Ilustracyjnaje fota: «Naša Niva»
Adnosna novaja praktyka biełaruskich siłavikoŭ — prymušać biełarusaŭ skidacca na niekatoryja dziaržaŭnyja ci kaladziaržaŭnyja arhanizacyi. Naprykład, čałaviek zadanaciŭ niekali ŭ fondy dapamohi ByHelp ci BySol. Jaho vyklikajuć u KDB ci MUS i vielmi nastojliva prosiać zakinuć peŭnuju sumu na rachunak niejkaj arhanizacyi. Zvyčajna hetaja suma ŭ dziesiać razoŭ bolšaja za zrobleny kaliści danat na dapamohu aktyvistam. Nam viadomyja vypadki, kali za kolišniaje achviaravańnie pamieram 20 dalaraŭ čałavieka prymušali pieraličyć 2 ci navat 3 tysiačy dalaraŭ. Peŭnaj sistemy ŭ sumaŭtvareńni my nie pabačyli.
15 čałaviek, jakija prajšli praz takuju praceduru, na ŭmovach ananimnaści raskazali «Svabodzie», na rachunki jakich arhanizacyj ułady prymušali ich pieravodzić hrošy.
RNPC ankałohii ŭ Baraŭlanach
Respublikanski navukova-praktyčny centr ankałohii i miedyčnaj radyjałohii ŭ Baraŭlanach časta traplajecca ŭ śpisie arhanizacyj, kudy siłaviki prymušajuć pieravodzić hrošy. U niekatorych vypadkach jany dajuć śpis, a čałaviek sam vybiraje, kudy achviaravać. Časam hrošy prosiać pieravieści adrasna, kankretna na hety centr.
RNPC — viadučaja miedyčnaja ŭstanova ŭ Biełarusi, dzie lečać ankałohiju, a taksama akazvajuć roznyja płatnyja miedyčnyja pasłuhi. U tym liku pasłuhi płastyčnaj chirurhii.
Zhodna z aficyjnym sajtam, u centry pracuje 1751 čałaviek, ź ich 444 lekary. Miarkujučy pa respublikanskim banku vakansij, ciapier centru nie chapaje 248 supracoŭnikaŭ, u tym liku 74 lekaraŭ.
Ciektar kultury adnaho z rajvykankamaŭ
Adnaho z apytanych «Svabodaj» žycharoŭ Biełarusi siłaviki paprasili pieraličyć hrošy na siektar kultury ŭ rajonnym vykanaŭčym kamitecie. Hrošy spatrebilisia nibyta dla taho, kab padtrymać rublom restaŭracyju miascovaha pomnika architektury.
U rajvykankamie ŭdałosia daviedacca, što hety pomnik architektury sapraŭdy ciapier na restaŭracyi. I jaje možna padtrymać hrašyma ŭ abychod siłavikoŭ. U rajvykankamie, adnak, nie zmahli adrazu patłumačyć jakim mienavita čynam, i prapanavali pierazvanić.
Junyja ratavalniki
Jašče adna arhanizacyja, kudy nastojliva prasili pieraličyć hrošy siłaviki, — Biełaruskaja moładzievaja hramadskaja arhanizacyja junych ratavalnikaŭ-pažarnych. Jaje ŭtvaryli jašče ŭ 2001 hodzie. Tady ž u staličnych škołach praviali kampaniju pa ŭstupleńni jaje šerahi. U administracyi škoł prychodzili raznaradki, nastaŭniki musili ŭhavorvać vučniaŭ dałučycca da hetaj arhanizacyi. Čym kankretna jana zajmajecca, skazać ciažka. Rajonnyja filijały jość pa ŭsim Miensku.
Arhanizacyja taksama vydaje časopis «Juny ratavalnik». Na jaho raniej prymušali padpisvacca kłasnych kiraŭnikoŭ u biełaruskich škołach.
Dziciačyja damy
Jašče adna katehoryja arhanizacyj, kudy prymušajuć pieravodzić hrošy siłaviki, — dziciačyja damy. My znajšli niekalki takich vypadkaŭ. Heta Rečycki dom-internat, Vaŭkavyski dziciačy dom, Dom dziciaci numar 1 u Miensku. U asnoŭnym heta arhanizacyi, padnačalenyja Ministerstvu achovy zdaroŭja, dzie žyvuć chvoryja dzieci.
Pa słovach surazmoŭcaŭ «Svabody», pieraličvać hrošy siłaviki prymušali i ŭ Respublikanski centr reabilitacyi dziaciej z parušeńniem słychu. Jon taksama padnačaleny Minzdaroŭja.
U adnaho čałavieka, jakoha paprasili zadanacić na dziciačy dom, u dakumientach siłaviki pakinuli farmuloŭku: «Žadańnie zahładzić vinu». Mienavita z takoj matyvacyjaj jon nibyta pieravodziŭ im zahadzia ahavoranuju sumu.
Niekatoryja asablivaści
U hetych prymusovych danatach na roznyja arhanizacyi ciažka adsačyć łohiku. Čałavieku ź Miensku prapanujuć zapłacić u arhanizacyju z Hrodzienskaj vobłaści, a žycharu maleńkaha rajonnaha horada — na rachunak ustanovy achovy zdaroŭja ŭ stalicy. Kamuści adrazu prapanujuć kankretnuju arhanizacyju, a niekamu dajuć śpis i mahčymaść vybrać.
Časam, pavodle słoŭ surazmoŭcaŭ, im udavałasia starhavacca i zapłacić mieniej, čym pieršapačatkova zaprošvali siłaviki. Časam vynikovaja suma, naadvarot, pavialičvałasia. Kamuści tolki paśla takoha prymusovaha danata dazvolili vyjechać za miažu, a niekamu siłaviki skazali, što paśla achviaravańnia «jon moža bieśpieraškodna jeździć u Biełaruś». Takija abiacańni siłavikoŭ nie paćviardžajucca dakumientalna.
«Lepš patrabavać pozvu abo iści z advakatam»
Pavodle jurystki pravaabarončaha centra «Viasna» Śviatłany Hałaŭniovaj, najbolš zvarotaŭ ad ludziej, jakich vymušali płacić hrošy siłaviki, pastupała na pačatku leta.
«Mnie zdajecca, što na piku da nas za tydzień źviartalisia pa 5—6 takich ludziej. My raim pieršapačatkova nie hulać pa ichnich praviłach. Kali jany telefanujuć i zaprašajuć — nie iści, iści tolki pa poźvie i z advakatam, maksimalna nie iści na kantakt. Čałaviek abaviazany źjaŭlacca na pracesualnyja dziejańni ŭ niejkim statusie. Ale hetaha nie robicca, u ich niedastatkova danych na čałavieka. Heta bolš sprava cisku i prymusu. Šmat ludziej išli na heta, płacili i vyjazdžali», — kaža jurystka.
Čytajcie taksama:
Biełarusy z Polščy danacili Ukrainie, ale ich danaty ŭziali i zamarozili
Navukoŭca Juryja Adamava asudzili da troch hadoŭ kałonii za danaty
Supracoŭnicu IT-kampanii «Hiejm Strym» Ksieniju Alkienavu chutka pačnuć sudzić za danaty
