Rasijski błohier Fighterbomber 23 žniŭnia paviedamiŭ pra rasijski viertalot Mi-8, jaki niekalki tydniaŭ tamu nibyta sieŭ na avijabazie pobač z Pałtavaj. Pavodle jahonych słoŭ, ekipaž ź niejkich pryčyn straciŭ aryjenciroŭku — mahčyma, heta była «radyjohulnia», mahčyma, admova navihacyi.

Ukrainski žurnalist Juryj Butusaŭ napisaŭ u fejsbuku, što krynicy ŭ kiraŭnictvie USU paćviardžajuć infarmacyju ab prylocie rasijskaha viertalota Mi-8 na adnu z avijabaz Uzbrojenych sił Ukrainy. «Viertalot całkam ceły i papoŭnić skład USU paśla detalovaha vyvučeńnia jaho abstalavańnia. Čakajem infarmacyju pra členaŭ ekipaža», — napisaŭ jon. 

Ciapier hetuju infarmacyju raskryŭ sam kiraŭnik HUR Ukrainy Kiryła Budanaŭ. Akazvajecca, heta ŭsio było zahadzia spłanavana i ŭzhodniena ź piłotam.

«Zmahli znajści pravilny padychod da čałavieka, zmahli stvaryć umovy, kab vyvieźci nieprykmietna ŭsiu siamju, i ŭrešcie stvaryć takija ŭmovy, kab jon zmoh pierahnać hetaje pavietranaje sudna z ekipažam, jaki nie viedaŭ, što adbyvajecca. Kali jany zrazumieli, dzie jany sieli, jany pasprabavali ŭciačy. Na žal, jany byli źniščanyja, chaciełasia b [uziać] žyvymi, ale majem, što majem», — skazaŭ Budanaŭ u razmovie z karespandentkaj prajekta «Radyjo Svaboda» «Krym.Realii».

Pa słovach kiraŭnika HUR, viertalot ciapier u Kijevie. Budanaŭ dadaŭ, što ŭbačyć viertalot i pahutaryć ź jaho piłotam možna budzie paśla apublikavańnia «aficyjnaha kino».

«Piłot vydatna adčuvaje siabie, usio ŭ jaho dobra. U jaho jość dva varyjanty, ale jon schilajecca da taho, kab być tut (va Ukrainie — red.)», — dadaje Kiryła Budanaŭ, ale matyvacyju rasijskaha piłota nie vydaje.

Kiraŭnik HUR nazyvaje hetuju apieracyju adnoj z najlepšych, praviedzienych jahonym viedamstvam za ŭsiu historyju Ukrainy.

Čytajcie taksama:

Raźviedka vymaniła va Ukrainu rasijski viertalot Mi-8 z kaštoŭnym hruzam

Ukraincy zajavili pra źniščeńnie rasijskaj rakietnaj sistemy S-400 «Tryumf» u Krymie

Ukraincy nanieśli ŭdar pa mysie Tarchankut. Mahčyma, źniščany klučavy dla abarony Čarnamorskaha fłotu kompleks 

Клас
28
Панылы сорам
3
Ха-ха
0
Ого
0
Сумна
4
Абуральна
5