Skrynšot siužeta «Sałaŭjoŭ Live»
U videa, pra jakoje razmova, viadučy ŭklučyŭ frahmient pramovy Łukašenki za 2 lipienia 2022 hoda, dzie toj aburaŭsia śćvierdžańniam, što «Pucin pieški chodzić pa Biełarusi i ŭsio vyrašaje». U zale tady sabrali ludziej z roznych rehijonaŭ krainy. Vypusk Karnavuchava moh by prajści niezaŭvažna, kali b nie adna detal — rasijski viadučy ŭ žyvym efiry pačaŭ rabić skrynšot hledačoŭ u zale, a mienavita maładoj dziaŭčyny ŭ błakitnaj sukiency. Ekran jaho płanšeta byŭ vyviedzieny ŭ efir, tamu heta pabačyli ŭsie.
Taja dziaŭčyna z zały — 21-hadovaja Nastaśsia Kuźniacova, studentka jurfaka Homielskaha dziaržaŭnaha ŭniviersiteta imia Francyska Skaryny.
Nastaśsia Kuźniacova. Fota: jaje staronka «Ukantakcie»
Jana aktyŭnaja ŭdzielnica roznych mierapryjemstvaŭ, jakija arhanizujuć Vykankam SND ci Moładzievy parłamient.
U akaŭncie dziaŭčyny jość i fota ŭ kašuli z nacyjanalnym arnamientam.
«Žryca kulta pryhažości», — staić u apisańni jaje staronki ŭ instahramie. Tam ža paznačana, što jana «dziaržsłužačaja».
«Zdavałasia, što takaja situacyja moža adbycca z kim zaŭhodna, ale dakładna nie sa mnoj», — pažartavała sama dziaŭčyna ŭ storyz u instahram nakont niečakanaj papularnaści.
«A jak zaŭśmichaŭsia ŭ kancy, nu sok», — prakamientavała jana reakcyju viadučaha sałaŭjoŭskaj pieradačy.
Toje vystupleńnie Łukašenki napiaredadni dziaržaŭnaha Dnia niezaležnaści jana apisała jak «na najvyšejšym uzroŭni».
