Alaksiej Hłazkoŭ, doktar i alpinist. Skryn videa STB

Alaksiej Hłazkoŭ, doktar i alpinist. Skryn videa STB

«Naša Niva» atrymała paćviardžeńnie, što ŭ skład hrupy ŭvachodziŭ viadomy biełaruski alpinist, aniestezijołah-reanimatołah Minskaj abłasnoj kliničnaj balnicy Alaksiej Hłazkoŭ. Za jaho plačyma jość dośvied uzychodžańniaŭ na davoli składanyja viaršyni: naprykład, Hłazkoŭ skaryŭ pik Chan-Tenhry vyšynioj 7010 mietraŭ. Tady jon pravioŭ u darozie 33 dni, straciŭ 10 kiłahramaŭ i ledź nie zahinuŭ — pad im abrynuŭsia šmattonny śniežny karniz. Taksama za plačyma Hłazkova skareńnie hornaha masiva Chibiny, Kaźbieka (5034 mietry), pika Lenina (7134 mietry).

Hłazkoŭ źjaŭlaŭsia ŭ navinach u 2020 hodzie jak adzin ź miedykaŭ, jaki pracavaŭ u čyrvonaj zonie z chvorymi na kavid.

Svaje pachody Hłazkoŭ zvyčajna ładziŭ ź siabrami pa turystyčnym kłubie Magadan.by — heta niekamiercyjnaje abjadnańnie amataraŭ aktyŭnaha ładu žyćcia. Razam siabry pa kłubie nie tolki skarali hory, ale i płavali na bajdarkach, katalisia na łyžach, ładzili aŭta— i viełašpacyry.

Razam z Hłazkovym, jak paćvierdzili «Našaj Nivie», na Elbrus (5642,7 mietra) adpravilisia nastupnyja turysty: Alaksiej Michałkovič, Alaksandra Hłyboŭskaja, Viktoryja Ułasievič, Volha Ułasievič, Dzianis Ułasievič. Nakolki viadoma, dośvied hornych pachodaŭ byŭ tolki ŭ Hłazkova.

Pa infarmacyi kanała sietki Mash, pierad padjomam turysty nidzie nie zarehistravalisia. Spačatku jany nibyta źbiralisia ładzić trenirovačny trekinh da alpinisckaha łahiera Uzunkoł, ale potym čamuści pačali ŭzychodžańnie na Elbrus z boku zachodniaha schiłu. Apošnim biełarusaŭ bačyŭ kiroŭca, jaki padniaŭsia ź imi da vyšyni try tysiačy mietraŭ i viarnuŭsia. Z saboj alpinisty ŭziali spadarožnikavy telefon, jaki, jak paviedamlajecca, u pieršy dzień nieaściarožna pakłali ŭ zaplečnik, aparat uklučyŭsia i razradziŭsia.

Elbrus. Fota: Wikimedia Commons

Elbrus. Fota: Wikimedia Commons

Pa adnych danych, tryvohu zabiŭ muž adnoj z turystak, bo 21 maja hrupa pavinna była viarnucca na bazu, ale tak i nie vyjšła na suviaź. Taksama jość infarmacyja, što pra źniknieńnie biełarusaŭ paviedamili miascovyja. Voś jak pra heta raskazvaje daradca adździaleńnia biełaruskaha pasolstva ŭ Rastovie-na-Donie Dzianis Cimochin: «Jany [biełarusy] damovilisia ź miascovymi, miascovyja davieźli da niejkaha miesca. Damovilisia, što na niejkim inšym punkcie ich sustrenuć praz peŭnuju kolkaść času. I voś učora byŭ čas, kali jany [biełarusy] pavinny byli vyjści na hety punkt, ale nie vyjšli. Paśla hetaha padniali ratavalnikaŭ».

Ciapier alpinistaŭ šukajuć rataŭniki z rasijskaha MNS: udzielničaje bolš za 80 čałaviek, vykarystoŭvajuć viertalot i dron, ale pakul što śladoŭ hrupy Hłazkova nie znajšli.

Z čatyroch schiłaŭ Elbrusa zachodni ličycca samym składanym. Bolš papularna skarać hetuju haru z poŭdnia ci z poŭnačy, katehoryi składanaści hetych maršrutaŭ — adpaviedna 1B i 2A. Što da zachadu, z hetaha boku na Elbrus rekamiendujuć uzychodzić tolki bolš treniravanym skałałazam.

Praŭda, biełaruski alpinist ź vielizarnym dośviedam, ź jakim ananimna pahutaryła «Naša Niva», ličyć, što Elbrus z usich bakoŭ — heta, chutčej, pra horny turyzm, čym pra alpinizm. «Tam usiudy treba, chutčej, zdaroŭje, čym umieńnie. Usiudy idzieš pieššu, i ŭsiudy jość niebiaśpieka, ułaścivaja alpinizmu, naprykład, łaviny i raskoliny. Pakul u raskolinu nie zvaliŭsia, zdajecca, i nie treba viedać, jak ź jaje vybiracca. Čamu ŭzychodžańnie z zachadu samaje składanaje? Tam schił trochi bolš stromki. Ja nie chadziŭ z zachadu, ale bačyŭ hety schił źvierchu, ź viaršyni. Sapraŭdy bolš stromki, ale całkam chodzicca».

Kłub Magadan.by admoviŭsia kamientavać hetuju historyju.

Čytajcie taksama:

Šeść biełaruskich turystaŭ źnikli na Elbrusie

Turyst z Tuły sprabavaŭ pakaryć Elbrus u krasoŭkach i zamiorz da śmierci

Zatrymali alpinista — za toje, što braŭ z saboj u zamiežnyja vandroŭki bieła-čyrvona-bieły ściah

Клас
3
Панылы сорам
4
Ха-ха
1
Ого
6
Сумна
14
Абуральна
4

Chočaš padzialicca važnaj infarmacyjaj ananimna i kanfidencyjna?