«Modlin», jaki pieratvaryŭsia ŭ Minsk. Fota z asabistaha archiva aŭtara materyjała
«Nie viedaju, chto zdymaje hety film, nie ŭdakładnili na placoŭcy. Aŭtobusy stajali sinija na minskich numarach, taksi 7220, žančyny ŭ futrach jak z Savieckaha Sajuza. My padyšli i spytalisia, što adbyvajecca, a apieratar-palak skazaŭ, što Pucin pajšoŭ jašče dalej, i paśmiajaŭsia», — raspavioŭ Most Alaksiej.
Biełarus adznačaje, što ŭ «Modlinie» ŭdałosia davoli padobna ŭznavić minski aeraport, i niekatoryja pasažyry na čas adčuli siabie ŭ Biełarusi.
«Lacieli ŭ Varšavu, a apynulisia ŭ Minsku. Tolki vyjšli z aeraporta i bačym hierb, pierahladajemsia ŭsie pamiž saboj i ŭ nieparazumieńni: «Dzie my znachodzimsia…»
Na niekalki siekund ja realna padumaŭ, što my ŭ Minsku. I siabar kaža surjoznym hołasam: «A što, ty nie čuŭ, jak abjaŭlali, što samalot u Miensku sadzicca?». Heta jašče ŭdvaja bolš mianie spałochała», — skazaŭ Alaksiej.
Jaki film zdymajuć u aeraporcie «Modlin», Most dakładna vyśvietlić nie zmoh. U pres-słužbie aeraporta raspaviali, što jany nie majuć infarmacyi pra zdymki.
Ale całkam vierahodna, što «Minsk» u varšaŭskim aeraporcie — heta zdymki filma Ahnieški Chołand pra mihrantaŭ na biełaruska-polskaj miažy. Karcina budzie raskazvać pra kryzis na miažy Polščy i Biełarusi. Hałoŭnymi hierojami stanuć mihranty ź Siryi i Afhanistana, žychary Padlašša, a taksama supracoŭniki pamiežnaj słužby. Detali filma trymajucca ŭ sakrecie.
Čytajcie taksama:
Dla Ramana Pratasieviča prakurorka zaprasiła 10 hadoŭ kałonii ŭzmocnienaha režymu
