Fota: AP Photo / Manu Fernandez, Stephan Savoia, File

Fota: AP Photo / Manu Fernandez, Stephan Savoia, File

Mark Cukierbierh — kiraŭnik karparacyi Meta (maciarynskaj kampanii fejsbuka i instahrama), Iłan Mask — hiendyrektar kampanij SpaceX i Tesla. Abodva ŭ volny čas udaskanalvajuć svaje ŭmieńni ŭ bajavych mastactvach, ale tolki ŭ adnym vypadku havorka idzie pra realnyja spabornictvy. Cukierbierh jašče ŭ časy pandemii zaniaŭsia MMA (bajami biez pravił), jon vyvučaje japonskaje bajavoje mastactva džyu-džycu i ŭžo vyjhraŭ niekalki miedaloŭ na debiutnym turniry.

Što da Maska, to jon nie taki ŭžo ekśpiert u samaabaronie. U dziacinstvie budučy navatar žyŭ razam z baćkami ŭ PAR, i ŭ tyja časy, jak raskazvaŭ Iłan, jamu časta davodziłasia ŭdzielničać u vuličnych bojkach. Ale ž Iłanu ŭžo 52, jon, napeŭna, doŭha byŭ biez praktyki. Dyj nie ŭ najlepšaj fizičnaj formie. Ź inšaha boku, toje, što Mask fizična macniejšy za supiernika, moža dapamahčy jamu padčas sutyknieńnia.

Fota: Eva Marie Uzcategui / Bloomberg via Getty Images

Fota: Eva Marie Uzcategui / Bloomberg via Getty Images

Historyja ź ich bojem pačałasia ŭ druhoj pałovie červienia. Jana adbyvajecca na fonie kankurentnaj baraćby dvuch mahnataŭ. U kastryčniku 2022 hoda Iłan Mask nabyŭ tvitar, a potym, jak kiraŭnik sacsietki, zładziŭ ź joj niekalki sprečnych madyfikacyj. Apošniaja ź ich — pierajmienavańnie tvitara ŭ Ch i zamiena znakamitaj ptuški, simvała sacsietki, na hetuju ž litaru. Pad kiraŭnictvam Maska kampanija mocna ŭpała ŭ rynačnaj vartaści: u kastryčniku jana kaštavała 44 miljardy dalaraŭ, a ŭ mai — užo 15 miljardaŭ.

U lipieni Cukierbierh prezientavaŭ kankurenta tvitara pad nazvaj Threads. Novaja sacsietka chutka nabrała 100 miljonaŭ zarehistravanych karystalnikaŭ, ale jaje rost nieŭzabavie zapavoliŭsia. I tvitar (ci Ch) sa svaimi 350 miljonami karystalnikaŭ našmat apiaredžvaje Threads.

Ale vierniemsia ŭ červień. Mask napisaŭ u adkaz na pracu nad Threads, što kiraŭnik Meta pastavić čałaviectva pad svoj «abcas». Karystalniki tvitara papiaredzili Iłana, što Cukierbierh vałodaje technikami džyu-džycu, ale toj nie razhubiŭsia.

Mask napisaŭ u tvitary, što jon hatovy da «bojki ŭ kletcy» z Cukierbierham, toj adkazaŭ niešmatsłoŭna: «Paviedamicie, dzie sustreniemsia». Mask zaprasiŭ jaho bicca na aktahonie ŭ Viehasie — miełasia na ŭvazie abharodžanaja arena ŭ formie vaśmikutnika (aktahona), na jakoj prachodziać bai arhanizacyi Ultimate Fighting Championship (UFC).

Ideja boju miljarderaŭ chutka stała virusnaj. Mej Mask, maci kiraŭnika SpaceX i viadomaja madel, vystupiła suprać mierapryjemstva, ale, zdajecca, jaje mierkavańnia nie ŭličyli.

Adrazu ž pajšli čutki nakont taho, dzie moža zdarycca sustreča tytanaŭ. Da varyjanta ź Viehasam dadalisia rymski Kaliziej i, mahčyma, navat dom Cukierbierha ŭ kalifarnijskim horadzie Pała-Alta. Prezident UFC, znakamity Dana Uajt, arhanizavaŭ užo niamała bujnych bajoŭ i byŭ hatovy dapamahčy i ŭ hetym vypadku. Pavodle jaho, abodva pradprymalniki byli nastrojenyja surjozna nakont boju.

