Pucin razumieje, što Łukašenka — taki čałaviek, jakomu nielha davać u ruki jadziernuju zbroju, ličyć Kłaskoŭski. Kałaž «Našaj Nivy»
«Łukašenka hladzić na Paŭnočnuju Kareju: biednaja kraina, ale ź joj cackajucca»
Na dumku palityčnaha analityka prajekta «Pozirk» Alaksandra Kłaskoŭskaha, adrazu było zrazumieła, što kali jadziernaja zbroja apyniecca na terytoryi Biełarusi, to kiravać joj buduć tolki rasijanie.
«Pa-pieršaje, Maskva nie choča chacia b farmalna parušać mižnarodnyja damovy ŭ halinie nieraspaŭsiudu jadziernaj zbroi, pieradajučy kiravańnie joju inšaj krainie. Tut ža hetaja zbroja zastajecca pad kiraŭnictvam RF, što nie budzie ličycca jaje raspaŭsiudam.
Takim ža čynam ZŠA raniej raźmiaścili svaju jadziernuju zbroju ŭ inšych krainach, stvaryŭšy precedent, na jaki ciapier achvotna spasyłajecca Kreml», — źviartaje ŭvahu analityk.
Alaksandr Kłaskoŭski. Fota: «Naša Niva»
Pa-druhoje, na dumku Kłaskoŭskaha, Pucin razumieje, što Łukašenka — taki čałaviek, jakomu nielha davać u ruki jadziernuju zbroju.
«Šajhu jašče raz padkreśliŭ toje, što i tak było zrazumieła».
Pry hetym analityk nie vyklučaje, što Łukašenka moh u peŭnaj stupieni spadziavacca na chacia b uskosny dostup da jadziernaj knopki.
«Łukašenka časta sam vieryć u tyja bajki, jakija prydumlaje, tamu jon moh na takoje spadziavacca. Ale ŭ lubym razie jon razumieje, što tak ci inakš heta dadatkovaja harantyja dla jaho, bo na takuju krainu buduć bolš bajacca paleźci. Jon i siońnia davoli chvaravita adreahavaŭ na zajavu adstaŭnoha polskaha hienierała, jaki skazaŭ, što Varšava moža padtrymać paŭstańnie ŭ Biełarusi. Raniej jon nie adnarazova vykazvaŭsia pra połk Kalinoŭskaha. Tamu ŭ jaho karcinie śvietu najaŭnaść JAZ na terytoryi krainy śviedčyć pra toje, što na hetuju terytoryju nichto nie suniecca niezaležna ad taho, chto hety arsienał kantraluje», — kaža analityk.
Alaksandr Kłaskoŭski ličyć, što choć z adnaho boku Łukašenka ŭ hetym vypadku jość maryjanietkaj Kramla, ź inšaha — jon zadavalniaje svaje jadziernyja ambicyi. Tamu i jon, i Pucin u peŭnym sensie atrymlivajuć vyhadu ad takoj ździełki.
«Jon hladzić na Paŭnočnuju Kareju, jakaja z adnaho boku biednaja i nie vielmi raźvitaja kraina, a ź inšaha — navat Vašynhton ź joj cackajecca, bo pabojvajecca jadziernaha dručka. Voś i jon miarkuje, što jaho buduć aścierahacca, jak Kima», — adznačaje Kłaskoŭski.
«Trajanski koń dla Biełarusi»
Ahułam hety praces analityk nazyvaje čarhovym razburalnym krokam dla biełaruskaj niezaležnaści, jaki budzie mieć vialikija nastupstvy, navat kali ŭjavić sabie, što ŭ Biełarusi źmienicca ŭłada na demakratyčnuju.
«Kreml budzie ŭsialak hetamu supraciŭlacca, bo heta jahony stratehičny płacdarm, jaki jon nie zachoča addavać. Tamu sama pierśpiektyva niejkich demakratyčnych pieramien u Biełarusi ŭskładniajecca. Navat kali pryjdzie ŭrad, jaki zachoča naładžvać stasunki z Zachadam, to pazbavicca ad rasijskaha kantrolu budzie jašče značna składaniej.
Heta ŭ peŭnym sensie trajanski koń dla Biełarusi, bo ŭ vypadku niejkich fors-mažornych situacyj u Kramla budzie arhumient, što jany abaraniajuć tam svaju jadziernuju zbroju, pakolki nie chočuć, kab jana patrapiła ŭ ruki «ekstremistaŭ» i h. d».
Taksama Alaksandr Kłaskoŭski źviartaje ŭvahu na toje, što razam z rasijskaj jadziernaj zbrojaj u Biełarusi moža źjavicca i rasijskaja vajskovaja baza, jakaja budzie achoŭvać hetuju zbroju.
