The Poor Man's Rembrandt Rembrandt dla biedniakoŭ Rembrandt dla biedniakov

Usie achvotnyja mohuć zrabić tatuiroŭki, jakija adsyłajuć da tvoraŭ Rembranta. Fota: Museum Rembrandhuis

U anonsie akcyi na sajcie muzieja adznačajecca, što ŭ Rembranta i studyi Schiffmacher & Veldhoen, zasnavalnikam jakoj źjaŭlajecca Chienk Šyfmachier (Henk Schiffmacher), bolš viadomy jak Hanky ​​Panky, šmat ahulnaha: jany suśvietna viadomyja majstry svajoj spravy i hłyboka ŭkaranilisia ŭ DNK Amsterdama. U ich mastactvie taksama jość važnyja padabienstvy: jak u hraviurach, tak i ŭ tatuiroŭkach usio pačynajecca z malunka, jaki zatym nanosicca na pavierchniu tuššu i ihołkaj.

Tam, dzie Rembrant vykarystoŭvaŭ miednuju płaścinu i list papiery, kab pieratvaryć svaju kampazicyju ŭ hraviuru, mastaki-tatuiroŭščyki nanosiać svoj malunak na skuru čałavieka. U vyniku zjaŭlajecca tvor mastactva, jaki vy nosicie z saboj usio žyćcio.

Toje, što Rembrant mieŭ tatuiroŭku, małaimavierna. Ale tearetyčna heta mahčyma, tamu što naniasieńnie piermanientnaha malunka na cieła — staražytnaja technika, jakaja była raspracavanaja ŭ roznych rehijonach śvietu adnačasova. Jana była viadomaja jašče ŭ Staražytnym Jehipcie. 

Pieršapačatkova hetyja mietki na skury byli prykmietami prynaležnaści da jakoj-niebudź hrupy: plemiannoj, relihijnaj, pirackaj, lehijanierskaj. Ale heta taksama byŭ sposab paznačyć peŭnyja katehoryi ludziej, naprykład, raboŭ ci źniavolenych.

Siońnia ž tatuiroŭka — heta srodak zajavić ab svajoj aryhinalnaści, srodak spakušeńnia, pravakacyi ci prosta ŭpryhažeńnia.

Šyfmachier adznačaje:

«U śviecie pradajecca bolš tatuirovak, čym tvoraŭ mastactva, jakija možna paviesić na ścianu. Stary mastak-tatuiroŭščyk adnojčy nazvaŭ tatuiroŭki «Rembrantam dla biedniaka», bo taki «tvor mastactva» bolš dastupny, čym karcina adnaho sa starych majstroŭ, ale nie mienš staranna vykanany i adabrany. Mnohija ludzi taksama stvarajuć sapraŭdnuju kalekcyju tatuirovak ad kankretnych mastakoŭ-tatuiroŭščykaŭ».

Usim achvotnym majstar i jaho kamanda padčas akcyi «Rembrant dla biedniakoŭ» prapanujuć šerah dyzajnierskich tatuirovak, u tym liku aryhinalnyja hraviury Rembranta, podpis Rembranta i jaho manahramu.

Dyrektar doma-muzieja Rembranta Miłu Chałbiesma (Milou Halbesma) u intervju The Guardian skazała, što prajekt adpaviadaje imknieńniu muzieja achapić raznastajnych sučasnych mastakoŭ.

«My zaŭsiody šukajem prajekty, źviazanyja nie tolki z Amsterdamam, ale i z majsterstvam. My ličym siabie domam mastakoŭ. Rembrant nie tolki žyŭ i pracavaŭ u hetym domie, ale i navučaŭ svaich vučniaŭ. My chočam pracavać u našaj novaj studyi z hałandskimi mastakami, kab źviazacca z publikaj, i my ličym Šyfmachiera i jaho kamandu mastakami. Havorka idzie pra vyklik dla kožnaha muzieja — dabracca da nastupnaha pakaleńnia».

Jak paviedamlajecca na sajcie muzieja, akcyja projdzie z 19 pa 25 červienia ŭ budynku, jaki ŭ XVII stahodździ byŭ kulturnym centram, dzie Rembrant, jaho pamočniki i vučni razam pracavali nad svaimi tvorami. Ciapier novaje pakaleńnie mastakoŭ XXI stahodździa arhanizoŭvaje tut svaju studyju. Takim čynam muziej zastajecca miescam, poŭnym inavacyj i ekśpierymientaŭ. Pry hetym zachoŭvajecca šmatviekavoje mastactva hraviury i malavańnia tuššu.

Papiaredniaja rehistracyja adkrytaja na sajcie muzieja. Košt tatuiroŭki składaje ad 100 da 250 jeŭra.

Čytajcie jašče:

Dzie adpačyć i što pahladzieć na Padlaššy?

U pałacy pieršaha biełaruskaha arnitołaha budzie muziej. Z pastaŭskaj rezidencyi Tyzienhaŭzaŭ narešcie źjedzie balnica

Navukoŭcy z dapamohaj 3D-skanavańnia daśledavali zahadkavuju rymskuju praktyku pachavańnia

Клас
3
Панылы сорам
3
Ха-ха
1
Ого
0
Сумна
0
Абуральна
1

Chočaš padzialicca važnaj infarmacyjaj ananimna i kanfidencyjna?