Maryna Vasileŭskaja demanstruje ŭzrovień svajoj padrychtoŭki Alaksandru Łukašenku
Bortpravadnicy avijakampanii «Biełavija» 32 hady. Šeść ź ich jana pracuje ŭ kampanii.
Da hetaha dziaŭčyna 15 hadoŭ prafiesijna zajmałasia balnymi tancami, paviedamlała «SB. Biełaruś siehodnia».
Maryna Vasileŭskaja (źleva). Fota: telehram-kanał «Biełavija»
Maryna Vasileŭskaja zachaplajecca dyzajnam interjeraŭ, zajmajecca aerobikaj, hulaje ŭ badminton i tenis, vyroščvaje harodninu na aharodzie.
«Kali mnie paviedamili hetuju navinu, ja nie pavieryła, padumała, što mianie razyhryvajuć, — kazała jana ŭ intervju «Minskaj praŭdzie» pra mahčymy palot u kosmas. — Heta ž niešta nierealnaje! Heta niemahčyma! Ale potym padumała: «A čamu b i nie?» Taki šaniec byvaje raz u žyćci, hłupstva admaŭlacca. I ja vyrašyła sprabavać i rabić usio, što ad mianie patrabujecca. Jakraz dumała ab płanach na žyćcio i razumieła, što chaču ruchacca dalej i vyšej. Vyšej akazaŭsia tolki kosmas».
U kancy śniežnia za tym, jak Maryna ŭ centryfuzie pieranosiła vaśmirazovuju pierahruzku, naziraŭ Alaksandr Łukašenka. Tady jon pryjazdžaŭ u padmaskoŭny Zorny haradok u navukova-daśledčy vyprabavalny centr padrychtoŭki kasmanaŭtaŭ imia Ju. A. Haharyna.
«Naohuł małajčyna!» — skazaŭ joj Łukašenka.
«Chacieła b ad usiaho našaha kalektyvu padziakavać vam za hetuju mahčymaść znachodzicca tut i za padtrymku. Šalona ščaślivaja, što ŭ nas jość šaniec być u liku kandydataŭ dla palotu ŭ kosmas. I ja z upeŭnienaściu mahu skazać, što my hatovyja z honaram i dobraj jakaściu pradstavić našu krainu na mižnarodnaj kaśmičnaj stancyi», — kazała Łukašenku Maryna Vasileŭskaja.
Jaje dubloram pryznačyli biełaruskaha dziciačaha chirurha Anastasiju Lankovu. Jana skončyła piedyjatryčny fakultet BDMU, pracuje u RNPC dziciačaj chirurhii i pa sumiaščalnictvie asistentkaj na kafiedry narmalnaj anatomii ŭ miedyčnym univiersitecie.
U 2019-m jaje adznačyli jak najlepšuju maładuju śpiecyjalistku ŭ halinie achovy zdaroŭja.
Zapusk kaśmičnaha karabla «Sajuz-24», u kamandzie jakoha biełaruska palacić u kosmas, zapłanavany na 15 vieraśnia 2023 hoda.
Kamandziram karabla ŭ hetym palocie stanie rasijski kasmanaŭt biełaruskaha pachodžańnia Aleh Navicki, vynikaje ź infarmacyi centra padrychtoŭki kasmanaŭtaŭ (CPK).
Akramia Vasileŭskaj i Navickaha, u kosmas u jakaści bortinžyniera adpravicca astranaŭt NASA Kołdvieł Dajsan Trejsi.
Dublorami, akramia Lankovaj, pryznačanyja rasijski kasmanaŭt Ivan Vahnier i astranaŭt NASA Piecit Donald Roj.
Čytajcie taksama:
Stała viadoma proźvišča biełaruski, jakuju nieŭzabavie zapuściać u kosmas