«Łukašenka, jak pakazvaje dośvied, niepradkazalny navat u dačynieńni da Rasii, tamu možna mierkavać, što rasijanie nie davierać achovu hetaha abjekta biełaruskaj armii. A kali ruskija kudy-niebudź prychodziać z bazami, to vypierci ich paśla vielmi składana», — adznačaje Kłaskoŭski.
«Razam ź jadziernaj zbrojaj pryjedzie i piersanał, jaki budzie jaje kantralavać»
Analityk Arciom Šrajbman adznačaje, što raźmiaščeńnie rasijskaj jadziernaj zbroi budzie aznačać jašče bolšaje pahłybieńnie ŭ zaležnaść ad Rasii.
Arciom Šrajbman. Fota: staronka ŭ fejsbuku Arcioma Šrajbmana
«Razam ź jadziernaj zbrojaj pryjedzie i piersanał, jaki budzie jaje kantralavać. Pa sutnaści, heta budzie nievialikaja vajskovaja baza. Tamu Rasija budzie jašče bolš zacikaŭlenaja ŭ tym, kab palityčna ŭ Biełarusi ničoha nie źmianiałasia, pakul na našaj terytoryi budzie ich jadziernaja zbroja. Kab hetaja zbroja nie akazałasia pad pahrozaj, im budzie patrebnaja pradkazalnaja i łajalnaja da Rasii ŭłada. Usio heta zamacoŭvaje Biełaruś u śfiery kantrolu pucinskaha režymu», — kaža Šrajbman.
U dadatak analityk adznačaje, što heta biezumoŭna padvyšaje ryzyki dla našaj krainy, bo my ŭ takim razie staniem u pryjarytecie siarod celaŭ dla naniasieńnia previentyŭnaha ŭdaru. Tamu raźmiaščeńnie na svajoj terytoryi takoj zbroi stavić našu krainu pad taki pryceł, pad jakim jana raniej nie była.
«Siarod inšych nastupstvaŭ — možna mierkavać, što za takija pasłuhi ŭ biełaruskaj ułady atrymajecca vytarhavać niejkuju vyhadu dla sabie, bo, z punktu hledžańnia Minska, jany akazvajuć pasłuhu Kramlu», —miarkuje analityk.
Arciom Šrajbman taksama adznačaje dva aśpiekty, čamu kantrol za jadziernaj zbrojaj budzie tolki ŭ Rasii. Heta jak niežadańnie dzialicca paŭnamoctvami i dazvalać Łukašenku być samastojnym, tak i niežadańnie parušać mižnarodnyja damovy.
«Pucin nie choča panižać stupień kantrolu nad svajoj zbrojaj», — ličyć Šrajbman. Skrynšot ź videa
«Pucin nie choča panižać stupień kantrolu nad svajoj zbrojaj. Heta dadatkovaja ryzyka, bo Łukašenka nie samy pradkazalny čałaviek, kab davieryć jamu ŭ ruki jadziernuju bombu. Aproč hetaha, my viedajem, što Rasija lubić sama ŭsio kantralavać.
Pa-druhoje, heta robicca i dla taho, kab padkreślić, što Rasija nie parušaje damovu ab nieraspaŭsiudžańni jadziernaj zbroi. Jany lubiać padkreślivać, što ŭsie damovy parušajuć amierykancy, a nie jany. Tamu rasijanie ličać važnym paŭtarać, što jany tolki pieramiaščajuć zbroju, ale zachoŭvajuć nad joj kantrol, jak hetaha patrabuje damova. Bo tam prapisana, što jadziernyja dziaržavy nie pavinny davać kantrol nad jadziernaj zbrojaj niajadziernym krainam», — źviartaje ŭvahu Arciom Šrajbman.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Łukašenka zajaviŭ, što pačałosia pieramiaščeńnie ŭ Biełaruś jadziernych bojeprypasaŭ
Dzie raźmieściać rasijskuju jadziernuju zbroju, vybuch jakoj moža źniščyć ceły horad?
Nia toje što ciažka budzie, ale - 100% - NIEMAHČYMA
Druhoha Harbačova ŭ Maskovii nie budzie. Druhoha razvała impieryi nie čakajcie. Navat kali Ukraina vyjdzie na pamiežža 1991 hoda. Heta anijak nie paŭpłyvaje na stan Maskovii. Adpaviedna - heta ničoha nie daść Biełarusi. A ź jadziernaj zbrojaj ruskija vojski zamacujucca u nas tryvała i pakul tut budzie heta samaja jadziernaja zbroja. Voś i ŭsie. A prymianiać jaje jany pakul što nie buduć, jadziernaja zbroja - heta dla NATA, dla Zachodniaj Eŭropy.
Łukašienka kančatkova chavaje Biełaruś całkam pieraŭtvaraje jaje ŭ kałoniju Maskvy - z movaj, kulturaj, histaryčnaj pamiaćciu, ekanomikaj, adukacyjaj, finansami i h.d.