Jaŭhienij Pryhožyn i Dźmitryj Utkin razam zahinuli ŭ avijakatastrofie 23 žniŭnia

Jaŭhienij Pryhožyn i Dźmitryj Utkin razam zahinuli ŭ avijakatastrofie 23 žniŭnia

Što z harantyjami ad Łukašenki?

Palityčny ahladalnik prajekta «Pozirk» Alaksandr Kłaskoŭski kaža, što kali Jaŭhien Pryhožyn sapraŭdy zahinuŭ, niahledziačy na harantyi Łukašenki, to treba razumieć: kantekst byŭ taki, što jon harantuje biaśpieku Pryhožynu na terytoryi Biełarusi.

Alaksandr Kłaskoŭski. Fota: «Naša Niva»

Alaksandr Kłaskoŭski. Fota: «Naša Niva»

«Tady kantekst byŭ taki: Łukašenka jak pieramoŭščyk harantavaŭ, što kali toj pahodzicca spynić marš na Maskvu, to jamu ničoha nie budzie. Što Łukašenka zabiraje ich u Biełaruś. A samalot raźbiŭsia na terytoryi Rasii. Łukašenka nie moža harantavać jamu biaśpieku pa ŭsim śviecie», — adznačaje analityk.

Tym nie mienš, na dumku Kłaskoŭskaha, Łukašenka ŭsio adno akazvajecca ŭ niajomkaj situacyi.

«Na pačatku lipienia jon ładziŭ pres-kanfierencyju dla zamiežnych žurnalistaŭ, dzie zapeŭnivaŭ, što, maŭlaŭ, Pucin astyŭ i nie budzie «mačyć» Pryhožyna. Tamu ŭ hetym płanie ŭsio adno rytoryka Łukašenki akazałasia niasłušnaj, bo siońnia samy mejnstrymny kamientar da situacyi, što heta pomsta Pucina», — adznačaje Kłaskoŭski.

Alaksandr Łukašenka. Fota: Contributor Getty Images

Alaksandr Łukašenka. Fota: Contributor Getty Images

Kanśpirałahičnyja teoryi pasypalisia

Analityk kaža, što jon ad pačatku nie byŭ prychilnikam kanśpirałahičnych viersij, što miaciež byŭ insceniroŭkaj, što ŭsio heta było chitrym płanam Pucina, kab pierakinuć «Vahnier» u Biełaruś i potym vykarystoŭvać najmitaŭ suprać Ukrainy ci krain NATA.

«Dla insceniroŭki heta zanadta składana i doraha. Heta naniesła takija reputacyjnyja straty Pucinu, što jano taho nie kaštavała. Pry žadańni možna było prosta pierasunuć «Vahnier» u Biełaruś. Ciapier ža, kali «Vahnier» abiezhałoŭleny, to ŭsia kanśpirałohija pra chitry płan Pucina całkam rassypajecca», — kaža Kłaskoŭski.

Analityk nie vyklučaje, što, mahčyma, Pucinu i chaciełasia b pacierabić niervy nataŭcam, ale Łukašenku niavyhadna, kab praź jaho terytoryju vahnieraŭcy pajšli na Suvałki, Varšavu ci Žešaŭ.

«Łukašenka rytaryčna padhulaŭ Pucinu, ale chutka adkruciŭ usio nazad i skazaŭ, što pažartavaŭ. Adrazu, jak jaho prycisnuli pahrozaj, što susiednija krainy ES nahłucha zakryjuć miežy. Jon zrazumieŭ, što heta budzie mocnym udaram».

Što budzie z vahnieraŭcami ŭ Biełarusi?

Analityk miarkuje, što dla Biełarusi hetaja situacyja moža mieć svaje plusy, bo, mahčyma, pamienšaje napružanaść u adnosinach Minska z Varšavaj, Vilniaj i Ryhaj.

«Kali ciapier «Vahnier» abiezhałoŭleny, to hetaja pahroza ŭ vačach susiedziaŭ źmianšajecca. Łukašenka, dumaju, zaraz budzie jašče aktyŭniej cierabić Pucina, kab jon niejak vyrašyŭ prablemu z «Vahnieram». Kab ich zabrali ź Biełarusi, bo Łukašenku dakładna nie treba stolki instruktaraŭ dla svajho vojska.

Analityk miarkuje, što Łukašenka takija pytańni moh stavić i raniej. Bo nielha vyklučać, što padčas miaciažu Kreml jaho prosta vykarystaŭ, skazaŭ, što treba zabrać ich da siabie, kab niejak razrulić situacyju.

Łukašenka i Pucin. Fota: Contributor Getty Images

Łukašenka i Pucin. Fota: Contributor Getty Images

«Mahčyma, Łukašenka tady taksama chacieŭ prapijarycca i pakazać, jaki jon vyratavalnik Rasii. Ale ŭ vyniku atrymaŭ taksičny aktyŭ. Pa-pieršaje, natapyrylisia susiedzi, a pa-druhoje, uźnikajuć pytańni finansavańnia», — skazaŭ «Našaj Nivie» analityk.

