Jon bolš za 20 hadoŭ adpracavaŭ doktaram-transpłantołaham u Respublikanskim navukova-praktyčnym centry dziciačaj ankałohii i hiematałohii, pravioŭ mnostva apieracyj pa pierasadcy kaściavoha mozhu i ličycca adnym z najlepšych śpiecyjalistaŭ centra.

16 lutaha 2023 hoda sud pryznaŭ Alaksiejčyka vinavatym i pryznačyŭ jamu dva z pałovaj hady kałonii. Paźniej doktara pryznali palitviaźniem. Ciapier, praz 10 hadoŭ paśla apieracyi, Kacia napisała kranalny adkryty list dla Alaksieja Alaksiejčyka, jaho źmiaščaje polizek.me.

«Alaksiej Viktaravič, pryvitańnie!

Piša vam Kacia Škor. Amal 10 hadoŭ nie razmaŭlali, ale vy napeŭna mianie pamiatajecie, bo ja ŭ svoj čas zaliła ślaźmi vam usie kalidory i kabiniety ŭ balnicy. Pamiatajecie? Spačatku — tamu što ŭbačyła łysieńkich dziaciej u voknach, kali padychodziła da balnicy, paśla — tamu što samu siabie było škada, usiu ŭ trubkach i kinutuju, jak mnie zdavałasia, nu i pad kaniec — ad niespraviadlivaj zaŭvahi adnaho čałavieka, jaki abvinavaciŭ mianie ŭ karyślivym donarstvie. Nu i namučylisia ž vy sa mnoj, ujaŭlaju!

Kacia Škor

Kacia Škor

Pišu vam ź vialikaj radaściu. Bo ŭspaminaju vas ź vialikaj pavahaj, ciepłynioj i ŭdziačnaściu. Napeŭna, jak i mnohija mamy, taty, svajaki dziaciej, jakim vy dapamahli. Jakoje ščaście być znajomaj z vami. Ščyra liču, što mnie vielmi pašancavała stać donaram kaściavoha mozhu pad vašym kantrolem.

Ja ŭspaminaju našu pieršuju sustreču, jak vy supakojvali mianie i jak etyčna i humanna tłumačyli mnie pra budovu arhanizma, raspaviadali ab pracy kaściavoha mozhu, apieracyi, mahčymych nastupstvach. Alaksiej Viktaravič, heta było zroblena nam na najvyšejšym uzroŭni. U mianie nie było sumnievaŭ davierycca vam.

I pamiataju ranicu apieracyi. Vy jašče pałajalisia na miedsiastru niepasredna pierad samaj apieracyjaj, bo mnie aniestezija pačała sychodzić pad skuru, i ŭ mianie nadźmuŭsia puchir na ruce. Miedsiastra stała jaho terminova razhładžvać, raźmiarkoŭvać, paśla čaho ja imhnienna i adklučyłasia. Pračnułasia ŭ reanimacyi ŭsia ŭ trubkach i daviedałasia, jak siabie adčuvajuć stareńkija ludzi, jakija chočuć chadzić, ale nie mohuć.

A na susiednim łožku lažała dziciatka, zusim maleńkaje, i ŭ jaho baleŭ žyvocik, i jano ŭvieś čas płakała. U jaho byŭ rak. A jašče na mianie hladzieć chadzili studenty, im pakazvali pieršaha niarodnasnaha donara dla darosłaha dziciaci ŭ krainie. Ja, viadoma, redka pra siabie tak dumaju, ale jaki ž honar i pośpiech.

Jašče pamiataju vaš kabiniet, u jakim pachła cyharetami. Napeŭna, kuryć u kabinietach zabaroniena, ale nie pasadziać ža vas u turmu za heta!:)

Mnie asabista žarty dapamahajuć nie płakać.

Alaksiej Alaksiejčyk

Alaksiej Alaksiejčyk

Što ŭ vas čuvać? Vy napeŭna kansultujecie ŭsich pa zdaroŭi i raskazvajecie historyi? Daktary zaŭsiody ceniacca i bierahucca. Tym bolš takija, jak vy. Vielmi spadziajusia na heta.

Raskažycie, jak prachodziać vašy dni i što ciapier čytajecie?

Ja niadaŭna pačała čytać raman Viktara Remizava «Viečnaja mierzłata». Heta kniha pra «vialikuju» stalinskuju budoŭlu ŭ Sibiry i pra łahiery. Pra bliskučych navukoŭcaŭ, hieołahaŭ, akademikaŭ, prosta ssylnych, jakija apynalisia ŭ HUŁAHu pa danosach, z zajzdraści ci prosta z-za «vialikich płanaŭ pravadyra».

Ja čytaju, jak ludzi spraŭlalisia z taksičnym žorstkim asiarodździem byvałych złačyncaŭ, nievynosnymi ŭmovami nadvorja, ździekami z boku načalnikaŭ, i sprabuju znajści sens takich pakut sotniaŭ tysiač ludziej. I sensu, viadoma, nie znachodžu, ale pakul rablu vysnovu, što čałaviekam nas robiać nie abstaviny, u jakija my źmieščanyja, a naša reakcyja, našy ŭčynki ŭ hetych abstavinach. Davoli banalnaja dumka, ale adčuvaju, što časam važna sabie pra heta nahadvać. Prynamsi, pieryjadyčna sabie jaje pramaŭlaju.

Mabyć, budu zaviaršać list. Maje budyjskija siabry ŭklučyli vas u śpis dla pryśviačeńnia zasłuh. Heta značyć, što 100 čałaviek adpraŭlajuć vam svaje dobryja pažadańni!

Adčuvajcie padtrymku ludziej, chaj budzie mocnym zdaroŭje, chaj chapaje sił vytrymlivać cisk abstavinaŭ i chaj budzie šmat spakoju i radaści ŭnutry.

Kacia Škor

27.06.2023»

Vy taksama možacie napisać Alaksieju list i padtrymać jaho ciopłymi słovami.

Adras dla listoŭ: PK № 17, 213004, h. Škłoŭ, vuł. 1-ja Zavodskaja, 8.

Čytajcie taksama:

«Vyvieli ŭ kajdankach». Zatrymali daśviedčanaha transpłantołaha, jaki rabiŭ apieracyi pa pierasadcy kaściavoha mozhu

Viadomamu transpłantołahu dali dva z pałovaj hady kałonii

Клас
34
Панылы сорам
1
Ха-ха
0
Ого
3
Сумна
14
Абуральна
3