U vypadku z Cukierbierham tak i było. Maładziejšy ź miljarderaŭ, naprykład, pravioŭ treniroŭku ź dziejnymi čempijonami UFC — novaziełandcam Israelem Adesańja i aŭstralijcam Alaksandram Vałkanoŭski. Mask taksama nie siadzieŭ na miescy i patreniravaŭsia ź siabram Zały słavy UFC i eks-čempijonam u siaredniaj i paŭsiaredniaj vazie arhanizacyi Žoržam Sien-Pjeram.

Miljardery dajšli i da abmierkavańnia daty boju. Ministr kultury Italii raspavioŭ, što hutaryŭ z Maskam ab praviadzieńni matča ŭ krainie ŭ farmacie dabračynnaha mierapryjemstva. Sam miljarder prapanoŭvaŭ stylistyku Staražytnaha Ryma — Kaliziej by dla takoha cudoŭna padyšoŭ. Taksama źjaŭlalisia źviestki, što miescam boju stanie amfiteatr u Pampiejach. Cukierbierh, u svaju čarhu, prapanoŭvaŭ pryznačyć boj na 26 žniŭnia. 

Ale ŭ kancy minułaha tydnia Cukierbierh napisaŭ na svajoj płatformie Threads: «Iłan nie paćvierdziŭ daty, potym zajaviŭ, što jamu patrebnaja apieracyja, a ciapier prosić pravieści zamiest hetaha trenirovačny raŭnd u mianie ŭ dvary». Uładalnik fejsbuka i instahrama ličyć: kali Mask budzie hatovy pryznačyć datu, jon znojdzie ź im kantakt, kali nie — čas zasiarodzicca na bajach ź inšymi ludźmi i ruchacca dalej.

Mask adkazaŭ praz tvitar i nazvaŭ Cukierbierha «kurycaj» (chicken) — hetaje słova vykarystoŭvajuć u dačynieńni da bajaźliŭcaŭ.

Ale na hetym absurdnaść historyi nie skončyłasia. 14 žniŭnia Mask napisaŭ, što padčas test-drajvu adnoj z madelaŭ Tesla jon chacieŭ by pryjechać da doma Cukierbierha ŭ kalifarnijskim Pała-Alta. Kali jamu «pašancuje» i Cukierbierh adčynić dźviery — «pačniecca boj»! Usiu hetuju historyju Mask sabraŭsia tranślavać u žyvym efiry ŭ tvitary ci, jak ciapier nazyvajecca płatforma, u Ch.

Cukierbierh navat nie paličyŭ patrebnym adkazvać na heta asabista. Jaho pradstaŭnik paviedamiŭ žurnalistam: «Prosta ciapier Mark u adjeździe, nie ŭ Pała-Alta. Taksama Mark surjozna stavicca da sportu i nie źbirajecca bicca z kimści, chto raptoŭna prychodzić da jaho dachaty».

Kali boj usio ž taki adbudziecca, bukmiekiery nie majuć sumnievaŭ u tym, chto pieramoža. Pa ich apošnich acenkach, ź imaviernaściu 81,48% boj vyjhraje Mark Cukierbierh, bo jon viadomy bolš surjoznym staŭleńniem da adzinaborstvaŭ. Zrešty, toje, što Mask pastajanna źmianiaje ŭmovy boju, moža prymusić jaho supiernika admovicca ad jaho, i Iłan musić heta razumieć. Tamu ź jaho boku situacyja z bojem — heta naŭrad ci historyja pra sapraŭdny sport, a chutčej, pra pijar i chvalbu.

Meta zapuściła novy servis Threads. Šmat chto nazyvaje jaho «zabojcam tvitara»

«Biznes-rašeńni prymaŭ čysta intuityŭna». Byłaja top-mieniedžarka Twitter raskazała pra Maska i zakuliśsie pracy ŭ kampanii

Iłan Mask papiaredziŭ Kitaj, što kraina moža być całkam zachoplenaja štučnym intelektam

Клас
2
Панылы сорам
6
Ха-ха
0
Ого
0
Сумна
0
Абуральна
3

Chočaš padzialicca važnaj infarmacyjaj ananimna i kanfidencyjna?