U 2020-m hramadstva było aburana ŭzroŭniem falsifikacyj na vybarach. U hetym vinavacili ŭ tym liku nastaŭnikaŭ, jakija tradycyjna ŭvachodziać u skład vybarčych kamisij. Fota: sacsietki
U kancy lutaha nastupnaha hoda ŭ Biełarusi maje adbycca hetak zvany Adziny dzień hałasavańnia — sumieščanyja «vybary» ŭ Pałatu pradstaŭnikoŭ i haradskija, abłasnyja, rajonnyja i pasiałkovyja Saviety deputataŭ.
Režym Łukašenki pačaŭ rychtavacca da praviadzieńnia kampanii vielmi zahadzia — jak nam viadoma, užo pačaŭsia adbor ludziej u vybarčyja kamisii. Ale praces nie idzie hładka.
Tut treba patłumačyć, što, zhodna z aficyjnaj viersijaj, udzielniki kamisij pa padliku hałasoŭ sami vyłučajuć siabie ad svaich miescaŭ pracy, hramadskich abjadnańniaŭ, partyj ci prosta tak, sami siabie.
Ale demakratyja ŭ vybarach členaŭ kamisij daŭno zamieniena na bačnaść: u realnaści členaŭ kamisij adbirajuć rajonnyja ci haradskija adździeły ideałohii, a načalnikami kamisij pryznačajuć ludziej, jakim jość što hublać u ramkach sistemy, — kiraŭnikoŭ dziaržaŭnych pradpryjemstvaŭ, dyrektaraŭ škoł i hetak dalej.
U časy adnosna spakojnych falsifikacyj nabor u kamisii adbyvaŭsia lohka i ŭsprymaŭsia takimi «ščaśliŭčykami» jak mahčymaść zarabić premiju, ničoha nie robiačy, bo zadačaj členaŭ kamisii faktyčna było ahučyć daviedzienyja źvierchu ličby abo ŭkinuć hałasy za patrebnaha čałavieka, a potym ich ža pieraličyć i padać jak praŭdzivuju volu naroda.
Ale ŭsio źmianiłasia ŭ 2020 hodzie. Nieprykrytaja chłuśnia mnohich vybarčych kamisij i CVK adnosna narodnaha vybaru — adna z asnoŭnych pryčyn hramadskaha vybuchu.
Mnohija heta razumiejuć i, pa našaj infarmacyi, admaŭlajucca ad prapanoŭ miascovych uład udzielničać u kamisijach.
«Prapanovu rabili mnie i majmu kalehu, ale my abodva admovilisia», — skazaŭ nam supracoŭnik adnoj ź minskich dziaržarhanizacyj.
Prablemy z adboram uskosna paćvierdziŭ i naš surazmoviec z adnaho z abłvykankamaŭ, skazaŭšy, što isnuje ryzyka, što «sapraŭdnych beeresemaŭcaŭ na ŭsie ŭčastki nie chopić».
Nastaŭnica adnoj sa škoł u Viciebskaj vobłaści patłumačyła svaju łohiku pry admovie.
«Idučy ŭ kamisiju, ty faktyčna vystaŭlaješ siabie h*m u vačach tych, z kim ty žyvieš. U nas usie hałasavali za Cichanoŭskuju, mnohija siadzieli. I kali ŭ 2020-m na ŭzroŭni svajoj kamisii možna było sumlenna padličyć hałasy (što kazali abłasnyja kamisii i CVK — inšaja historyja), to siońnia jasna, što navat kali zachočaš prajavić sumleńnie — pasadziać. Tamu vybaru niama, ja admoviłasia», — skazała rabotnica adnoj sa škoł, jakaja była ŭ vybarčaj kamisii ŭ 2020-m.
Kali vam viadoma bolš pa temie, paviedamlajcie asabista tym aŭtaram «Našaj Nivy», jakich viedajecie, abo ŭ telehram-akaŭnt «Našaj Nivy» ŭ sakretny čat: @nn_editor.
Kamu zručniej na mejł — pišycie redaktaru na mejły [email protected] ci [email protected].
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
