Kiroŭcy roznych katehoryj

Badaj, adna z samych papularnych vakansij dla biełarusaŭ u Jeŭropie — heta kiroŭca-dalnabojščyk. 

U zaležnaści ad firmy i krainy pracaŭładkavańnia, daśviedčanyja kiroŭcy katehoryi S+Je mohuć raźličvać na zarpłatu ad 65 jeŭra ŭ sutki. Takija hrošy zvyčajna pačynajuć płacić paśla vyprabavalnaha terminu, jaki ŭ roznych firmach moža ciahnucca ad adnaho da troch miesiacaŭ.

Adznačym, što 65 jeŭra za sutki dla dalnabojščyka, jaki pracuje ŭ Jeŭropie, heta chutčej minimum, bo bolšaść atrymlivaje pa 70—80 jeŭra. Bolš za ŭsio zarablajuć kiroŭcy, jakija pracujuć na aŭtavozach ci pieravoziać niebiaśpiečnyja hruzy abo žyvioł. U takich vypadkach sutačnyja składajuć užo kala 100 jeŭra. 

Zvyčajna dalnabojščyki pracujuć kadencyjami, kali šeść tydniaŭ znachodziacca ŭ rejsie, paśla čaho dva tydni adpačyvajuć doma.

Atrymlivajecca, što pry siarednich 75 jeŭra za sutki siaredniamiesiačny zarobak biełaruskaha dalnabojščyka, jaki pracuje ŭ jeŭrapiejskaj firmie, składaje kala 1700 jeŭra na ruki.

Jeŭropie ŭ cełym i Polščy ŭ pryvatnaści patrebny nie tolki kiroŭcy z pravami katehoryi S+Je, ale i z katehoryjaj V dla pracy na busach. Takija kiroŭcy zvyčajna atrymlivajuć za sutki svajoj pracy kala 50 jeŭra.

Takim čynam za miesiac jany zarablajuć kala 1000—1200 jeŭra na ruki. Kiroŭcy busaŭ, jak i furščyki, amal zaŭždy načujuć u mašynie, tamu asnoŭnaja častka ich vydatkaŭ u rejsie — heta ježa.

Na zarobki ŭ pamiery kala 1000 jeŭra ŭ miesiac moža raźličvać i taksist, jaki vyrašyć pracavać u Polščy abo Litvie.

Budaŭniki ŭ Polščy i Litvie

Zarobki ŭ budaŭnictvie mocna roźniacca ad kvalifikacyi i dośviedu budaŭnika.

Ale možna adznačyć peŭny minimum, na jaki moža raźličvać biełarus, hatovy da pracy na budoŭli ŭ Polščy abo Litvie, — heta 4,5—5 jeŭra za hadzinu pracy.

Tak, naprykład, u Litvie (Šaŭlaj) šukajuć budaŭnika-ŭniviersała z vyprabavalnym terminam adzin miesiac. Ciaham hetaha pieryjadu abiacajuć płacić pa 5 jeŭra za hadzinu pracy. Paśla zarobak moža vyraści da 6—7 jeŭra ŭ zaležnaści ad kvalifikacyi i pracazdolnaści kandydata.

Daśviedčanym apracoŭščykam dla pracy ŭ Vilni abo Koŭnie abiacajuć 1500 jeŭra na ruki ŭ miesiac.

Zarobki budaŭnikoŭ u Polščy padobnyja. Tak, naprykład, u Katavicach šukajuć budaŭnikoŭ z apłataj ad 25 da 30 złotych (kala 5,4—6,4 jeŭra) za hadzinu na ruki.

Pry hetym, jak adznačajuć biełarusy, jakija ŭžo nie pieršy hod pracujuć na budoŭlach u susiednich krainach ES, kvalifikavanyja i pracavityja biełaruskija budaŭniki ŭ Polščy i Litvie zarablajuć i pa 1800—2000 jeŭra ŭ miesiac.

Praca na składzie i na vytvorčaści sušy

Adna z najmienšych stavak siarod mnostva vakansij u Polščy — heta 17—18 złotych (3,6—3,8 jeŭra). Naprykład, stolki hatovy płacić pakavalnikam na fabrycy pa vytvorčaści sušy za 10 kiłamietraŭ ad Poznani abo rabočym na składzie ŭ vakolicach Krakava.

