Alaksandr Mancevič

Alaksandr Mancevič

Sioleta 3 listapada sud Maładziečanskaha rajona ŭ asobie sudździ Alaksieja Iršyna pryznaŭ Alaksandra Manceviča vinavatym u dyskredytacyi Respubliki Biełaruś (art. 369-1 Kryminalnaha kodeksa). Manceviča asudzili da čatyroch hadoŭ pazbaŭleńnia voli z adbyćciom u kałonii va ŭmovach ahulnaha režymu i da štrafu pamieram 400 bazavych vieličyń, što składaje 14 800 rubloŭ.

Svajoj viny asudžany redaktar niezaležnaha ŚMI nie pryznaŭ, u svaim apošnim słovie na sudzie jon kazaŭ pra toje, što hanarycca svaimi prodkami, svaimi rodnymi, siabrami i «Rehijanalnaj hazietaj», što była razam sa svaimi čytačami na praciahu bolš jak 25-ci hadoŭ: «Ja nie letucieńnik, ale ŭpeŭnieny, što niekali źjavicca vulica imia «Rehijanalnaj haziety», jakaja macavała aŭtarytet biełaruskaj nacyi, žyła kłopatami čytačoŭ i pisała praŭdu».

U lipieni 2021 hoda redakcyja «Rehijanalnaj haziety», jakaja aśviatlała žyćcio Maładziečna i pamiežža Minskaj i Hrodzienskaj abłaściej, vymušana prypyniła vypusk drukavanaha vydańnia i zasiarodziłasia na internet-viersii. Paźniej Mininfarm na padstavie rašeńnia suda Maładziečanskaha rajona ŭnios sajt i telehram-kanał «Rehijanalnaj haziety» ŭ «Respublikanski śpis ekstremisckich materyjałaŭ». Paśla ataki siłavikoŭ na redakcyju i zatrymańnia hałoŭnaha redaktara sioleta ŭ sakaviku, toj ža sud pryznaŭ «ekstremisckim» jašče i kantent vydańnia ŭ sacsietcy «VKontaktie».

Redaktara Alaksandra Manceviča zatrymali 15 sakavika 2023 hoda paśla pieratrusu ŭ jahonym domie ŭ Vilejcy, i z taho momantu ŭtrymlivajuć pad vartaj — spačatku źmiaścili ŭ IČU Maładziečna, a paśla 72 hadzin papiaredniaha zatrymańnia pieraviali ŭ śledčuju turmu № 8 Žodzina (Minskaja vobłaść).

Pieratrusy tady praviali taksama ŭ supracoŭnikaŭ redakcyi. Siłaviki zabirali arhtechniku i hrošy, va ŭsich uziali padpisku pra nierazhałošvańnie tajamnicy śledstva.

Pavodle abvinavačańnia, Alaksandr Mancevič na pasadzie kiraŭnika redakcyi «Rehijanalnaj haziety» razam ź inšymi asobami z 1 studzienia 2020 hoda pa 15 sakavika 2023 hoda nibyta raspaŭsiudžvaŭ u drukavanym vydańni i afilavanych internet-resursach iłžyvyja źviestki, jakija dyskredytujuć biełaruskuju dziaržavu i jaje orhany ŭłady.

Śledstva śćviardžała, što «ŭ artykułach źmiaščałasia niedakładnaja infarmacyja, nakiravanaja na pryčynieńnie istotnaj škody dziaržaŭnym i hramadskim intaresam, padryŭ aŭtarytetu krainy i jaje orhanaŭ ułady, naniasieńnie škody nacyjanalnym intaresam, destabilizacyju abstanoŭki siarod hramadzian Biełarusi, farmavańnie iłžyvych ujaŭleńniaŭ ab nievykanańni ŭ respublicy pravoŭ i svabod hramadzian».

6 krasavika 2023 hoda pravaabaroncy pryznali Alaksandra Manceviča palityčnym viaźniem. «Ličym, što dziejańni ŭ dačynieńni da jaho źjaŭlajucca praciaham metanakiravanaj palityki ŭładaŭ pa abmiežavańni raspaŭsiudu niepadcenzurnaj infarmacyi ŭ krainie i praciaham nastupu na svabodu słova», — havaryłasia ŭ zajavie pravaabarončaj supolnaści.

5 žniŭnia žurnalist sustreŭ za kratami svoj 65-hadovy jubilej.

Svajaki, siabry i kalehi prosiać padtrymać jaho listami, pasyłkami i hrašovymi pieravodami na adras:

225413, Bresckaja vobł., h. Baranavičy, vuł. Bresckaja, 258 V, Śledčy izalatar № 6. Alaksandru Barysaviču Manceviču.

Čytajcie taksama:

«Niama nijakaj majoj viny, unuku nie budzie soramna za dzieda». Praniknionaje apošniaje słova redaktara «Rehijanalnaj haziety»

«Pahladzicie mnie ŭ vočy». Źjaviŭsia poŭny tekst apošniaha słova redaktara Manceviča

«Praca ciažkaja, 6 dzion na tydzień, mocna schudnieŭ». Dva hady tamu aryštavali žurnalista Andreja Kuźniečyka

Клас
0
Панылы сорам
0
Ха-ха
0
Ого
1
Сумна
1
Абуральна
5