierajšli da abmierkavańnia zarobku, jon u vielmi nachabnym tonie spytaŭsia: «Nu, i na što źbirajecca tracić stolki hrošaj takaja maładaja dziaŭčyna?»

I ja ŭ toj momant pačała, trochi chichikajučy, raspaviadać pra šmat cikavych spravaŭ, jakimi možna zajmacca, i pasprabavała heta vyvieści ŭ niejkaje kanstruktyŭnaje dla siabie rečyšča».

Jak zaŭvažaje dziaŭčyna, zhadvajučy pra hetuju situacyju ciapier, jana razumieje, što tak rabić nie patrebna było:

«Ciapier by ja jamu skazała pra toje, što heta niekarektnaje pytańnie, što naša ŭsia papiaredniaja razmova išła nie ŭ karektnym rečyščy, i ŭ ich kampanii ja dakładna pracavać nie stanu».

Čytajcie jašče:

Pracadaŭcy nie chočuć brać na pracu zumieraŭ — voś čamu tyja pravalvajuć sumoŭi

«Ci nie kraŭ ja?» Jak ajcišniki prachodziać palihraf dziela pracy

Raskazvajem, jak pakidać dobraje pieršaje ŭražańnie

Клас
8
Панылы сорам
5
Ха-ха
3
Ого
5
Сумна
3
Абуральна
3