Pa tych ža staŭkach 17—18 złotych biaruć na pracu kamplektoŭščykaŭ zakazaŭ na składzie charčovych tavaraŭ u roznych haradach Polščy.

Upakoŭščykam marožanaha ŭ litoŭskim horadzie Maryjampole hatovy płacić na ruki ad 800 da 900 jeŭra ŭ miesiac.

Pa 4 jeŭra za hadzinu prapanujuć pamočnikam aficyjantaŭ u Vilni, pasudamyjnicy ŭ toj ža kaviarni abiacajuć pa 5 jeŭra za hadzinu.

Kab zarablać u Polščy abo Litvie sumy, vyšejšyja za ahučanyja, biełarusam treba vałodać miascovaj movaj, mieć vyšejšuju adukacyju i być zapatrabavanym śpiecyjalistam u svajoj halinie. U inšym vypadku dla atrymańnia bolš vialikich hrošaj daviadziecca jechać u bolš dalokija krainy.

Bielhija, Hiermanija

Kali kazać pra Bielhiju, to, naprykład, 2300 jeŭra na ruki za miesiac pracy tam hatovy płacić stracharam. Praŭda, kab zarabić takija hrošy daviadziecca pracavać pa 10 hadzin u dzień šeść dzion na tydzień. Z bonusaŭ pracadaŭca abiacaje zabiaśpiečyć biaspłatnym žyllom.

Na apłatu ŭ pamiery 60 jeŭra ŭ sutki moža raźličvać miechanik, jaki pracuje na bazie firmy bujnoha hruzapieravozčyka ŭ Bielhii. Žytło pradstaŭlaje najmalnik. Z ulikam 6-dzionnaha pracoŭnaha tydnia vychodzić kala 1500 jeŭra na ruki.

Bietonščykam u Hiermanii hatovy płacić pa 14 jeŭra na ruki za hadzinu pracy. Hrafik, jak i ŭ Bielhii, — 10-hadzinnaja šaścidzionka. Praz takija pierapracoŭki atrymajecca kala 3300 jeŭra za miesiac, ź ich 360 treba addać za pražyvańnie.

Aŭtamiechaniku na STA dla lehkavych aŭto ŭ Hiermanii hatovy płacić pa 10 jeŭra za hadzinu. Najmalnik adznačaje, što ŭ miesiac nabiahaje kala 180—200 pracoŭnych hadzin. Vynikaje, što miesiačny zarobak budzie vahacca ŭ miežach 1800—2000 jeŭra. Pradstaŭlajuć biaspłatnaje žytło. Ad miechanika patrabujecca dośvied pracy ad dvuch hadoŭ i vałodańnie razmoŭnaj niamieckaj.

Stolki ž abiacajuć płacić malaru, u abaviazki jakoha ŭvachodzić afarboŭka budynkaŭ zvonku. Praŭda, malaru daviadziecca kožny miesiac vydatkoŭvać pa 250 jeŭra na žytło.

Z akładam 9 jeŭra ŭ hadzinu dla pracy na składzie ŭ Hiermanii šukajuć žančyn va ŭzroście ad 20 da 35 hadoŭ. Z ulikam ahučanaha 5-dzionnaha pracoŭnaha tydnia vynikaje, što kandydatka moža raźličvać na zarobak da 1750 jeŭra. Ź ich 400 daviadziecca viartać za pražyvańnie ŭ kvatery i jašče 107 sydzie na bilety, kab dabiracca da pracy, papiaredžvaje najmalnik. Vynikaje, što čystymi paśla apłaty žylla i transpartnych vydatkaŭ supracoŭnicy składa zastaniecca mienš za 1250 jeŭra.

Havoračy ab pracy ŭ Bielhii i Hiermanii, varta adznačyć, što niaredka čałaviek, jaki jedzie pracavać u hetyja krainy, farmalna jurydyčna pracuje nie ŭ hetych krainach, a ŭ polskaj abo litoŭskaj firmie, jakaja vyvozić svaich supracoŭnikaŭ na pracu ŭ bolš raźvityja krainy Jeŭropy.

Va ŭsich apisanych vypadkach paznačana zarpłata, jakuju pracaŭnik atrymlivaje «na ruki».

Čytajcie taksama:

Kiraŭnica BiełTA pałochaje biełarusaŭ polskimi kłubnicami. A voś kolki tam zarablajuć na jahadach 

Stała viadoma, kali projdzie respublikanski subotnik i na što pojduć zaroblenyja na im hrošy

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?