Kłaskoŭski ličyć, što zaraz Łukašenka budzie aktyŭna stavić pytańni pierad Pucinym, kab toj zabiraŭ vahnieraŭcaŭ nazad u Rasiju.

Karbalevič: Pierakantavalisia, i hodzie

Palitołah Valer Karbalevič upeŭnieny, što niama ŭ śviecie ludziej, jakija paličyli b padzieńnie samalota z Pryhožynym vypadkovaściu.

«Vidavočna, što heta zabojstva. U dadatak da pałoniju i «Navička» ŭ Rasii źjaŭlajecca novaja forma zabojstva palityčnych apanientaŭ — avijacyjnaja katastrofa», — adznačaje palitołah.

Valer Karbalevič. Fota: «Naša Niva»

Valer Karbalevič. Fota: «Naša Niva»

Karbalevič nazyvaje vielmi dziŭnym i samanadziejnym, što Pryhožyn paśla ŭsiaho, što adbyłosia, spakojna lotaŭ pa Rasii.

«Vypadak z Pryhožynym — heta demanstracyja taho, što Pucin nie daruje nijakich vystupaŭ suprać jaho».

Abiezhałoŭlivańnie pryvatnaj vajskovaj kampanii «Vahnier» Karbalevič nazyvaje pačatkam jaje kanca.

«Hetaja situacyja aznačaje, što vahnieraŭcy, jakija ciapier znachodziacca na terytoryi Biełarusi, chutka źniknuć. Vahnieraŭcy — heta ludzi, jakija vajujuć za hrošy na vajnie. U Biełarusi nijakaj vajny niama i pakul nie płanujecca. Tamu, chutčej za ŭsio, ich pieradysłakacyja ŭ Biełaruś była časovaj, jak kazaŭ Łukašenka, kab «pierakantavacca».

Ciapier, kali samoha Pryhožyna niama, to i nie zrazumieła pierad čym, pierad jakoj kampanijaj im tut «pierakantoŭvacca».

Karbalevič ličyć imaviernym scenar, kali rasijskija ŭłady pasprabujuć nacyjanalizavać hetuju kampaniju, abjavić jaje dziaržaŭnaj.

«Pakul, viadoma, ciažka kazać pra ich pierśpiektyvy. Ale tak jak Pryhožyn byŭ jaje hałoŭnym ułaśnikam i aktaram, to ź jaho źniknieńniem hetaja kampanija budzie iści da spadu, u tym liku i na terytoryi Biełarusi. Jany buduć pastupova vyjazdžać, bo niama nijakaha sensu ŭ jaje prysutnaści. Tym bolš što niezrazumieła, chto budzie im płacić hrošy».

Što tyčycca harantyj ad Łukašenki, to Valer Karbalevič taksama ličyć, što da Łukašenki tut nijakich pretenzij być nie moža, bo toj harantavaŭ jamu biaśpieku na terytoryi Biełarusi, a na terytoryi Rasii jon pa vyznačeńni nie moh ničoha jamu harantavać.

U dni červieńskaha miaciažu rasijski palityčny ahladalnik Maksim Trudalubaŭ u intervju «Našaj Nivie» nazyvaŭ Pryhožyna prajektam Pucina, jaki ŭ niejki momant vyjšaŭ z-pad kantrolu, pierastaŭ być prajektam Pucina i zažyŭ svaim žyćciom.

Tady ž rasijski ahladalnik vykazaŭsia i nakont budučyni Pryhožyna.

Trudalubaŭ kazaŭ, što nie ŭjaŭlaje, jak paśla ŭsiaho hetaha kiraŭnik «Vahniera» moža zastacca žyvym. Jak bačym, roŭna praz dva miesiacy Jaŭhiena Pryhožyna sapraŭdy nie stała.

Čytajcie taksama:

Pryhožyn i Utkin zahinuli, ich samalot raźbiŭsia nad Vałdajem. Što viadoma na hety momant

«Było adčuvańnie, što paśla buntu jon drenna skončyć». Blizkija da Kramla krynicy — pra mahčymuju hibiel Pryhožyna 

Raniej Pryhožyn užo «pamiraŭ» u avijakatastrofie. Tłumačym

«Śmierć Pryhožyna robić samoha Łukašenku ŭ niejkaj stupieni «novym Pryhožynym»

«Pačynajecca «smutny čas» sa šmatlikimi śmiarciami». Padalak prakamientavaŭ mierkavanuju śmierć Pryhožyna

«Usio narmalna, lacim na hastroli ŭ Minsk». Navina ab śmierci Pryhožyna ŭzarvała bajnet i nie tolki

Клас
21
Панылы сорам
3
Ха-ха
4
Ого
3
Сумна
7
Абуральна
11