McDonnell Douglas DC-9. Fota: Wikimedia Commons

McDonnell Douglas DC-9. Fota: Wikimedia Commons

Były premjer-ministr Italii Džulijana Amata abvinavaciŭ Francyju ŭ atacy na pasažyrski samalot u 1980 hodzie, jakaja skončyłasia jaho krušeńniem. U katastrofie zahinuŭ 81 čałaviek (77 pasažyraŭ i čatyry členy ekipaža). Pa śćviardžeńni palityka, łajnier byŭ źbity francuzskim źniščalnikam padčas sproby zamachu na dyktatara Livii Muamara Kadafi, piša «Radyjo Svaboda».

Samalot McDonnell Douglas DC-9 avijakampanii Itavia raźbiŭsia nad Tyrenskim moram la Sicylii 27 červienia 1980 hoda. Jon nakiroŭvaŭsia z Bałońji ŭ Palerma. Pryčyny krušeńnia zastalisia nieviadomyja.

U čas śledstva razhladalisia viersii ab kanstrukcyjnym niedachopie samalota, vybuchu bomby ci traplańni rakiety. U paviedamleńniach miedyja ŭ 1980 hodzie raspaviadałasia, što ŭ zonie krušeńnia łajniera byli vyjaŭlenyja samaloty NATO.

Niekalki vysokapastaŭlenych italjanskich vajskoŭcaŭ abvinavačvalisia ŭ dačy łžyvych pakazańniaŭ padčas rasśledavańnia.

U intervju haziecie La Repubblica Amata zajaviŭ, što ŭpeŭnieny, što samalot byŭ pierabłytany z bortam Kadafi i źbity francuzskimi VPS.

Raniej viersiju ab dačynieńni francuzskich VPS da katastrofy samalota vykazvaŭ premjer-ministr Italii ŭ 1980 hodzie Frančeska Kasiha. Jon kazaŭ, što jamu i Amata heta raspaviali supracoŭniki italjanskich śpiecsłužbaŭ. Italjanskija miedyja śćviardžali, što anałahičnaja infarmacyja ŭtrymlivałasia ŭ dakumientach livijskich śpiecsłužbaŭ, vyjaŭlenych paśla zachopu Trypali ŭ 2020 hodzie.

Italjanski sudździa Razarya Pryjore, jaki vioŭ adno z rasśledavańniaŭ katastrofy, u spravazdačy ab katastrofie zajaviŭ, što jaho pracy pieraškadžali supracoŭniki italjanskich śpiecsłužbaŭ i armii.

Amata paprasiŭ prezidenta Francyi Emaniuela Makrona pryznać vinu i «zmyć z Francyi hetuju hańbu».

Italjanski palityk pryznaŭ, što ŭ jaho niama pramych dokazaŭ hetaj viersii. Pavodle jaho słoŭ, u 2000 hodzie, kali jon uznačalvaŭ urad, jon paprasiŭ pralić śviatło na pryčyny katastrofy prezidentaŭ ZŠA i Francyi Biła Klintana i Žaka Šyraka, ale pačuŭ «vielmi vietlivyja adkazy» bieź jakich-niebudź źviestak.

Premjer-ministr Italii Džorža Miełoni paprasiła Amata dać dokazy jaho słoŭ. U Ministerstvie zamiežnych spraŭ Francyi haziecie Le Figaro zajavili, što francuzskija ŭłady zaŭsiody pieradavali italjanskamu śledstvu ŭsiu patrebnuju infarmacyju pa tym, što zdaryłasia, i hatovyja supracoŭničać sa śledstvam i nadalej.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?