Uładzimir Pucin. Fota: Kremlin.ru
Kamientujučy ataku BPŁA na stalicu RF, Pucin zajaviŭ, što rasijskija vojski nanieśli ŭdar pa štabie ŭkrainskaj vajskovaj raźviedki «dva-try dni tamu», i skazaŭ, što Uzbrojenyja siły RF praciahvajuć adkazvać na «vajnu Ukrainy suprać Danbasa», nanosiačy ŭdary pa ŭkrainskaj vajskovaj infrastruktury.
Prezident RF namiaknuŭ, što ŭdary bieśpiłotnikaŭ pa Maskvie byli adkazam Kijeva na rasijskija ataki. Pry hetym rasijskaje Minabarony paviedamiła 30 maja, što vojski RF ździejśnili «šerah udaraŭ z užyvańniem dalnabojnaha vysokadakładnaha ŭzbrajeńnia pavietranaha bazavańnia pa hałoŭnych centrach pryniaćcia rašeńniaŭ» va Ukrainie.
«Minabarony Rasii nie zajaŭlała, što nanosiła ŭdary pa štabie ŭkrainskaj vajskovaj raźviedki, niama nijakich paćviardžeńniaŭ zajavy Pucina», — piša ISW.
Rasijski prezident taksama zajaviŭ, što Ukraina sprabuje spravakavać Rasiju nanieści ŭdar u adkaz.
Akcent Pucina na minułych i biahučych rakietnych udarach, mahčyma, źjaŭlajecca sprobaj dać zrazumieć, što RF užo aktyŭna adkazvaje i što joj nie treba adkazvać na dalejšyja ŭkrainskija pravakacyi».
U ISW taksama źviarnuli ŭvahu na słovy Pucina pra toje, što, choć maskoŭskija sistemy supraćpavietranaj abarony «pracujuć narmalna», Rasii ŭsio jašče treba «pracavać» nad udaskanaleńniem hetych sistem.
U instytucie miarkujuć, što adpaviednaj zajavaj Pucin pasprabavaŭ apiaredzić paproki z boku rasijskich ultranacyjanalistaŭ, jakija raniej užo krytykavali nieefiektyŭnaść srodkaŭ SPA ŭ Maskvie i ŭ rehijonach na miažy z Ukrainaj.
Što było pierad hetym?
Pavodle roznych źviestak ŚMI, ad 25 da 32 bieśpiłotnikaŭ atakavali Maskvu ŭnačy 30 maja, paškodžana, prynamsi, dva šmatpaviarchovyja damy, paviedamlajecca, što bolšaść dronaŭ źbili na padlocie da rasijskaj stalicy, nahadvaje «Ukrainskaja praŭda».
Prezident Rasii Uładzimir Pucin zajaviŭ, što supraćpavietranaja abarona Maskvy «spracavała štatna» padčas ataki bieśpiłotnikaŭ 30 maja, adnak jaje buduć uzmacniać.
Rasijskaje vydańnie «Viorstka» naniesła na kartu miesca ataki bieśpiłotnikaŭ u Maskvie — paznačanyja adrasy traplańnia dronaŭ i punkty, dzie byli paviedamleńni pra vybuchi.
Čytajcie taksama:
Bieśpiłotniki sprabavali atakavać Maskvu, źbili kala dziasiatka
Vajna pryjšła na Rubloŭku. U epicentry ataki dronaŭ apynulisia majontki pucinskaj elity
