«Siońnia ja chaču paznajomić vas z novaj inicyjatyvaj, kab skarystacca hetym važnym momantam u rehijonie. Heta novy płan rostu dla Zachodnich Bałkan. My chočam raźvić prahres, dasiahnuty za apošnija miesiacy. Ale my taksama chočam prynieści niekatoryja pieravahi siabroŭstva ŭ ES narodam Zachodnich Bałkan užo siońnia», — skazała fon der Lajen.
Płan rostu, jaki prapanuje Jeŭrakamisija, sa słoŭ fon der Lajen, hruntujecca na čatyroch asnovach.
«Pa-pieršaje, nablizić Zachodnija Bałkany da adzinaha rynku ES. Pa-druhoje, heta pahłybleńnie rehijanalnaj ekanamičnaj intehracyi. Pa-treciaje, paskareńnie fundamientalnych reformaŭ. I, pa-čaćviortaje, pavieličeńnie fondaŭ padrychtoŭki da ŭstupleńnia», — zajaviła jeŭračynoŭnica.
U peŭnym sensie heta novy padychod dla Jeŭrapiejskaha sajuza, padkreśliła fon der Lajen.
«My nie tolki prosim našych partnioraŭ zrabić novyja kroki nasustrač nam. My taksama robim vialiki krok nasustrač. Naša ahulnaja meta — paskoryć ich šlach u ES. I dla hetaha my nabližajem naš Sajuz da Zachodnich Bałkanaŭ», — adznačyła kiraŭnica Jeŭrakamisii.
Havorka ŭ hetym vypadku idzie pra šeść bałkanskich krain, jakija dahetul nie źjaŭlajucca členami Jeŭrasajuza. Majucca na ŭvazie Ałbanija, Bośnija i Hiercahavina, Kosava, Paŭnočnaja Makiedonija, Sierbija i Čarnahoryja. Usie jany dekłarujuć svajo žadańnie dałučycca da Jeŭrasajuza i tak ci inačaj, choć i ŭ roznaj stupieni, da dasiahnieńnia hetaj mety prasunulisia.
Na siońnia ŭsie hetyja krainy, za vyklučeńniem Kosava, majuć aficyjny status kandydata na ŭstupleńnie ŭ ES, Kosavu ž zaminaje pakul tolki jahonaje asablivaje stanovišča, źviazanaje z tym, što niekatoryja krainy Jeŭrasajuza aficyjna nie pryznajuć jahonaj niezaležnaści.
Čytajcie taksama:
Bośnija i Hiercahavina aficyjna atrymała status kandydata na ŭstupleńnie ŭ Jeŭrasajuz
